Сыбайлас жемқорлық – мемлекет дамуын тежейтін, қоғамдық сенімге нұқсан келтіретін ең өзекті мәселелердің бірі. Ел көлемінде бұл құбылысқа қарсы кешенді шаралар қабылданып, ашықтық пен әділдік қағидаттары нығайтылуда.
Сыбайлас жемқорлық – мемлекеттік басқару жүйесіндегі ең қауіпті әлеуметтік құбылыстардың бірі. Ол әкімшілік рәсімдердің тиімділігін төмендетіп қана қоймай, экономикалық өсімге айтарлықтай кері әсер етеді.
Мамандардың айтуынша, жемқорлық фактілері ең алдымен мемлекеттік органдарға деген сенімнің әлсіреуіне әкеледі. Заң үстемдігі сақталмаған ортада әлеуметтік теңсіздік күшейіп, бюджет қаражатының мақсатсыз жұмсалу қаупі артады. Мұндай жағдайлар қоғамдағы әділдік принциптерін бұзып, азаматтардың белсенділігіне теріс ықпал етеді. Мәселенің туындауына әсер ететін негізгі себептердің қатарында бақылау мен есептілік деңгейінің жеткіліксіздігі, ашықтықтың төмендігі, сыбайлас тәуекелдердің алдын алу жұмыстарының әлсіздігі және құқықтық мәдениеттің жеткілікті қалыптаспауы бар. Мемлекет тарапынан бұл бағытта жүйелі шаралар жүзеге асуда. Соның ішінде мемлекеттік қызметтердің цифрландырылуы, сатып алу процестері ашықтығының күшеюі, профилактикалық түсіндіру жұмыстарының артуы және мемлекеттік қызметшілерге қойылатын әдеп талаптарының күшеюі – жемқорлық тәуекелдерін едәуір қысқартты.
Азаматтық қоғам институттары мен бұқаралық ақпарат құралдарының рөлі де ерекше. Қоғамдық бақылаудың артуы, ашық талқылаулардың жиілеуі және азаматтардың құқықтық сауатының жақсаруы сыбайлас жемқорлыққа төзбеушілік мәдениетін қалыптастыруға негіз болуда.
Сыбайлас жемқорлықпен күрес – ел дамуының маңызды шарты. Әрбір азаматтың адалдығы мен белсенді азаматтық ұстанымы, сондай-ақ мемлекеттік органдардың ашық әрі жауапты жұмысы – әділетті қоғам құрудың негізі болып табылады.
Аслан НҰРЛЫБЕК,
Ауыл шаруашылығы
министрлігі Агроөнеркәсіптік кешендегі мемлекеттік
инспекция комитетінің
Қызылорда қалалық аумақтық инспекциясының басшысы
