Жаңа жылдың алғашқы жұмыс күнінде облыс орталығында тағы бір әсем, заманауи ғимарат ашылды. «Достық үйінің» жаңа ғимаратының салтанатты ашылуына облыс әкімі Нұрлыбек Нәлібаев, Қазақстан халқы ассамблеясы төрағасының орынбасары, Президент әкімшілігі Қазақстан халқы ассамблеясы хатшылығының меңгерушісі Марат Әзілханов, ҚР Парламенті Сенатының депутаттары Руслан Рүстемов, Наурызбай Байқадамов, Мәжіліс депутаттары Мұрат Әбенов, Мархабат Жайымбетов, Мұрат Ергешбаев, Аян Зейнуллин, «ҚазАтомӨнеркәсіп» ҰАК» АҚ басқарма төрағасы Мейіржан Юсупов, «Samruk-Kazyna Trust» қорының бас директоры Альфия Адиева және құқық қорғау органдарының бірінші басшылары мен зиялы қауым өкілдері қатысты.
Шарада аймақ басшысы, облыстық ассамблея төрағасы Нұрлыбек Нәлібаев «Достық үйі» ел бірлігінің нығаюына септігін тигізетінін айтып, ғимаратты салуға демеушілік көрсеткен компания өкілдеріне алғыс білдірді.
– Өткен жыл еліміз үшін де, өңір үшін де толайым табыстарға толы мерекелі, мерейлі жыл болды. Қызылорда қаласының астана болғанына 100 жыл толуын жоғары деңгейде атап өттік. Мемлекет басшысы Қасым-Жомарт Тоқаевтың облысқа арнайы іссапармен келуі – тарихи оқиғалардың бірі.
Кейінгі үш жылда өңірде 200-ге жуық әлеуметтік нысан салынып, ел игілігіне қызмет етуде. Президенттің «Қазақстан жаңғырудың жаңа кезеңіне қадам басты» тақырыбындағы мақаласында айтылған үлкен мәселелердің бірі – қазіргі жылу-электр орталықтарының жайы. Сондай орталық өткен жылдың аяғында облыста іске қосылды. Бұрын электр энергиясын сырттан алатын болсақ, қазір өзге өңірлерге сатуға мүмкіндік туды. Мұндай жаңа инфрақұрылымдық жобалар алдағы уақытта да жалғасады.
Мемлекет басшысы өңірлерде «Достық үйін» салудың маңызды екенін айтқан болатын. Бұл ғимарат Мемлекет басшысының тапсырмасымен Қазақстан халқы ассамблеясының 30 жылдығына орай салынды. Оған қолдау білдірген, қаражат бөлген «ҚазАтомӨөнеркәсіп» және «Самұрық-Қазына» компанияларының басшыларына ризашылығымды білдіремін, – деді облыс әкімі.
Шараға арнайы қатысқан Қазақстан халқы Ассамблеясы төрағасының орынбасары, Президент Әкімшілігі Қазақстан халқы Ассамблеясы хатшылығының меңгерушісі Марат Әзілханов игі тілегін жеткізді.
– Қызылорда – қазір қарқынды дамып, жаңару мен жаңғырудың үрдістерін нақты істермен дәлелдеп келе жатқан өңір. Бұл тек экономикалық көрсеткіштер ғана емес, бірлігі жарасқан, ынтымағы тасыған елдің арқасында орын алып жатыр деп білеміз. Небәрі жеті айдың ішінде осындай әсем ғимаратты тарту еткен демеуші компанияларға, облыс әкіміне рахмет. Мұндай заманауи, көпфункционалды «Достық үйі» өзге өңірлерде жоқ. Бүгінде облыс басқа қалаларға үлгі болуда. Біз үшін үлкен мақтаныш, – деді ол.
Мұнан кейін Мәжіліс депутаты Мұрат Әбенов, «ҚазАтомӨнеркәсіп» ҰАК» АҚ басқарма төрағасы Мейіржан Юсупов жылы лебізін білдірді.
Шарада бірлік пен келісімнің нығаюына үлес қосқан ассамблея мүшелері мен жаңа ғимаратты сапалы салған мердігер мекеме өкілдеріне облыстың Құрмет грамотасы мен облыс әкімінің алғыс хаты табысталды.
Өңірде 30-дың үстінде этнос өкілі, 11 этнобірлестік бар. Бұл ғимаратта облыстық, қалалық ардагерлер кеңесі, этномәдени бірлестіктер, үкіметтік емес ұйымдар жұмыс істейді. Жаңа нысанның бірінші қабатында концерт залы, этномәдени бірлестіктердің кабинеттері орналасқан. Екінші, үшінші қабатта 50 орындық мәжіліс залы, облыстық ардагерлер, «Азаматтық Альянс» бірлестігінің, үшінші қабатта қызметтік кабинеттер бар.
Жаңа «Достық үйі» татулық пен келісімді нығайтып, бірлікті бекемдеу бағытындағы жұмысын одан әрі арттыра бермек.
Айсәуле ҚАРАПАЕВА,
«Сыр бойы»
