Италияның Милан және Кортина-д’Ампеццо қалаларында өтіп жатқан XXV қысқы Олимпиада ойындарының ерлер арасында мәнерлеп сырғанаудан жекелей сында отандасымыз Михаил Шайдоров жеңіс тұғырынан көрінді. Ол қысқа бағдарламадағы 92.94 ұпай және еркін бағдарламадағы 198.64 ұпайды қосқанда 291.58 ұпаймен бірінші орын алды. Осылайша қысқы Олимпиада ойындарының чемпионы атанды.
Айта кетерлігі, бұл Қазақстан құрамасының 2026 жылғы қысқы Олимпиадасындағы алғашқы және қысқы Олимпиада тарихындағы екінші алтын медалі. Елімізден бұдан бұрын 1994 жылы шаңғы спортынан Владимир Смирнов мәре сызығын бірінші болып қиып, барша жұртты үлкен қуанышқа бөлеген еді. Сондай-ақ ел құрамасы қоржынына дүбірлі дода барысында араға 8 жыл салып жүлде түсті. Мәнерлеп сырғанау спортынан 2014 жылы Денис Тен Сочиде қола жүлдегер болды.
Отандасымыз «Confessa» және «The Diva Dance» әнін таңдады. Сонымен қатар, Михаил алғашқы техникалық элементке үштік аксель, бір эйлер және төрттік сальхау жасап, сәтті орындап шықты.
Михаил Шайдоров 2004 жылы 25 маусымда Алматы қаласында дүниеге келген. Отандасымыз 2022 жылы жасөспірімдер арасындағы Әлем чемпионатында күміс алды.
Ол үшін өткен жыл табысты болды. АҚШ-тың Бостон қаласында ересектер арасындағы Әлем чемпионатында күміс алса, төрт құрлық чемпионатында жеңіс тұғырынан көрінді. Ал Харбиндегі Азия ойындарында отандасымыз үздік үштікті түйіндеді.
Мәнерлеп сырғанаудан 2026 жылғы қысқы Олимпиада чемпионы Михаил Шайдоров өзіне қолдау білдірген барша отандастарына алғыс білдірді. Бұл жөнінде спортшы өзінің әлеуметтік желідегі парақшасында бейнежазба жариялады.
– Маған қолдау білдірген барша отандастарыма ризашылығымды жеткізгім келеді. Сондай-ақ біздің дайындығымызға ерекше қолдау көрсеткен Мемлекет басшысына алғыс айтамын. Еліміздің мәнерлеп сырғанау федерациясының президенті Бауыржан Ералы кейінгі жылдары үлкен еңбек сіңірді. Менің жарысқа қатысуым барысында трибуна және көгілдір экран арқылы қолдау көрсеткен барша қазақстандықтар мен жанкүйерлерге ризашылығымды жеткізгім келеді, – деді Михаил Шайдоров.
Әлемге белгілі әнші Димаш Құдайберген қалың елдің қошеметіне бөленген Михаилға өз атынан автокөлік сыйласа, қазақстандық кәсіпкерлер оған үш бөлмелі пәтер мен әкесіне автокөлік сыйлайтынын жария етті.
«Altimus» чемпион атанды
Қызылорда қаласындағы «Еуразия» спорт кешенінде ауған соғысының ардагері Батыржан Шалғымбаевты еске алуға арналған футзалдан турнир мәресіне жетті. Биыл отызыншы мәрте жалауын көтерген жарысқа көптеген команда қатысты.
Жарыс барысында командалар алдымен топтық кезеңде сынға түсті. Әрбір топтан үздік шыққаны жарысты жалғастыруға мүмкіндік алды. Бұл турнирде «Altimus» командасы бірінші орынды еншіледі. Екінші орынға «Кентау» командасы ие болса, «Адам-Арафат» үздік үштікті түйіндеді.
Әділжан ҮМБЕТ,
«Сыр бойы»
