Сыр бойында айна өндіріле бастады. Бұл еліміздегі алғашқы зауыт. Осы кезге дейін өнім сыртқы елдерден тасымалданып келді. Сондықтан Қызылордадан ашылған зауыт импортқа тәуелділікті азайтып, отандық өнімнің өрісін кеңейтеді.
Жобаның жалпы құны – 1,5 млрд теңге. Оның 1 млрд теңгесіне қажетті құрал-жабдықтар сатып алынса, қалған қаражатқа құрылыс жұмысы жүргізілген. Қуанарлық жайт, зауыт былтырғы жылдың аяғында алғашқы өнімін шығарып, саудалады. Жылдық қуаттылығы 720 мың шаршы метр. Өнім ішкі нарықты және ТМД елдерін қамтитын болады.
Жоба 2023 жылы бірыңғай индустрияландыру картасына енгізіліп, индустриялық аймақтан жер телімі бөлінді. Шикізатпен қамтамасыз ету үшін «Orda Glass» шыны зауытымен келісімшарт жасалды. Қазір зауытта 30 адам еңбек етеді. Өндіріс толық қуатына жеткенде адам саны 60-қа дейін жетеді.
Зауыт құрылысы 2024 жылдың аяғында басталған. Заман талабына сай бой көтерген нысан толық автоматтандырылған әрі жұмысшыларға да жағдай қарастырылған. Біз мұны көзбен көріп, көңілге тоқып қайттық.
Алып зауыт. Жұмыс қайнап жатыр. Техникалар үздіксіз жұмыс жасауда. Қапталған әйнектер өңдеу процесіне жіберілуде. Әр қызметкер ісін тыңғылықты атқаруда. Бізде өз кезегімізде, шынының қалай айнаға айналатынына куә болдық.
Қызық. Күнделікті қолданыстағы айнаның осыншама еңбекпен, технологиямен дайындалатынын көріп, таңырқай қарадық. Бастысы, өңірдің әлеуетін көтеретін осындай жобаның іске асырылып жатқаны көңіл қуантты.
Одан әрі зауыт басшысы Айжан Өмірзақова өндіріс процесі, өнім түрлері, технологиялық мүмкіндіктері мен экспорттық әлеуеті туралы кеңінен айтып берді.
– Бастапқы кезде өзге елдердің өндірісін зерттеп көрдік. Нәтижесінде роботты құрылғыларды өндіруде көш бастап тұрған Қытай зауытына тоқталдық. Бұл технология танымал бренд. Әлемнің озық елдері қолданысқа енгізген. Біз қолданып отырған автоматтандырылған технологияның мүмкіндігі зор. Былтыр екі ел арасында келісімшарт жасалып, арнайы мамандар келді. Олар 3 ай бойы технологияны орнатып, монтаждау жұмыстарын жүргізді. Жергілікті мамандарға тілін үйретіп, жұмыс істеу процесін көрсетті. Әлі де ол мамандармен тығыз байланыстамыз. Себебі біздің жұмысшыларға үйретуде. Бұл құрылғылар жылдық қуаттылықты екі есе орындауға қауқарлы.
Өндіріс орнын «Өнеркәсіпті дамыту қоры» қаржыландырып, облыс әкімдігі өндірістік аймақтан дайын инфрақұрылыммен 3,6 гектар жер бөлді. Жергілікті билік пен даму институтының осындай қолдауының арқасында елімізде айна өндірісі басталды. Былтырғы жылдың қараша айынан бастап, алғашқы айналарды саудаға шығардық. Қазір өнімді Алматы, Шымкент, Түркістан облысына және жергілікті кәсіпкерлерге өткіземіз. Алдағы уақытта өзге өңірлерге және сырт елдерге саудаға шығару жоспарда тұр, – дейді зауыт басшысы.
Енді жұмыс процесіне тоқталсақ, алдымен жартылай дайын өнім жүк көліктерімен жеткізіледі. Оны жинап, қорабынан алынады. Одан әрі жылжымалы лентаға орналастырылады. Робот атқарады. Автоматтандырылған желінің ұзындығы 176 метр. Жалпы зауыттың ішкі аумағы 6 мың квадрат метрді құрайды. Күніне 15-16 қорап, яғни 3300 квадрат метр айна дайындалады.
Осылайша әйнек лента арқылы сырғып бірнеше кезеңнен өтеді. Бірінші жуылады, тазартылады. Оған фильтрленген су қолданылады. Өйткені шыны бетінде мүлде шаң-тозаң болмауы тиіс. Жуылған шыны кептіріліп, вакуумдық камераға жіберіледі. Бұл жерде әйнек айнаға айнала бастайды. Одан әрі пеш камерасына өтіп, тағы екі қабат бояу жағылады. Қажет бояуларды Шымкент қаласынан алдырады. Айнаға бояу жағылғаннан кейін тағы бір рет жуылады. Одан кейін кептіріліп, робот жинайды. Міне, бас-аяғы 38 минут ішінде бір қаптамадағы әйнектер айнаға айналып, дайын өнім шығады. Бұл процесті операторлар басқарып тұрады. Әр айнаға зауыттың аты, белгісі шыққан күні, сағаты да жазылады. Егер айна дайындалу барысында қандай да бір ақау кетсе, дер кезінде алынып тасталады.
Қазір мұнда жұмысшылар бір ауысым бойынша жұмыс істейді. Алдағы уақытта адам саны көбейген кезде екі-үш ауысым болады екен. Айна негізінен құрылысқа, жиһаз өнімдеріне кеңінен қолданылады. Сол себепті көбіне жиһаз өндіретін кәсіпкерлерден сұраныс жоғары. Бағасы нарыққа енді шығып жатқандықтан қалтаға қонымды. Сырт елдерге қарағанда әлдеқайда төмен. Транспорт жағы да қарастырылуда. Себебі жеткізіп беру қызметін де ұсынбақ. Әзірге тапсырыс берушілер кейде өздері алып кетсе, кейде өндіріс орны жеткізіп береді.
Біз барғанда жылжымалы лентада кезекті тапсырыс орындалып жатты. Ол Шымкент қаласынан түсіпті. Мамандар тапсырыстың уақытылы әрі сапалы орындалуын барынша қадағалап жүр.
Айна дұрыс шықпай қалған жағдайда қайта өңдеуге келмейді. Бірақ оны арзан бағаға саудалап, өзге де қажеттілікке жаратады. Мамандардың бәрі де жергілікті тұрғындар екен.
– Бұл салада жүргенімізге жиырма жылға жуықтады. Бұған дейін «Комфорт 1KZ » ЖШС құрдық. Ол облыстағы шыңдалған әйнек шығаратын бірегей зауыт. Әйнектен энергия үнемдейтін және жарық шағылыстыратын қасиеті бар қос қабат терезелер мен айна жасайды. Сондай-ақ витрина, кабина, шатыр, жиһаз, мөлдір баспалдақ, қалқа сияқты көптеген интерьер заттар шығарады. Былтыр жаңадан салынған стадионға қажетті әйнекті осы «Комфорт 1KZ» ЖШС-нан алды.
Тәжірибеміз бар болған соң, айна өндірісіне келдік. Қазір технологияның мүмкіндігі мол. Бәрі де автоматтандырылған. Енді тұтынушыларды тарту мақсатында тиісті шаралар жүргізілуде. Зауыт биылғы жылдың жарты жылдығында ресми түрде ашылады. Дегенмен 100 пайыз жұмыс істеп тұр. Енді тек мекеме аумағында бірқатар жұмыс қалды. Ол жұмысшылардың жағдайын жасау үшін асхана желісін іске қосу сынды.
Бұдан бөлек алда жоспар көп. Мәселен түрлі-түсті айна шығаруды көздеп отырмыз, – дейді Айжан Өмірзақова.
Әрине оңай жұмыс емес. Заманауи технологиялардың тілін меңгеру, оны тиімді басқару да ұқыптылықты, жауапкершілікті талап етеді.
Мемлекет басшысының тапсырмаларын жүзеге асыру шеңберінде экономиканы индустриялық дамыту және әртараптандыру бойынша жұмыстар жүргізілуде. Былтыр елімізде 33 жаңа өнеркәсіптік кәсіпорын пайдалануға берілген. Жаңа нысандар еліміздің әртүрлі аймағында орналасқан. Солардың қатарында «AynaGlass» ЖШС да бар.
Жаңа өндірістердің іске қосылуы экономиканы әртараптандыруға, өңірлерді дамытуға және елдің өнеркәсіптік базасын нығайтуға маңызды үлес қосатыны сөзсіз. Ал әрбір жоба жаңа жұмыс орны.
Сара АДАЙБАЕВА,
Сыр бойы
