«Шалқия Цинк LTD» акционерлік қоғамының полиметалл кен орындарын игеру арнайы жобасы бойынша жылына 4 миллион тонна кен өңдеу жоспарланған.
Қазіргі уақытта жерасты жұмыстары басталды. Өндіріс осы жылдың II тоқсанында, ал байыту фабрикасы 2026 жылы іске қосылмақ. Оған дейін «Шалқия» кені еліміздегі басқа байыту фабрикаларында өңделетін болады.
Қазір кәсіпорында 500-ден астам адам жұмыс істейді, ал фабриканы іске қосқаннан кейін 1500-ге артады деп жоспарланып отыр.
Өндірісте тәжірибелі мамандармен қатар, өз мамандығын жетік меңгерген жігерлі жастар да жетерлік. Соның бірі – Мұхамеджан Амангелді.
Ол Жаңақорғандағы №110 мектеп-лицейінде орта білім алып шыққаннан кейін нағашы ағасының кеңесімен Рудный индустриялық институтына оқуға түсіп, оның тау-кен металлургиялық факультетінде білім алды. Диплом алды өндірістік тәжірибесін елімізге белгілі «Соколов-Сарыбай» кен орнында өткізіп және осы жерде оның жұмысы өте жақсы бағаланды.
2021 жылдан бастап «Шалқия Цинк LTD» акционерлік қоғамында желдету цехының шебері, одан кейін бұрғылаушының көмекшісі қызметін жас маман абыроймен атқарып жүр.
– Мен екі бірдей жұмысшы мамандығын игеріп алғанымды мақтан тұтамын, ол үшін тәлімгерім, тәжірибелі маман Әзілхан Байжановқа алғысым зор.
Кәсіпорнымыз қайта жанданып, жақын арада кен байыту комбинаты іске қосылады деген хабарды естіп, қуанып қалдым. Сол кезде мен сияқты жастар жұмысқа көптеп қабылданады. Ол үшін қазірден бастап техникалық мамандықтарды игерген ләзім, – деді бізбен әңгімесінде М.Амангелді.
Біздің кейіпкеріміз көпбалалы отбасында туып-өскен. Әкесі Мұхтар Шеров – кәсіпкер, анасы Ақжайқын Байжанова – бастауыш пәнінің мұғалімі. Өзі екі жыл бұрын шаңырақ көтерді. Қазір биология пәнінің мұғалімі болып жұмыс жасайтын жары Нұрайлым Алтынбекқызы екеуі екі жасар ұлын тәрбиелеп отырған, жарасымды отбасы.
Мақсұт ИБРАШЕВ.
Жаңақорған ауданы
