Қазіргі уақыт өлшемімен қарасақ, әрбір ұстаздың жетістікке жетуіне бірнеше жылдың қажеті жоқ, бастысы білім нәрін шәкірт бойына дарыта білетін шынайы қабілет керек. Бұлай айтуымыздың себебі, Сырдария ауданына қарасты Аманкелді ауылындағы Қ.Баймағанбетов атындағы №42 мектеп-лицейінің химия пәні мұғалімі Піржан Төлегеннің мұғалімдікке келгеніне 5 жыл ғана болған. Ол осы аз ғана уақыт ішінде қаншама кәсіби байқауларда жеңімпаз атанды.
Атап айтар болсақ, ол облыстық «Үздік жас маман – 2022» байқауы, «Жаңа мектепке – жаңашыл ұстаз», «Дарынды балаларға талантты ұстаз», «Педагогикалық идеялар фестивалі – 2024», «Педагогикалық идеялар понарамасы» байқауларының республикалық кезеңінің жүлдегері. Қазақстан бойынша «ТОП-10» жас ұстаздың қатарына енген. Сырдария ауданы бойынша «Жыл үздігі-2023», республика бойынша «Energizer ұстаз» номинациясы, Сырдария ауданы әкімінің «Өрлеу» жастар сыйлығының иегері. Біліктілік санаты: педагог-зерттеуші.
ҚР Оқу-ағарту министрлігі Ы.Алтынсарин атындағы Ұлттық білім академиясының «Ауыл мектептері педагогтерінің озық тәжірибелерін тарату бойынша әдістемелік ұсынымдар» жинағында тәжірибесі таратылған. Білікті ұстаз Оқу-ағарту министрімен бірнеше мәрте кездесуде болып, тақырыптық тренингтерге қатысқан.
Білуімізше, өзге пәндермен салыстырғанда, химия пәні әлдеқайда күрделі. Десек те жас ұстаздың шәкірттері жыл сайын пәндік олимпиадаларда жүлделі орындардан көрініп жүр. Сонымен қатар ҰБТ-ға дайындаған оқушылары медицина және химия пәні мұғалімі мамандығына 100 пайыз грантқа түсуде.
Айталық, 2023-2024 оқу жылында Жұбатқан Нұржайна, Есіркепқызы Ақжан, Ғабитқызы Фарида, Тыным Сабина, Жарылқасын Кәусар есімді оқушылар жалпы білім беретін пәндер бойынша олимпиада жеңімпаздары атанса, 2025 оқу жылында Жарылқасын Кәусар «Ауыл мектептерінің оқушыларына арналған жалпы білім беретін пәндер бойынша республикалық олимпиаданың» республикалық кезеңінде I орын алып, алтын жүлде иеленді. Сондай-ақ Қайраддин Жәния «Жаратылыстану-математика бағытындағы пәндер бойынша 7-8 сыныптар арасында республикалық жасөспірімдер олимпиадасының» облыстық кезеңінің III орын иегері, Жаханша Бақдәулет – «IQanat» олимпиадасының жеңімпазы, грант иегері атанды.
Қазіргі заман талабы өте қарқынды әрі күрделі. Ақпараттық технологияның жаңа мүмкіндіктері дендеп еніп жатыр. Кейбір салада адам еңбегін ЖИ алмастыра бастады. Сондықтан жас ұрпаққа білім мен тәрбие беру ісінің де жауапкершілігі еселеп арта түсті. Осы тұрғыдан қарасақ, Піржан Ержанұлы сынды өз саласының білікті маманы, шәкірт жүрегіне жол таба білген шығармашыл ұстаздың еңбегі қандай құрметке де лайық!
Ғазиза ӘБІЛДА,
«Сыр бойы»
