Мемлекет басшысының Жарлығымен өткен жыл «Жұмысшы мамандықтар жылы» деп аталды. Аймақта атаулы жылда атқарылған жұмыстарды сараласақ, жастардың тегін кәсіптік білім алуына барынша мүмкіндік жасалып, мемлекеттік тапсырыс көлемі өткен жылмен салыстырғанда 700 орынға артқан.
Айталық, өңірде 28 колледж бар. Онда 87 мамандық 135 біліктілік бойынша 20 562 студент білім алуда. Оның ішінде 19 колледжде 37 мамандық 53 біліктілік бойынша 5469 жұмысшы кадрлар даярланады.
Жыл аясындағы жемісті жұмыстардың қатарында атап өтуіміз керек, өңірдегі колледждер 7 халықаралық, 98 республикалық, 56 аймақтық оқу орындарымен, 161 ынтымақтастық меморандум жасасты. Аталған келісім аясында Түркия, Қырғызстан, Германия, Ресей, Латвия, Өзбекстан, Польша мемлекеттеріндегі оқу орындарымен тәжірибе алмасып, уақыт талабына сай сапалы мамандар даярлауға мүмкіндік арта түспек.
Соның бір көрінісі, И.Әбдікәрімов атындағы Қызылорда политехникалық жоғары колледжі энергетика және құрылыс мамандықтары бойынша АРЕС Training Center тренингтік орталығы арқылы халықаралық аккредитациядан өтті.
Колледж директоры Абайбек Жүнісовтің айтуынша, білім беру саласындағы халықаралық ынтымақтастық – сапалы және заманауи оқытуды дамытуда маңызды рөл атқаратын негізгі факторлардың бірі. Ол озық педагогикалық тәжірибе алмасуға, студенттер мен оқытушылардың академиялық ұтқырлығын арттыруға, сондай-ақ жаһандық ойлау жүйесін қалыптастыруға мүмкіндік береді.
– Халықаралық ынтымақтастықты дамыту мақсатында И.Әбдікәрімов атындағы Қызылорда политехникалық жоғары колледжі және Германияның Seven Rivers Technologies компаниясы және Польшаның Wsg Bydgoszcz университеті арасында ынтымақтастық туралы меморандум жасалды. Меморандум бойынша колледж Қызылорда қаласындағы шыны зауытына мамандарды дуальдық жүйеде дайындауға көшті. Seven Rivers Technologies компаниясы Horn Glass Industries AG неміс компаниясының жабдықтары мен технологиясын пайдалана отырып, шыны ыдыстарды шығарады. Seven Rivers Technologies компаниясының өндірістік қуаты – жылына 220 миллион шыны ыдысы.
И.Әбдікәрімов атындағы Қызылорда политехникалық жоғары колледжі бастаманы қорғау қоғамдық бірлестігімен біріге отырып, 2024 жылдың қараша айынан бастап бүгінгі уақытқа дейін Германиядан SES эксперттері «Электрлендіру», «Құрылыс», IT, «Автомобиль көлігіне техникалық қызмет көрсету, жөндеу және пайдалану» мамандықтары бойынша кәсіби білікті мамандар колледж оқытушыларына тәжірибелерін бөлісті. Осылайша SES қайта даярлау, біліктілік арттыру, жаңа әдістерді енгізу, техникалық және экономикалық мәселелерді шешу қызметтері бойынша өзара ынтымақтастық нығайып келеді, – дейді колледж директоры.
Бұдан бөлек, колледж 2024 жылы «Электрмен қамтамасыз ету» өткен жылы «Құрылыс» мамандықтары бойынша «Жобалық басқару» біліктілігімен Флорида (АҚШ) штатындағы NCCER орталығы білім беру қызметінің халықаралық салалық аккредиттеуінен өткен. Нәтижесінде «Коммерциялық электрик» біліктілігімен 11 түлек халықаралық сертификатталса, «Жобалық басқару» біліктілігімен 15 білім алушы сертификатталуға дайындық үстінде. Бұл бағыттағы жұмыстар алдағы жылы да жалғасын тауып, City and Guilds компаниясынан «Ветеринария» мамандығын өткізу жоспарлануда.
«Жұмысшы мамандықтары жылында» М.Ықсанов атындағы техникалық – IT жоғары колледжінде «Құзыреттілік орталығы», «Мансап орталығы» және «Бизнес-стартап» жобасы жүзеге асырылса, Арал индустриалды-техникалық және Қызылорда құрылыс және бизнес колледжі базасында тігін цехы ашылды.
Колледж директорының оқу-өндірістік жұмыстар жөніндегі орынбасары А.Ертілеуованың айтуынша, «Бизнес стартап» орталығында колледж түлектерінің әзірлеген кәсіпкерлік жобаларына құқықтық, заңнамалық тұрғыда көмек көрсетіледі. Ал «Мансап орталығы» оқу орнын бітіруші түлектерді «Еңбек KZ» порталына тіркеп, бос жұмыс орындары жәрмеңкесіне қатысуына қолдау көрсетеді. Сондай-ақ білім алушылардың тәжірибеден өтетін базалық мекемелер аясын кеңейту, дуальдық оқытудағы мамандықтарға әлеуметтік серіктестер табу, түлектерге мамандық таңдауда бағыт-бағдар беруді жүзеге асырады.
– Бұл ретте М.Ықсанов атындағы Қызылорда техникалық – ІТ жоғары колледжі мен облыстық кәсіпкерлер палатасы, облыстық жұмыспен қамтуды үйлестіру және әлеуметтік бағдарламалар басқармасының «Еңбек мобильділігі орталығы» мекемесі арасында меморандумға қол қойылды.
Оқу орнының бастамасымен «Өрлеу» БАҰО АҚ филиалының облыс бойынша кәсіби даму институты, Respublica партиясы облыстық филиалы және Venera Print жарнама агенттігі арасында тұрақты әріптестік байланыс орнатылған. Бұдан бөлек, колледж түлектері Hyundai Avto Kyzylorda ЖШС жеңіл автокөліктерді жөндеу орталығы, «Хан» ЖШС темір бұйымдарын дайындау цехында өндірістік тәжірибеден өтеді. Бірлесіп атқарылған жұмыстардың нәтижесінде колледж бітірушілерінің 70 пайызы жұмыспен қамтылып отыр, – дейді ол.
Аудандардағы кәсіптік білім беру бағыты жайлы айтар болсақ, Арал ауданындағы индустиалды-техникалық колледжінде бүгінде 300-дей студент білім алады. Оқу орнында мемлекеттік лицензияға сәйкес 6 мамандық, 7 біліктілік бойынша даярлануда. 20-дан астам жеке әлеуметтік серіктестікпен келісімшарт жасалған.
«Жас маман» жобасы аясында оқу шеберханалары дәнекерлеу тренажері, тігін машиналары сияқты инновациялық технологиялармен жабдықталған. Бұл колледж студенттерінің теориялық білімін еңбекпен жетілдіріп, яғни тәжірибемен ұштастырып, білікті маман болып қалыптасуына барынша ықпал етеді.
Ал Жалағаш ауданындағы индустриалды-аграрлық колледжінде еңбек нарығына қажетті 5 мамандық, 10 біліктілік бойынша даярланады. Нақтырақ айтсақ, мұнда білім алушылар аспаз, кондитер, құрылысшы, ауыл шаруашылығы механизаторы, электромонтер, жеміс-көкөніс өсіруші сияқты кәсіптерді игеріп шығады. Колледжге 2025-2026 оқу жылында 78 студент қабылданған. Жалпы 242 студент білім алады, оның ішінде 184-і шәкіртақымен қамтылған.
Кейінгі жылдары оқу орнының материалдық-техникалық базасы жаңартылып, «Тамақтандыруды ұйымдастыру», «Ауыл шаруашылығын механикаландыру» мамандықтары «Жас маман» бағдарламасы бойынша жаңа үлгіде жабдықталған. Сонымен қатар, спорттық жаттығу залы да жаңартылып, қазіргі талапқа сай қызмет көрсетеді.
«Ауыл шаруашылығын механикаландыру» мамандығы бойынша заманауи техникалар алынып, колледж студенттерінің практикалық білімін көтеруге мән берілген. Бұл бағытта аудандағы іргелі шаруашылық – Таң ЛТД ЖШС-мен келісімшарт жасалып, жас мамандар шаруашылық егінжайында тәжірибеден өтеді. Ал «Тамақтандыруды ұйымдастыру» мамандығы бойынша білім алушылар аудандағы жеке кәсіпкерлік нысанға тәжірибеден өтуге барады. Сондай-ақ жаңаша жабдықталған асханада «Аспаз зертханасы» жұмысы жолға қойылған. Бүгінгі уақыт талабына сай жабдықталған асханада барлық ас түрін әзірлеуге, кондитерлік өнімдер дайындауға мүмкіндік мол.
Облыстық білім басқармасы техникалық және кәсіптік білім бөлімінің басшысы Бекжан Шәкизатұлының айтуынша, кәсіпке даярлаудағы жаңашыл бастамалардың нәтижесінде жас түлектердің де өз таңдауына деген талпынысы артып келеді. Бұл орайда «Мамандығым – болашағым» жобасы аясында жаңа кәсіптер атласының жобасы әзірленген. Алдағы уақытта осы атлас бойынша жүйелі жұмыс жүргізіліп, кәсіптік даярлаудың бағыты одан әрі кеңейе түседі деген болжам бар.
Жыл аясындағы жетістіктерге қысқаша шолу жасайтын болсақ, қазан айында Ақтау қаласында өткізілген «TurkicSkills» халықаралық чемпионатта «Сән технологиясы» құзыреттілігі бойынша Абылай хан атындағы жоғары колледж студенті Жансая Абдуллаева 1-орынды жеңіп алды. Сондай-ақ қараша айында колледж студенттері арасында өткізілген «Төтенше жағдайда қорғау» мамандығы бойынша республикалық байқауда облыс командасы 1-орын иеленді.
Ал 1-9 желтоқсан аралығында Астана қаласында өткізілген «WorldSkills Kazakstan» Ұлттық чемпионатында өңір студенттері 1 күміс, 5 қола медаль және 5 медальон иеленді. Өткен жылдары да аталған чемпионатта аймақ түлектерінің жоғары нәтиже көрсеткенін айта кеткеніміз жөн. Ал биыл М.Мәметова атындағы Қызылорда педагогикалық жоғары колледжі республика бойынша «Үздік педагогикалық колледж – 2025» номинациясының жеңімпазы атанды.
Колледждерге қатысты тағы бір жаңалықты айта кетейік, биыл «Саутс ойл» компаниясының демеушілігімен 4,8 млрд теңгеге 250 орындық жатақханасы бар 400 орындық музыкалық колледждің жаңа ғимараты пайдалануға берілді.
Бір сөзбен айтқанда, «Жұмысшы мамандықтар жылында» кәсіптік білім беру саласында біршама жаңашыл бастамалар енгізіліп, оған сәйкес нәтиже де айқындалып отыр.
Ғазиза ӘБІЛДА,
«Сыр бойы»
