Ұлыстың ұлы күні қарсаңында облыс әкімі Нұрлыбек Нәлібаевтың қатысуымен облыс орталығында қайта салынған Президент саябағы салтанатты түрде ашылды. Іс-шараға құқық қорғау органдарының бірінші басшылары, мәслихат депутаттары, зиялы қауым өкілдері, барлық ауданнан келген делегаттар арнайы қатысты. Бір жыл көлемінде қайта салынған саябақта жұртшылық та көп.
Облыс басшысы қала тұрғындары мен қонақтарды саябақтың ашылуымен құттықтап, өңірде «Таза Қазақстан» жалпыұлттық жобасы аясында атқарылған жұмыстарды атап өтті.
– Президентіміз Қасым-Жомарт Кемелұлы «Туған жерімізді ешкім сырттан келіп тазалап, көркейтіп бермейді. Отанымызды таза ұстау – әр азаматтың қастерлі парызы» деген болатын. «Таза Қазақстан» жалпыұлттық жобасы тұрғындар арасында тазалық мәдениетін кеңінен насихаттауға, туған жерімізді көркейтуге тың серпін берді. Жоба аясында санитарлық тазалық, абаттандыру, тұрғындардың өмір сүруіне қолайлы жағдай жасауда кешенді жұмыстар атқарылуда. Бюджет қаражатынан бөлек, кәсіпкерлердің демеушілігімен орталық алаңдар, демалыс орындары, ойын, спорт алаңдары қайта жаңғыртылып, тұрғын үйлер мен әлеуметтік нысандар заманауи үлгіде жөндеуден өткізіліп келеді.
Өңірде біркелкі дизайн-код бекітіліп, облыс орталығынан бастап барлық елді мекендер бірегей архитектуралық талаптарға сәйкестендірілді. Қызылорда қаласында 2 млрд 905 млн теңгеге 83 ескі көпқабатты тұрғын үйдің қасбеттері заманауи панельдермен қапталды. Биыл да бұл жалғасын тауып, 900 млн теңгеге қосымша 21 тұрғын үй жаңғыртылуда. Өткен жылы 1 млрд 300 млн теңгеге 20 көпқабатты тұрғын үйдің аулаларына балалар ойын және спорт алаңдары салынып, абаттандырылды. Облыс орталығында жаңа нысандар бой көтеріп, жасыл желек пен саябақ саны көбейіп, озық сәулет үлгісі қалыптасуда. Өскелең ұрпақ үшін таза, жайлы әрі қауіпсіз орта құру алдағы уақытта да жалғасады.
«Таза Қазақстан» жалпыұлттық жобасы аясындағы акцияларға, табиғат қорғау шараларына жастар мен қоғам белсенділері қатысып, үлес қосуда.
Саябақты сапалы етіп қайта салған «Алем Құрылыс» компаниясының ұжымына Сыр жұртшылығының, өз атымнан шынайы алғысымды білдіремін. Егемен елімізді көркейту жолындағы істеріміз табысты болсын! – деді облыс әкімі.
Мұнан соң Президент паркіндегі жұмыстарды сапалы атқарған мердігер мекеме өкілдері мен экологиялық акцияларға белсенді атсалысқан еріктілер облыс әкімінің Алғыс хатымен марапатталды. Қоғам қайраткері Жарылқасын Шәріпов ізгі лебізін білдірді.
Бұған дейін газетімізде жазғанымыздай, жаңа саябақ аумағында заманауи субұрқақтар, амфитеатр, спорт, ойын, би, шахмат, баскетбол, футбол алаңдары, биіктігі 50 метрлік айналмалы шолу дөңгелегі, велосипед және жүгіру жолақтары, санитарлық пункттер орнатылған. Сондай-ақ 31 гектарға 2 мыңнан астам ағаш, 50 мыңнан астам сәндік бұта және 17 түрлі көпжылдық гүл егілді.
Құрылыс жүргізуші компанияның мәліметінше, саябақта дария арнасынан тартылатын үш арнайы су қоймасы дайындалған. Әрқайсысы 500 текше метр болатын қоймадағы су тек саябақ ішіндегі барлық өсімдік пен тал-теректерді суаруға арналған. Екіншіден, тұрғындардың қауіпсіздігіне қатысты түнгі жарықтандыру шамдары мен бейнебақылау камералары бар.
– Облыс әкімінің қолдауымен біз бұған дейін қаладағы жаңа ғимараттарды аралап, мәдени нысандармен таныстық. Барлық ауданнан келген ардагерлер мен ел ағалары күні бойы шаһарды аралады, – дейді Шиелі ауданының Құрметті азаматы Әшім Оразбекұлы. – Әсіресе, жұмысшы мамандықтарды қолдауға арналған республикадағы алғашқы «Құзыреттілік орталығына» өз басым сүйсіндім. Еңбек адамдарына деген құрмет осындай болса керек. Расы сол, кейінгі үш-төрт жылда біздің Сыр өңірі, Қызылорда қаласы мүлде басқа кейіпке енді. Халықтың қай тобына да керек барлық әлеуметтік-мәдени ғимараттар толық жаңартылды. Ал жол инфрақұрылымы, газ тарту құрылысында біз өзге өңірлерге үлгі екеніміз анық. Сондай-ақ жаңа баспана салу, тұрғын үй санын арттыруда көрсеткішіміз көп. Бұл – нағыз мақтанарлық жұмыс. Екіншіден, мұндай өзгеріс барлық аудандарда жүзеге асуда. Біздің тілегіміз – облыстың дамуы осы сәтті қадамынан таймаса екен. Аймақ басшысының алдағы жоспарларына сәттілік тілеймін.
Айтпақшы, саябақ аумағын тиімді пайдалану мақсатында бірқатар ірі жоба қолға алынған болатын. Қазір мұнда 300 орындық заманауи балалар лагері, Ботаникалық білім беру орталығы, тоғыз қабатты 15 тұрғын үйдің құрылысы қарқынды жүріп жатыр. Сонымен қатар, 200 төсектік жаңа перинаталдық орталық салу жұмысы да басталып кетті. Ал жақын арада көлемі 5,5 гектар жерге Мемлекет басшысының тапсырмасымен жаңа драма театр және заманауи Президенттік кітапхананың құрылысы басталмақ.
Ержан ҚОЖАС,
«Сыр бойы»
Суретті түсірген Б.ЕСЖАНОВ,
Н.НҰРЖАУБАЙ
