Облыс әкімі Нұрлыбек Нәлібаев Шиелі ауданына жұмыс сапарында ҚР Парламенті Сенатының депутаттары Наурызбай Байқадамов, Руслан Рүстемов, ҚР Парламенті Мәжілісінің депутаттары Мұрат Әбенов, Мархабат Жайымбетов, Мұрат Ергешбаев, Қазыбек Исамен бірге бірқатар әлеуметтік нысанның ашылу рәсіміне қатысып, өзге де жұмыс барысын бағамдады.
«Шиелі-Тайқоңыр» автомобиль жолы күрделі жөндеуге алынған. Бұл жол учаскесі «Kazatomprom» ұлттық атом компаниясының еншілес мекемесі «KAP Logistics» серіктестігінің қолдауымен жөндеуден өткізілді. Жоба аудан орталығы мен өндірістік нысандар арасындағы көлік қатынасын жақсартып, ауыл тұрғындарының қауіпсіз әрі қолайлы көлік қозғалысына жағдай жасайды әрі өңірдің әлеуметтік-экономикалық дамуына серпін береді.
Күрделі жөндеуге 2 млрд 555 млн теңге бөлінген. Мердігер «PK Story Group» серіктестігі қолға алған жолдың ұзындығы 13 шақырым, ені 7 метр. Жөндеу кезінде жол жамылғысы толық жаңартылып, белгілер мен инфрақұрылым қауіпсіздік талаптарына сай орнатылуда.
Аймақ басшысы жауапты сала басшыларына сапаны қатаң бақылауда ұстап, жұмысты белгіленген мерзімде әрі талапқа сай аяқтауды тапсырды.
Жалпы жол құрылысы бойынша өңірде бұрын-соңды болмаған серпінді еңбек жасалып жатыр. 2022-2025 жылдар аралығында 1600 шақырым автомобиль жолы мен 30 көпір өткелін салуға, күрделі жөндеуге 150 млрд теңгеден астам қаржы бөлінген. Былтыр жол инфрақұрылымын дамытуға бюджеттен 50 млрд 605 млн теңге қаралып, 329 шақырым автомобиль жолы, көшелер мен көпір өткелдері жөндеуден өтті. Осындай қарқынды еңбектің нәтижесінде облыста жақсы жағдайдағы жолдың үлесі 95 пайызға жетті.
Күн электр станциясы іске қосылды
Ауданның Еңбекші ауылдық округінде қуаттылығы 40 МВт күн электр станциясы іске қосылды. Аймақ басшысы жұртшылықты құттықтап, өңірде атқарылған бірқатар маңызды жұмыстарды атап өтті.
– Президентіміз «Түркістан» газетіне берген сұхбатында «Қазақстан жаңғыру жолында қарышты қадам басып, барынша өркениетті ел бола бастады. Қоғамда өскелең ұрпақтың жарқын болашағы үшін түбегейлі өзгеріс жасау аса маңызды екені туралы нақты түсінік қалыптасты» деген болатын. Сондай-ақ биыл ел тағдырына тікелей әсер ететін, Әділетті әрі Қуатты Қазақстанды дамытудың ұзақ жылдарға арналған бағыт-бағдарын айқындайтын жыл болатынын жеткізді.
Облыстағы қарқынды істердің қуанышты сәттерін өздеріңізбен бірге бөлісіп келеміз. Қытайлық «Хуандиан» компаниясымен бірлесіп жүзеге асырылған «Тесис» жауапкершілігі шектеулі серіктестігінің 40 МВт-тық күн электр станциясы іске қосылады.
Қазіргі таңда аудан тұрғындары сағатына 15,5 МВт электр энергиясын тұтынады. Жаңа станция Шиелі ауданымен қатар облыстың басқа да қажеттіліктерін өтеп, электр энергиясымен тұрақты қамтамасыз етеді. Жаңадан ірі өндіріс орындарын ашуға мүмкіндік береді. Жобаға 11 млрд 500 млн теңге бөлініп, мемлекеттік қолдау ретінде 80 гектар жер телімі берілген. Одан бөлек, 6 млрд теңгеге қуаттылығы 20 МВт-тық күн электр станциялары салынуда. Бұл жобалар халықтың тұрмыс сапасын жақсартуға жаңа серпін береді.
Елдің дамуы ауылдан, ауылдың гүлденуінен басталады. Ауылдың дамуы, келешегінің жарқын болуы сіздерге, еңбекқорлықтарыңыз бен ауызбірліктеріңізге байланысты. Баршаңыздың дендеріңізге саулық, отбасыларыңызға бақ-береке, ел игілігі жолындағы қызметтеріңізге сәттілік тілеймін! – деді облыс әкімі.
Жиында ауданның әлеуметтік-экономикалық дамуына үлес қосқан азаматтар мен күн электр станциясын іске қосқан сала қызметкерлері облыс әкімінің Алғыс хатымен марапатталды. Мәжіліс депутаттары Мархабат Жайымбетов пен Қазыбек Иса сөз сөйлеп, жылы лебіздерін жеткізді.
«Шұғыланың» шуағы
Шиелі жұртын тағы бір қуанышқа кенелткен шақ – кенттің «Шұғыла» мөлтек ауданында әлеуметтік осал топтағы отбасыларға арнап салынған 30 пәтерлік 15 тұрғын үйдің берілу салтанаты.
– Мемлекет басшысының, Үкіметтің қолдауымен аймағымыз қарқынды құрылыс алаңына айналды. 2022 жылдан бері 200-ге жуық әлеуметтік нысан салынып, іске қосылды, – деді облыс әкімі сол салтанатты жиында.
Сондай-ақ осы саладағы серпінді еңбектің көрсеткішінен мысал келтірді.
– Президентіміз тұрғындардың жайлы тұрмысын қамтамасыз етуге бағытталған тапсырмалар жүктегені белгілі. Оның ішінде халықты баспанамен қамту бағдарламалары тұрғын үйге қолжетімділік мәселесін шешіп қана қоймай, құрылыс индустриясын да дамытып, аймағымыздың ажарын айшықтады, сәулетіне сән қосты.
Өткен жылдың желтоқсан айында 22 пәтерлік 11 тұрғын үйдің кілтін иелеріне табыстаған болатынбыз. Бүгін жерлестеріміздің баспаналы болу қуанышына тағы да жиналып, Шиелі кентінде 450 млн теңгеге салынған 30 пәтерлік 15 тұрғын үй халық игілігіне берілуде.
Бұл – мемлекетіміздің қолдауын сезінген отбасылар үшін ерекше қуаныш! Жаңа қоныс құтты болсын! – деді Н.Нәлібаев.
Ауданның дамуына үлес қосқан ардагерлер, мердігер мекеме қызметкерлері облыс әкімінің Алғыс хатымен марапатталып, Қазыбек Иса мен Мұрат Ергешбаев тілектестік білдірді.
Осы арада мынадай дерек келтірейік. 2022-2024 жылдары тұрғын үй кезегінде тұрған азаматтарға 5 мыңнан астам пәтер табысталған. Ал кейінгі үш жылда алғаш рет барлық ауданда тұрғындар 1800-ге жуық жаңа пәтерге ие болып отыр. Облыс орталығында заманауи жаңа үлгімен жеті, тоғыз, он екі көпқабатты тұрғын үйлер бой көтеруде.
Шиелі ауданында 2023-2024 жылдары 3 млрд 96 млн теңге қаржыға салынған 228 пәтерлік 114 тұрғын үй ел игілігіне берілген.
«СБ» ақпарат
