«Қазақстанда үш мықты мектептің жүйесі бар. Соның бірі – физика-математика мектебі. Бұл білім ордасының негізі 1969 жылы құрылған. Мен оның алғашқы түлектерінің бірімін. Қаншама жылдан кейін Қызылорда облысында филиалының ашылуы үлкен қуаныш, үлкен мәртебе. Өйткені Сыр өңірі тек жыр өңірі ғана емес, ғылым өңірі болуы тиіс. Оған біздің әлеуетіміз де, жігеріміз де жетеді». Бұл – Мемлекеттік сыйлықтың иегері, физика-математика ғылымдарының докторы, Қазақстанның Еңбек Ері Асқар Жұмаділдаевтің аймақта ашылған физика-математика бағытындағы «Білім-инновация» лицей-интернатының ашылуында айтқан сөзі.
Расымен, өңірде бой түзеген мектептің ашылуы – Сыр елінде ғылым мен білімнің жаңа кезеңге аяқ басқанын көрсетеді. Асқар Жұмаділдаев сынды әлемге танылған ғалымның өзі оң бағасын беріп отырған білім ордасы талай түлектің арманын жүзеге асыруға себепкер болмақ. Ендігі міндет – осы мектептің мәртебесіне сай жұмыс істеп, ел үмітін ақтайтын шәкірттер тәрбиелеу. Сыр өңірі енді жыр ғана емес, ғылым мен жаңалықтың да ордасына айналары сөзсіз.
Облыс әкімі Нұрлыбек Нәлібаев мектептің ашылу салтанатында білім мен тәрбиеге баса мән берілетінін айтып, бұл білім ордасы өңір жастарының жан-жақты дамуына зор мүмкіндік туғызатынын жеткізді.
– Мемлекет басшысы Қасым-Жомарт Кемелұлы: «Сапалы білім – жетістікке жетудің жолы әрі экономиканы дамытудың басты құралы. Жеті түрлі ілім білетін ұрпақ тәрбиелеу – бүгінгі күннің негізгі міндеті» деген болатын.
Бүгінде өңірде жастарымызға сапалы білім, саналы тәрбие беруге бағытталған бірқатар жүйелі жұмыстар атқарылуда. Мәселен, аймағымызда соңғы үш жылда білім беру саласына бөлінген қаржы көлемі бірнеше есеге өсті. Биылдың өзінде білім саласының бюджеті 308 млрд теңгеден асты. Біздің ең бірінші міндетіміз – балаларымыздың білім алуына қолайлы жағдай жасап, жайлы орта қалыптастыру. 2023 жылы Қызылорда қаласындағы 4 мектептің жанынан 1850 орындық қосымша құрылыс салып, үш ауысымдық мектептер мәселесі түбегейлі шешімін тапты. Өткен жылы жеке инвесторлар есебінен құны 31 млрд 800 млн теңгені құрайтын 13 білім беру ұйымдары салынып, пайдалануға берілді. Президентіміздің бастамасымен қолға алынған «Жайлы мектеп» жобасы аясында 6 мектеп ел игілігіне табысталды. Жаңа оқу жылына қарсы 4 мектеп іске қосылады.
Жаңа нысандардың ашылуы бұл жай ғана ғимараттардың салынуы емес, жаңа дәуірде бәсекеге қабілетті ұландарымызға жаңа мүмкіндіктер сыйлау. Алаш қайраткері Міржақып Дулатұлы: «Ұрпағы білімді халықтың болашағы бұлыңғыр болмайды» деген. Бүгінгі бой түзеген жаңа білім ордасынан алдыңғы буынның ізгі жолын жалғаған талапты, талантты шәкірттер шығатынына сеніміміз мол. Санасы сергек, ойы ұшқыр, бәсекеге қабілетті оқушыларымыз көп болғай, – деді облыс әкімі.
Рәсімде Премьер-министрдің орынбасары Ермек Беделбайұлы, академик, Қазақстанның Еңбек Ері Асқар Серқұлұлы, Парламент Мәжілісінің депутаты Мұрат Абдуламитұлы, Мұрат Бақтиярұлы құттықтау сөз сөйледі. «Білім-инновация» Халықаралық қоғамдық қорының президенті Дархан Өте арнайы қатысты.
Жиын соңында физика-математика лицей-интернатының құрылысын сапалы жүргізген құрылысшылар мен білім саласы қызметкерлері облыс әкімінің Алғыс хатымен марапатталды.
Айта кетейік, 400 орынды «Білім-инновация» лицей-интернаты 300 орынды жатақханамен қамтылған. Мұнда 7-11 сынып аралығындағы зияткер оқушылар білім алады. Олар үшін барлық жағдай жасалған. Биылғы іріктеуге еліміздің 17 аймағынан 1445 оқушы өтініш білдіріп, оның ішінде оза шыққан 200 оқушы қабылданған.
Мейрамгүл ДАУЫЛБАЙҚЫЗЫ,
«Сыр бойы»
