«Ауылдық денсаулық сақтауды жаңғырту» ұлттық жобасы аясында аймақтың денсаулық сақтау нысандарында құрылыс және күрделі жөндеу жұмыстары жүргізілуде.
Мысалы, Шиелі аудандық көпбейінді орталық ауруханасына қарасты жұқпалы аурулар бөлімшесінің құрылысы қарқынды. Жоба құны – 2 миллард 323 миллион теңге.
Бас мердігер «Дәнекер» ЖШС құрылысты маусым айында аяқтап, пайдалануға беруді жоспарлап отыр.
Ғимараты 1970 жылы салынған «Болашақ» дәрігерлік амбулаториясы бүгінде Шиелі кентінің 8 351 тұрғынына қызмет көрсетеді. Алайда инженерлік жүйелері мен құрылыс конструкциялары тозығы жеткендіктен, күрделі жөндеу қажеттілігі туындады. Жоба-сметалық құжаттамасы әзірленіп, мемлекеттік сараптамадан өтті. «Жабдықтау» ЖШС бұл жұмысты бастап та кетті.
– Кент тұрғыны ретінде біз отбасымызбен «Болашақ» дәрігерлік амбулаториясына тіркелгенбіз. Көрсетіліп жатқан медициналық қызметтің сапасына көңіліміз толады. Ғимаратқа күрделі жөндеу жасалады деген хабарды естіп, қуанып қалдық. Жалпы денсаулық мекемелері кезең-кезеңмен жаңаланып, жаңғырып жатыр. Ол да – уақыт талабы, – деді еңбек ардагері Шағдарбек Саржанов.
Тағы бір жағымды жаңалық – аудандық аурухана жанынан қосымша ғимарат салынуда.
Шиелі ауданаралық ауруханасының көпбейінді ауруханаға айналуына байланысты медициналық қызмет ауқымы кеңейтілді. Инсульттік бөлімше ашылып, 650 миллион теңгеге МРТ аппаратымен жабдықтау жоспарланды. Алайда құрылғыларды орнату үшін ғимарат тапшылығы байқалды.
Осыған байланысты аудандық аурухана жанынан қосымша ғимарат салу туралы шешім қабылданып, дәл қазір бұл жерде құрылыс жұмыстарын «Дәнекер» ЖШС іске асыруда.
Және бір жаңалық – Денсаулық сақтау министрлігінің 2024-2025 жылдарға арналған медициналық көмекті жетілдіру жөніндегі Жол картасына сәйкес Шиелі аудандық көпбейінді орталық ауруханасында госпитальді фармация бөлімін де ашу жоспарлануда. Бұл бөлім дәрі-дәрмекпен қамтамасыз етудің тиімділігін арттырып, клиникалық фармакология қызметін жетілдіреді.
Жобалар аудан тұрғындарына қолжетімді әрі сапалы медициналық көмек көрсетуге бағытталған.
Мақсұт ИБРАШЕВ.
Шиелі ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
