ҚР Президенті Қасым-Жомарт Тоқаев Қызылорда облысына жұмыс сапары аясында аймақтың дамуын көзбен көріп, ел игілігіне бағытталған жобалардың жүзеге асу барысымен танысты.
Мемлекет басшысы жүзеге асырылып жатқан халықшыл бастамалар мен әлеуеті кең серпінді жобаларды, аймақтың әлеуметтік-экономикалық дамуы бағытында атқарылып жатқан ауқымды жұмыстарды жоғары бағалады.
Президентіміз зиялы қауым өкілдерімен кездесуде: «Облыс жалпы жақсы дамып келе жатыр. Қарқын бар, жоғары. Сондықтан әкімге ризашылығымды айттым. Бұдан әрі қарай да бірге жұмыс істей береміз» деп оң бағасын берді.
Мемлекет басшысының тікелей қолдауымен аймағымыз қарқынды даму жолында. Мысалы, кейінгі үш жылда негізгі макроэкономикалық көрсеткіштер бойынша республикада көш бастап тұр. Облыс әкімі Нұрлыбек Нәлібаевтың басшылығымен өңір экономикасына тартылатын инвестициялық түсімдердің жыл сайын еселеп артуы, құрылыс қарқынының өсуі, әлеуметтік-экономикалық, аграрлық және тағы басқа салалардағы жетістіктер өңіріміздің барлық бағытының нақты дамуын айқындайды.
Бюджет қаржысын тиімді пайдалану, әлеуметтік саладағы ауқымды істер, халықтың өмір сүру сапасын көтеру, ауылдың әлеуетін арттыру, елді мекендердің инфрақұрылымын жақсарту, мәдени-рухани жаңғыру, көркейту, абаттандыру және санитарлық тазалықты сақтау бағытындағы озық жұмыстар кеңінен насихатталып, үздік тәжірибе ретінде республиканың өзге өңірлеріне таратылып келеді.
Ерекше кездесуде болу бақыты бұйырған маған Президенттің «Ірі мегаполис Астана мен Алматыдан кейін жаңа кітапхана Қызылордада ашылады» деген қуанышты жаңалығы айрықша әсер етті. Сыр елінің шығармашылық адамдары мен қарымды қаламгерлерге бай өңір екенін ескерсек, бұл байыпты бастама зиялы ұлттың зерделі, зерек ұрпағына жасалған тамаша тарту болары сөзсіз.
Қасым-Жомарт Кемелұлы өз сөзінде жастардың дамуына аса мән беріп, оларды тәрбиелеу мен дұрыс бағыт көрсетудің маңыздылығын атап өтті. Тәрбие мен тәртіп жоқ жерде істің берекесі болмайды. Қазіргі заманда жас ұрпақтың бойына ұлттық құндылықтар мен дәстүрді сіңіре отырып, жаңа дәуір талабына бейімдеу – ең өзекті мәселе. Осыны атап өткен Президент мамандардың біліктілігін арттыру, адамзаттың мүмкіндігін кеңейтудегі жасанды интеллектті дамытуға ден қою қажеттігіне тоқталды. Оны тек ермек емес, игілік пен дамуға қызмет ететін құрал етуіміз керектігіне айрықша тоқталды.
Президенттің сөзінен әрбір азаматты ізгілікке, отаншылдық пен адалдыққа, тазалыққа үндейтін терең мағына сезілді.
Гүлшат МҰСАЕВА,
«AMANAT» партиясы Қызылорда қалалық филиалының атқарушы хатшысы,
облыстық мәслихат депутаты
