Қазақстан Республикасы Президентінің тапсырмасымен Қазақстан Республикасы Үкіметінің 2023 жылғы 29 желтоқсандағы «Ұлттық ауыл шаруашылығы санағын өткізу туралы» №1248 қаулысы негізінде аймақта Ұлттық ауыл шаруашылығы санағы 2025 жылдың 1 тамызы мен 20 қазаны аралығында өтеді.
Осы жылдың 1 тамызынан бастап облыс бойынша ұлттық ауыл шаруашылығы санағының онлайн кезеңі басталған болатын. Қазіргі таңда sanaq.gov.kz сайтынан ауыл шаруашылығы тауар өндірушілері мен шаруа-фермерлік қожалықтар, үй шаруашылықтары порталдағы санақтың сауалнама парақтарын қашықтан өз бетінше толтырып өтуде.
Бүгінгі күнге облыс бойынша жоспарланған 11 мыңға жуық респонденттердің 70 пайызға жуығы санақтан онлайн өтті. Санақтан өту үшін барлық кент және ауылдық округ әкімі аппараттары мен Арал және Қазалы қаласы әкімі аппаратында «Өзіне-өзі қызмет көрсету» орындарында, сонымен бірге, аудандық статистика бөлімдерінің ғимараттарында интернет байланысымен қамтамасыз етілген орындарда ұйымдастырылуда.
Заңды тұлғалар, дара кәсіпкерлермен шаруа-фермер қожалықтары сияқты шаруашылықтың барлық ұйымдастырылған нысандары онлайн сауалнамадан sanaq.gov.kz сайтынан өз бетінше өтуі тиіс. Экономикалық қызмет түрлерінің жалпы жіктеуші (ОКЭД) қызметі бойынша мал шаруашылығы, өсімдік шаруашылығы немесе балық шаруашылығымен айналысатындардың барлығы санаққа қатысуға міндетті.
Егер респонденттің сауалнама парағын толтыру кезінде қандай да сұрақтары туындаса, арнайы дайындалған жасанды интеллект арқылы жауап беретін sanaq-Myrza виртуалды көмекшісіне жүгіне алады.
Сондай-ақ 1446 нөмірі бойынша бюроның байланыс орталығына хабарласуға болады. Қоңыраулар сағат 9:00-ден 18:30-ға дейін, ал онлайн-сауалнама басталған кезеңде тәулік бойы, аптасына жеті күн қабылданады.
Екінші кезең – интервьюерлердің үй шаруашылықтарын жеке-жеке аралауы, ол 2025 жылдың 20 қыркүйегі мен 20 қазаны аралығында өтеді.
Санақ барысында облысымызда барлығы 89 мыңнан аса үй шаруашылығын және 11 мыңға жуық ауыл шаруашылығы өндірушілерін қамту жоспарланған.
Біз азаматтарды санаққа саналы түрде қатысуға шақырамыз, өйткені ұлттық ауыл шаруашылығы санағы – Қазақстанның аграрлық секторын және азық-түлік қауіпсіздігін тұрақты дамытуға арналған стратегиялық маңызы бар іс-шара. Алынған деректер тиімді мемлекеттік саясат пен барлық деңгейдегі ауыл шаруашылығы өндірушілерін қолдауға негіз болады. Барлық қатысушы тарапты өздерінің азаматтық ұстанымын танытып, санаққа белсенді түрде қатысуға шақырамыз.
