«Amanat» партиясының облыстық филиалы жанындағы партиялық бақылау комиссиясы мен сыбайлас жемқорлыққа қарсы іс-қимыл жөніндегі аймақтық кеңестің бірлескен отырысы өтті. Бұл туралы филиалдың баспасөз қызметі хабарлады.
Жиында жаңа оқу жылы мен жылу маусымына дайындық жайы қозғалды. Облыстық білім басқармасы басшысының орынбасары Ернат Алпысбаевтың айтуынша, биыл 17423 бала мектеп табалдырығын аттайды. Құжат қабылдау жұмысы 31 тамызға дейін жалғасады. Өңірде мектепке дейінгі 676 ұйым, 339 мектеп жұмыс істеп тұр.
– Қыркүйекке дейін Арал ауданының Сексеуіл кентінде, Қызылорда қаласының Арай шағын ауданында, Қызылжарма ауылдық округінде және қазан айында СПМК-70 шағын ауданында мектептер пайдалануға беріледі. Жаңа оқу жылында мектептерде 189 288 бала білім алады. Бұл өткен оқу жылымен салыстырғанда 4364 балаға көп. Қазіргі күні қалалық, аудандық білім бөлімдері оқушылар тізімін жасап, оқу-тәрбие процесін бастау үшін ұйымдастыру шараларын жүзеге асырып жатыр, – дейді ол.
Биыл 56 мектепті жөндеуге 1,6 млрд теңге бөлінді. Соның 53-де жоспарланған жұмыс аяқталды. Қалған 3 мектепті мердігерлер 25 тамызға дейін бітірмек.
Басқарма басшысының орынбасары оқушылардың қауіпсіздігі бағытында жасалып жатқан жұмыстарды да тілге тиек етті. Оның айтуынша, білім беру ұйымдары түгел қауіпсіздік жүйесімен қамтылған. Қала, аудан орталықтарындағы білім беру ұйымдары жедел басқару орталығына қосылған. Биыл жергілікті бюджеттен мектеп, балабақша, қосымша білім беру ұйымдарына қосымша 1 млрд 385 млн теңге қаржы бөлінді. 1 қыркүйекке дейін ондағы бейнебақылау жүйесі жаңартылады.
Облыстық энергетика және тұрғын-үй коммуналдық шаруашылығы басқармасы мәлімдегендей, алдағы жылу маусымына дайындық тұрақты бақылауда.
– Биыл жылумен қамту нысандарын жаңғыртуға 13,5 млрд теңге бағытталды. Қызылорда жылу-электр орталығының 3 бу қазандығын жаңғырту жұмысын аяқтауға Үкімет резервінен 2,5 млрд теңге, жергілікті бюджеттен 1,3 млрд теңге бөлінді. Өткен жылы химиялық су тазарту цехы мен насос қондырғылары ауыстырылды. Биыл 1 қазандық жеткізіліп, ол монтаждалып жатыр. Тамыз айының соңына дейін 2 қазандық жеткізілмек. Жұмыс жылу беру маусымына дейін аяқталады, – дейді аталған басқарманың бөлім басшысы Нұржан Мамбетияров.
Қызылорда жылу-электр орталығында жергілікті бюджет пен кәсіпорын қаржысы есебінен 1 генератор, 4 күштік трансформаторды жаңғырту, 10 бу қазандығы мен 21 автономды қазандықты жөндеу жоспарланған. Негізгі жылу орталығындағы №6 бу қазандығы, оңтүстік қазандықтағы №2 КЕ қазандығы және №2, 17, 18 автономды қазандықтарда, №3, 4 күштік трансформаторда, 35 кВ ашық тарату қондырғысына жөндеу жұмыстары жүргізілуде. Қазіргі таңда жөндеу жұмыстары 77 пайызға орындалған.
– Жылу желілерін жаңғырту бағытында бюджеттен 6 жобаны іске асыруға қаржы қаралған. Әзірге 4 жобаның 50 пайызы орындалды. Қазантаев, Желтоқсан көшелеріндегі жобалар бойынша материалдар толық жеткізіліп, құбырларды монтаждау жұмыстары басталды. Бұл нысандар жылу беру маусымына дейін аяқталады,– дейді басқарма өкілі.
Облыс орталығында салынып жатқан жаңа жылу-электр орталығының құрылысы бойынша өзекті мәселе жоқ. Айта кетейік, Қызылорда қаласында қуаттылығы 240 мегаватт электрэнергиясын құрайтын жаңа жылу-электр орталығының құрылысы жақын күндері аяқталып, қолданысқа беріледі.
Жиын соңында партия филиалының атқарушы хатшысы Ләйлә Төрешова әлеуметтік осал топтағы балаларды мектепке қажетті құрал-жабдықтармен, балалардың қауіпсіздігін қамтамасыз ету мақсатында жаяу жүргіншілерге арналған жол жолақтарын дұрыстау, мектеп оқушылары мен мұғалімдер арасында құқықтық сауаттылық пен құқықтық тәртіпті күшейтуге бағытталған жұмыстарды қолға алу, сонымен қатар жылу желілері бойынша облыста жүргізіліп жатқан жөндеу жұмыстары, соның ішінде Қызылорда қаласындағы жылу желілерінің тозу көрсеткішін азайту мақсатында атқарылып жатқан 6 жобаның уақытылы және сапалы аяқталуын қамтамасыз ету жөнінде ұсыныстарын ортаға салды.
Күн тәртібінде көтерілген мәселелер жан-жақты талқыланып, жауапты басқармаларға ұсыныстар берілді.
Назерке САНИЯЗОВА,
«Сыр бойы»
