Биылғы Қазақстан халқы Ассамблеясының ХХХІV сессиясы ерекше форматта ұйымдастырылып, мазмұны мен маңыздылығы жағынан айрықша жиын ретінде есте қалды. Секциялық отырыстар аясында қатысушыларға өз ойларын ашық айтып, қоғам үшін маңызды ұсыныстарын білдіруге мол мүмкіндік берілді. Бұл – демократиялық құндылықтарды нығайтып, азаматтық белсенділікті арттыруға бағытталған оң қадам.
Сессия барысында Ассамблеяның ел бірлігін сақтау мен нығайтудағы орны мен рөлі қозғалды. Сондай-ақ құрылымның қоғамдық келісімді қамтамасыз етудегі маңыздылығына Мемлекет басшысы айрықша тоқталды.
«Ассамблея – қоғамды ортақ мақсатқа жұмылдыру мен ұлттық бірегейлікті бекіту ісінде баламасы жоқ басты платформаға айналды және алдағы уақытта да солай болып қала бермек» деді Президент.
Бұл сөз – Ассамблеяның алдағы кезеңдегі жұмысының нақты бағдарын айқындайды. Құрылымның алдында үлкен жауапкершілік пен сенім жүктеліп отырғаны анық. Ұлттық мүдде, ел бірлігі, тұрақтылық пен татулық Қазақстанның табысты дамуының негізі болып қала бермек.
Сессия қорытындысы бойынша Ассамблеяның негізгі міндеттері мен жұмыс бағыттары нақтыланды. Бұл – елдің біртұтас рухани-мәдени кеңістігін қалыптастыруда маңызды рөл атқаратын жалпыхалықтық орган ретінде Ассамблеяның өз миссиясын абыроймен атқара беретінінің айғағы.
Дильфура БАЙРАХТАРОВА,
облыстық ҚХА төрағасының қоғамдық негіздегі орынбасары
