Кеше Жалағаш ауданының әкімі Қайратбек Сәрсенбаевтың халық алдындағы есепті кездесуі өтті. Оған облыс әкімінің орынбасары Наурызбай Байқадамов, бірқатар басқарма басшылары және аудан жұртшылығы қатысты.
Аудан әкімі өткен жылдың ең басты көрсеткіштеріне тоқталып, әсіресе инвестиция тарту бойынша қол жеткен жетістіктерді атап өтті. Инвестиция тарту көрсеткіші алдыңғы жылмен салыстырғанда 51,4 процентке өскен. Шағын және орта бизнеспен айналысушылар кәсіпкерлікті қолдауға бағытталған мемлекеттік және өңірлік бағдарламалар бойынша жеңілдетілген несие алып, мал, егін шаруашылығы, қызмет көрсету салаларын өркендеткен.
Өткен жылы күн электр станциясына жер бөлініп, құрылысы басталған еді. «Nomad Solar» ЖШС-ның жобасы алдағы ақпан айында пайдалануға беріледі. Сол кезде 15 адамға жұмыс көзі ашылып, электр станциясы жергілікті бюджетті жылына 120 млн теңгеге толықтырады.
Ауданға қарасты ауылдар ахуалын айтқанда, ең алдымен «Таң ЛТД» ЖШС-ның мемлекеттік-жекешелік әріптестік аясында салған спорт-сауықтыру кешені, Ақсу ауылындағы дәрігерлік амбулаторияның пайдалануға берілгені ойға оралады. Мұндай медициналық мекемелер Таң және Мырзабай ахун ауылында да бой көтерді.
Былтыр Жалағаш ауданы ауыл шаруашылығы саласында да нәтижелі жұмыс атқарып, «Алтын дән» мерекесінде «Үздік аудан» номинациясына ие болды. «Байқоңыр-инвест» форумында меморандумға қол қойылып, алдағы уақытта ауданнан бордақылау алаңын, ет өңдеу цехын, тыңайтқыш өңдеу зауытын салу туралы келісім жасалды.
Есепті кездесуде аудандағы құрылыс қарқыны, ауылдарды таза ауызсумен қамтамасыз етуге, жол жөндеуге қатысты атқарылған жұмыстар сараланды. Былтыр Аққыр, Жаңадария, Мақпалкөл ауылдарында ауызсу желілері жаңғыртылған. Бүгінде 25 шақырымға жуық жол жөндеуді қажет етіп тұр. Қаракеткен мен Таң ауылдарына кіреберіс жолдарды жөндеудің құжаттары сараптамадан өтті.
Сырдария ауданында орналасқан газ тарату станциясынан Жалағашқа магистральдық және кварталішілік газ желісін тарту үшін өткен жылы республикалық бюджеттен 1 млрд теңгеден астам қаржы бөлінген. Әлеуметтік нысандарды газдандырудың жоба-сметалық құжаттары әзірленді. Аудандық аурухана құрылысы жалғасуда.
Аудан тұрғындары медициналық қызмет сапасын жақсартуға, жол сапасына қатысты мәселелерді көтерді. Сондай-ақ аудандық музей және көпбалалы отбасыларға арналған көпқабатты үйлер салу туралы ұсыныстарын ортаға салды.
Кездесуде еңбек ардагерлері Қ.Жұбатыров, Қ.Кішкенбаев, Б.Төлегенқызы, А.Пірманов, Ж.Төремұратов сөз алып, аудан әкімінің жыл бойы атқарған жұмысына оң баға берді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
