Облыста жол-көлік инфрақұрылымы қарқынды дамып келеді. Қазір қала көшелері кеңіген әрі тақтайдай тегіс жолда көлік ағыны реттеліп, тұрғындарға жайлылық сыйлауда. Ауылдар мен шет аймақтардағы жолдар да жаңалануда. Көпірлер мен өткелдер де қайта салынып, тұрғындар игілігін көруде.
Осы кезге дейін шаһардағы ірі көшелердің жөнделіп жатқанын көрдік. Бұл жұмыстар әлі де жалғасып жатыр. Осындай жұмыстың бірі М.Шоқай көшесінде атқарылуда.
Мердігер – «Қыран» ЖШС.
Қайнаған тіршілік. Алып техникалар өз қызметін атқаруда. Жол толық сүріліп, қайта төселуде. Құлақ тұнар шудан адамдар бірін-бірі естімейді. Тек шаруаларын тыңғылықты істеуде. Жалпы бұл көшенің бойында кәсіпкерлік, өндірістік нысандар көптеп орналасқан. Сондықтан жолдың жөнделгеніне кәсіп иелері дән риза. Құрылыс заттарын сататын шағын базарда жұмыс істейтін Олжас Таңатов бұл жолдың маңызы зор екенін айтты.
– Мұнда келушілер өте көп. Күнделікті қаншама көлік қатынайды. Осы бағытта ірілі-ұсақты өндірістер де бар. Жолдың жайы көңіл көншітпейтін еді. Ақ шаңы көтеріліп жататын. Жақында жөндеу жұмысы басталғанда қуанып қалдық, – дейді ол.
Ал құрылыстың жайын бізге аумақ басшысы Марат Серкешбаев баяндады. Жауапты маман жол жөндеу жұмыстарына тамыз айының басында кіріскенін айтты. Құрылысқа 60-қа жуық техника жұмылдырылған.
– Қазір М.Шоқай көшесінде күрделі жөндеу жұмысы жүруде. Бейбарыс Сұлтан тұйығынан А.Айдосов көшесі аралығы бұрын екі жолақты болса, қазір төрт жолақты етіп кеңейтілуде. Оның 700 метрі төрт жолақты болса, 1300 метрі екі жолақты болады. Оң жақ бөлігіне жаяу жүргіншілер жолы салынады. Оның ені екі метр. Сондай-ақ жарықтандыру жұмыстарын жүргіземіз. Ескі бағаналардың бәрі де жаңаға ауыстырылады. Бұл жұмысқа 2 тегістейтін техника, 3 бульдозер, 2 экскаватор, 3 каток, 2 үлкен дөңгелекті көлік және тасымалға байланысты 12 жүк көлігі қамтылған. Шикізаттың бәрі де өзімізден. Тек құм аралас тас Шалқиядан тасымалданады. Жұмыс таңертең 7-де басталып, кешкі 7-ге дейін жалғасады. Техниканың бәрі де соңғы үлгідегі, жаңа. Тыңғылықтың істің нәтижесінде межелі уақыттан бір ай бұрын тапсырамыз деп отырмыз. Осыған дейін біздің мекеме қаншама көшелер мен көпірлерді жөндеді. Сапасы жақсы. Жол сапасын зерттеу ортағылығымен бірлесіп жұмыс істейміз, – дейді ол.
Жолдың жөнделгені жұртшылықтың игілігі деген Бақытбек Пазылбеков мекемеде оператор болып жұмыс істейді. Әке жолын жалғаған ол трактор айдауды бала кезден бастапты.
– «Қыран» мекемесінде 19 жылдан бері еңбек етіп келемін. Мамандығым жол-көлік саласының қызметкерімін. Бастапқы кезде ауыр жүк көлігін айдадым. Қазір жол тегістейтін техниканы тізгіндеймін. Жолдың құрылысы басталғанда алғы шепте тұрамыз. Себебі ең бірінші топырақты тегістейтін осы құрылғы.
Көктемнен бастап тынымсыз жұмыс істеп келеміз. Қазір қала көшелерінің сапасы әлдеқайда жақсарды. Техниканың да мүмкіндігі мол, соңғы үлгідегі. Мәселен, мен айдайтын көлік автоматтандырылған. Мекеменің техникалық базасы жаңарған. Сол себепті жұмыс өнімді, – дейді ол.
Расында, техника автоматтандырылған, жұмыс күші толық болса істің жанданары сөзсіз. Қарапайым жұмысшы азаматтардың арқасында қаншама көше күрделі, орташа жөндеуден өтіп, өңірдің келбеті жаңаруда. Ал жаңару сенімді бекемдей береді.
Сара АДАЙБАЕВА,
«Сыр бойы»
