1973 жылы Жалағаш ауданындағы №119 «Жаңаталап» сегізжылдық мектебінің директоры қызметінен «Аққұм» ауылындағы №38 «Шымбөгет» орта мектебіне директор болып ауысып келгенімде Гүлжан Қаниева пионер ұйымының жетекшісі болып қызмет істейді екен. Кешегі кеңес өкіметі заманында 14 жасқа дейінгі оқушылар пионер ұйымының қатарына қабылданып, сол ұйымның ережесімен, тәртібімен жұмыс жасайтын. Оған ұстаздар тарапынан басшылық жасайтын жетекші «аға пионер вожатый» деп аталатын. Ол жұмысты аса бір қызығушылықпен, шын көңілмен, ізденіспен басқарды. Пионер ұйымының атрибуттарын қатаң сақтады. Оқушыларды ізденімпаздыққа, қоғамдық жұмысқа жанашырлықпен қарауға үйретті, үлгілі жетекші болды.
№38 «Шымбөгет» орта мектебі 1976-1977 оқу жылынан облыстың «Үлгі тірек» мектебі аталып таныла бастады. Осы уақытта білікті, ізденімпаз мұғалімдер адал да қажырлы еңбегімен облысқа, елге белгілі болды. Оқушыларға білім мен тәрбие берудегі іс-тәжірибе облыс мектептеріне таратылып, арнайы плакат шығарылды. Облыстық оқу бөлімі мен мұғалімдер білімін жетілдіру институты арнайы шығарылған плакатты облыс мектептеріне таратып, мұғалімдердің іс-тәжірибесін көпке үлгі етіп насихаттады. 1977 жылы мектеп басшыларының облыстық семинары өткізілді. Гүлжан Қаниева осы жұмыстардың бәріне белсене араласты, басы-қасында болды.
Ол жас ұрпаққа өрелі білім, өнегелі тәрбие беруде 40 жылдан аса уақыт бір ұжымда қызмет етті. Қызылорда қаласындағы М.Мәметова атындағы педагогикалық училищені, кейіннен педагогикалық институтты бастауыш сыныпты оқыту методикасы мен педагогикасы мамандығы бойынша бітірген.
Жаңа қоғамға лайықты, рухани жан дүниесі бай, дүниетанымы, талап-талғамы, білімі мен білігі жоғары тұлға тәрбиелеуде ұстаз еңбегі қашан да ерекше. Кейіннен бастауыш сынып мұғалімдігіне ауысып, ұзақ жыл еңбек етті. Арнаулы орта білім алғаннан соң, педагогикалық оқуда сырттай оқып, оны ойдағыдай аяқтап, өз ісінің жоғары білімді, тәжірибелі маманы болды. Мектепте қоғамдық ұйым басқарды.
Жаны жайсаң, көңілі дарқан, иманды да көркем мінезді, адамгершілігі биік болатын. Қай қызметті де, қоғамдық жұмысты да беріле атқарып, артында өшпестей із тастап, замандастары мен ұрпағына үлгілі-өнегелі тұлғасын сыйлата білді. Ақынжанды, парасатты жанның басшылық қызметі мен отбасындағы тәрбиесі де ел сүйсінетіндей. Елге ақылшы апа атанып, жан-жағына нұрлы шуағын шашып жүруші еді.
Еңбекке деген адалдығымен, ізденімпаздығымен зейнетке шыққанға дейін 1992-2002 жылдары №38 А.Бисенов атындағы орта мектеп директоры қызметін атқарды. Бұл ел тарихында жаңа формацияға ауысқан қиын кезең болды. Сонда да қиыншылықтарға қарамай ұжымды үлкен жетістіктерге бастады.
Педагогтердің конкурстарына, сайыстарына қатысты, «Жыл мұғалімі», «Аға мұғалім» атақтарын алды.
Дүниенің ондаған, жүздеген елінде жас ұрпақ мектепке қарай ағылғанда ол мәңгілік сапарға аттанды. Ұстаз ұлағаты ұмытылмай, шәкірт жүрегінде жағылған шырақтай жарқырап, сәулесін шаша бермек.
Әлихан МЕҢЛІБАЕВ,
№38 А.Бисенов атындағы орта мектебінің 1973-1982 жылдардағы директоры,
Қазақ ССР Халық ағарту ісінің озаты
