Кеше облыс әкімі Нұрлыбек Нәлібаев облыс активімен бірге өңірге жұмыс сапарымен келген ҚР Мемлекеттік қызмет істері агенттігінің төрағасы Дархан Жазықбаймен кездесті.
Кездесуге Парламент Сенатының депутаты Наурызбай Байқадамов, Президент жанындағы Мемлекеттік басқару академиясының ректоры Азамат Жолманов, зиялы қауым өкілдері қатысты.
Облыс әкімі өңір халқы Президент пен Үкіметтің барлық бастамаларын қолдайтынын айтып, мемлекеттік қызметтің тиімділігін арттыру бағытында атқарылған жұмыстарды атап өтті.
– Мемлекеттік қызметші – еліміздің өсіп-өркендеуіне үлес қосатын, қоғамда адалдық пен әділеттіліктің үлгісін көрсететін халықтың айнасы. Жауапкершілігі жоғары салада өздеріңізге жүктелген міндет пен жоғары сенімді ақтауда бар күш-жігерлеріңіз бен білімдеріңізді арнап, ел-халыққа адал қызмет ете беруге шақырамын, – деді аймақ басшысы.
Актив отырысында Дархан Жазықбай мемлекеттік қызметті дамыту, кәсібилендіру, іріктеу процестерін жетілдіру, қызметтің сервистілік және клиентке бағдарлану қағидаттарына негізделген моделін қалыптастыру бағытындағы кешенді шаралар туралы айтты.
– Мемлекеттік қызмет саласындағы ашықтық, әділеттік және әрбір азамат үшін тең мүмкіндіктерді қамтамасыз етуге қатысты өзгерістер енгізілуде. Өткен жылы Президент Жарлығымен мемлекеттік қызметті дамытудың 2024-2029 жылдарға арналған тұжырымдамасы» бекітілді. Онда мемлекеттік қызметшілердің жұмыс тәсілін өзгертіп, бұл қызметтің жаңаша өріс алуына мүмкіндік тудырды, – деді ол.
Агенттік төрағасының айтуынша, енгізілген өзгерістер бірқатар ілгерілеуге негіз болып отыр. Мәселен, басқарма басшысын тағайындау үшін 2023 жылға дейінгі заңда тек мемлекеттік қызметте 7 жыл өтілі немесе екі жыл басшы лауазымда болуы керек-ті. Бұл жеке сектордан білімді, білікті мамандардың келуін шектеді. Енді бұндай талап қойылмайды, білімі мен жұмыс істеген саласындағы жұмыс өтілі қарастырылады. Соның нәтижесінде бір жарым жылда 800-ден аса адам жеке сектордан мемлекеттік қызметтің басшы лауазымына келген. Оның ішінде құрылысшы, ветеринарлық, санитарлық, тағы басқа қажетті мамандардың келуіне жол ашқан.
– Біз тұжырымдаманы іске асыру барысында мемлекеттік қызмет туралы жаңа заңды әзірледік. Ол мемлекеттік қызметтің талаптарын жаңаша айқындайтын болады. Бұған дейін бұл саланың миссиясы анықталмаған болатын. Ал жаңа заң қазіргідей тек еңбек қатынастарын, яғни мемлекеттік қызметке кіру, өткеру және тоқтату мәселелерін реттеумен шектелмей, ең бастысы мінез-құлқының адамға бағдарланған үлгісін бекітуді көздеп отырмыз. Бұл 10 баптан тұрады. Заң жобасында мемлекеттік қызметшілердің кәсібилігі, олардың әдеп нормаларына сай болуын, адамгерлік қасиеттерін, сондай-ақ мемлекеттік және қоғамдық мүдделерге адалдығын қамтамасыз етуге бағытталған мінсіз бедел институтын енгізу көзделген. Мемлекеттік қызметшілерді басшы лауазымға тағайындаған кезде ол туралы БАҚ-тағы сыни пікірлер мен жүріп өткен жолы ескеріледі. Сонымен қатар мемлекет пен қоғамның мүддесін қорғау қажеттігі туындаған жағдайда қаймықпай басқарушылық шешімді қабылдауға мүмкіндік беретін нормалар қарастырылуда. Көптеген ситуациялық жағдайлар болады. Мәселен, адам өміріне қауіпті су тасқыны, тағы басқа жағдайда аудан немесе облыс әкімдері жауапкершілік ала отырып, қауіпті жағдайдың алдын алса, онда ол жауапкершілікке тартылмайды, – деді агенттік төрағасы.
Жаңа өзгеріске сәйкес, қызметшілердің мансаптық өсуі қайта қаралады. Бүгінде даму мүмкіндігінің болмауына байланысты әрбір төртінші маман бір орында 6 жылдан астам жұмыс істейді. Нәтижесінде олардың жартысынан астамы қызметін ауыстырады. Осыған байланысты белгілі лауазымды сыныптарға бөлу арқылы көлденең ілгерілеу енгізілуде. Олардың жалақысы көтерілу үшін вертикалдық тұрғыда лауазым өсу қажет еді. Ал тұрақтылық аппаратын қалыптастыру үшін осы тәсіл қолданылмақ.
Осы кездесуден кейін Әдеп жөніндегі уәкілдердің республикалық форумы өтті. Форум жұмысына аймақтың жауапты сала басшылары, агенттік қызметкерлері, орталық мемлекеттік органдар мен өңірлердің, қала, аудан әкімі аппараттарының, облыстағы мемлекеттік органдардың әдеп жөніндегі уәкілдері, әдеп жөніндегі кеңес мүшелері, зиялы қауым өкілдері қатысты.
Облыс әкімі Н.Нәлібаев аймақтың әлеуметтік-экономикалық дамуындағы жетістіктерді атап өтіп, форум жұмысына сәттілік тіледі.
– Аймақтың әлеуметтік-экономикалық дамуында оң тенденция қалыптасты. Өңіріміз негізгі макроэкономикалық көрсеткіштер бойынша республикада алғашқы орындарда. Мемлекет басшысы «Әділетті Қазақстанды құру үшін әрбір қызметшінің отаншыл, адал болуы және өз ісіне жауапкершілікпен қарауы өте маңызды» деп атап өткен болатын. Халықтың әл-ауқатын арттыруға бағытталған ұлттық жобаларды жүзеге асыруда, қоғамдық-саяси ахуалдың тұрақтылығын қамтамасыз етуде маңызды рөлді мемлекеттік қызметшілер институты атқаруда.
Агенттік мемлекеттік қызметтің сервистілік, клиентке бағдарлану қағидаттарына негізделген моделін қалыптастыру, кәсібилендіру, билік институттарын дамыту бағытындағы жұмыстарға бастамашы болып келеді. Бүгінгі жиынның маңыздылығын ескеріп, форум барысында тиімді ұсыныстар мен байыпты бастамалар талқыланатынына сенімдімін, – деді облыс әкімі.
Д.Жазықбай мемлекетке қызмет ету – ең құрметті әрі аса жауапты міндет екенін айтып, маңызды бастамаларға тоқталды.
– Барлық құзырлы органдар арасында ортақ көзқарас пен ұстаным болуға тиіс. Бұл – ешқандай құқықбұзушылыққа жол бермеу, яғни, кез келген заңсыздыққа қарсы тұру деген ұстаным. Мемлекет басшысының бастамаларын сапалы жүзеге асыруда мемлекеттік қызметшілер шешуші рөл атқарады, – деді агенттік төрағасы.
Форум жұмысында Әдеп жөніндегі уәкілдің міндеттері, оған қойылатын талап пен құқықтары да айтылды. Себебі, кейінгі кезде оны бір жылдың ішінде екі рет ауыстырып жатқан мемлекеттік органдар бар. Енді Әдеп жөніндегі уәкіл агенттіктің тікелей қарамағында болмақ. Олар іс сапарға жіберіліп, профилактикалық жұмыстарды тергеп-тексеруде ықпалы артады.
Сонымен қатар, жаңартылған ант мәтінін талдаудың маңызы да басқосуда талқыланды. Бұл заң алдындағы уәде емес, ар алдындағы серт екенін есте сақтау керек.
Жиында Н.Байқадамов «Мемлекеттік қызметшілерді адамдардың құқыққа қайшы әрекеттерінен қорғау», А.Жолманов «Мемлекеттік қызметтің құндылықтары: Антқа адалдық» тақырыбында баяндама жасады.
Сыр өңірінің әлеуметтік-экономикалық дамуы жолында елеулі еңбек еткен ардагерлерге ҚР Мемлекеттік қызмет істері агенттігінің «Мемлекеттік қызмет ардагері» төсбелгісі табысталды.
ондай-ақ аймақтың өркендеуі жолында елеулі еңбек еткен мемлекеттік қызметкерлер ҚР Мемлекеттік қызмет істері агенттігінің «Үздік сапалы мемлекеттік қызмет көрсетуші» грамотасымен, агенттік төрағасының Алғыс хатымен марапатталды.
Басқосудың екінші бөлімінде мемлекеттік қызметшілердің Әдеп кодексіне өзгерістер мен толықтырулар енгізу, профилактика қызметі туралы мәселелер талқыланған панельдік сессия өтіп, Әдеп жөніндегі уәкілдердің өткен жылғы және бірінші жартыжылдықтағы жұмыс нәтижелеріне жасалған талдау қорытындыланды.
Форум қонақтары мемлекеттік қызмет істері агенттігінің облыс бойынша департаменті, Президент жанындағы мемлекеттік басқару академия филиалының ұжымымен, өңірлік кадр резервінің мүшелерімен, студенттермен және жас мемлекеттік қызметшілер мектебінің тыңдаушыларымен кездесті.
Айсәуле ҚАРАПАЕВА,
«Сыр бойы»
