Осы аптаның сәрсенбісінде облыстық мәслихаттың кезекті сессиясы болып өтті. Оған облыс әкімінің бірінші орынбасары Данияр Жаналинов қатысты.
Депутаттар алдында алдымен 2024 жылға арналған облыстық бюджеттің атқарылуы жөнінде есеп берілді. Бұл жөнінде облыстық экономика және қаржы басқармасының басшысы Сәкен Мырзабек, облыстық тексеру комиссиясының төрағасы Мұса Қалдарбеков баяндама жасады. Сала басшылары ұсынылып отырған өзгерістерді жан-жақты түсіндірді.
Хабарламадан соң депутаттар бірқатар сұрақ қойып, нақты ұсыныс-пікірін жеткізді. Бюджет қаржысы тиімді және нәтижелі жұмсалуы керектігі баса айтылды.
Одан кейін облыстық білім басқармасы басшысының орынбасары Асхат Қанатов салада атқарылған жұмыстар мен алдағы міндеттер туралы кеңінен баяндады. Оның айтуынша, облыстың білім басқармасына бөлінген қаржы 308,1 млрд теңгені құрады. Бүгінде өңірде үш ауысымда оқитын мектептер жоқ. Екі жыл бұрын 4 білім ошағына қосымша құрылыс салу есебінен аталған түйткіл толық шешімін тапты. Былтыр білім беру инфрақұрылымын қолдау қоры, жергілікті бюджет және жеке инвестор есебінен 17 білім беру ұйымының құрылысы жүргізілді.
Олардың жалпы құны 8 млрд теңгеге жуық. Өңірде Президент бастамасымен қолға алынған «Жайлы мектеп» ұлттық жобасы бойынша 10 мектеп бой көтеріп жатыр. Сондай-ақ жақында демеушілік есебінен музыкалық колледждің жаңа ғимараты елдің игілігіне айналды.
Сессия барысында облыстық құрылыс, сәулет және қала құрылысы басқармасының басшысы Ерлан Төрәлиев, облыстық қоғамдық даму басқармасының басшысы Руслан Қаюпов Қызылорда қаласының кейбір құрамдас бөліктеріне атау беру туралы және қайта атау туралы, облыстық табиғи ресурстар және табиғат пайдалануды реттеу басқармасының басшысы Ғалымжан Еркебай 2025-2027 жылдарға арналған Қызылорда облысы бойынша қоршаған ортаны қорғау жөніндегі іс-шаралар жоспарын бекіту туралы баяндама жасады.
Сессия соңында депутаттардың ұсыныс-пікірі ескеріліп, күн тәртібіндегі мәселелер бойынша тиісті шешімдер қабылданды.
Әділжан ҮМБЕТ,
«Сыр бойы»
