Халқымыз ертеден бірлік, ынтымақ мәселесіне ерекше мән беріп, оны өмірдің өзегіне балаған. Оның мән-маңызын «ырыс алды – ынтымақ», «бірлік болмай тірлік болмас», «ынтымақ түбі – игілік» дейтін мақалдар арқылы жеткізген. Осылайша ағайынның ауызбірлігін, ауылдың ынтымағын, елдің тұтастығын басты орынға қойған. Бүгін де мемлекетіміздің өсіп-өркендеуінде халықтың ортақ мақсат-мүдделердің айналасына бірігуі, берекесі мен татулығы негізгі тірек болып отыр.
Бейбіт өмірдің тұғыры – бірлік. Татулықтың алтын арқауы – өзара түсіністік. Береке-бірлігіміздің ұйытқысына айналып, еліміздегі этносаралық достық пен бірліктің үлгісін әлемге танытқан Қазақстан халқы Ассамблеясының құрылғанына былтыр 30 жыл толды.
Бүгінде Сыр өңірінде түрлі этнос өкілдері тату-тәтті тіршілік кешуде. Қызылорда облыстық Қазақстан халқы Ассамблеясы – қоғамдық келісімнің темірқазығы. Нақтырақ айтсақ, аймақта 30-дан астам этнос өкілі тұрады. Олардың мәдениеті мен дәстүрін сақтап, дамытуға 11 этномәдени бірлестік ұйытқы болып отыр.
Жыл басында Қызылорда қаласында «Достық үйінің» жаңа ғимараты пайдалануға берілді. Заманауи үлгідегі зәулім ғимарат 3 миллиард 800 миллион теңгеге «Қазатомөнеркәсіп» ұлттық атом компаниясы» акционерлік қоғамының қолдауымен бой көтерді. Ғимаратта этномәдени бірлестіктердің, облыстық және қалалық ардагерлер кеңесінің, Азаматтық альянс өкілдерінің толық жабдықталған жұмыс кабинеттері орналасқан. Сонымен бірге 200 орындық концерт залы, 50 орындық акт залы, шығармашыл жастарға арналған домбыра, ән, би үйірмелері, медиация орталығы, музей және Ассамблея жанындағы ғылыми сарапшылық топтарға арналған кеңістіктер қарастырылған.
«Руханият орталықтары» мен «Қоғамдық келісім» кабинеттері әр ауданның рухани діңгегіне айналған. Бұл – тарихты жаңғырту мен болашақты біріктіру жолындағы алтын көпір.
Біздің басты құндылығымыз – бірлік, асыл мұратымыз – татулық.
– Бақ, қайда барасың?
– Ынтымаққа, – демекші, Сыр өңірі – бүгінде бірліктің, ынтымақтың, ырыстың айнасы. Ынтымағы жарасқан, бірлігі бекем елдің қай кезде де тұғыры биік, абыройы асқақ болары сөзсіз.
Айнұр БАТТАЛОВА,
«Сыр бойы»
