Жаңақорғандағы М.Көкенов атындағы Мәдениет сарайында жазушы, Қазақстанның еңбек сіңірген қайраткері, «Отан» және «Құрмет» ордендерінің иегері, Абай атындағы Мемлекеттік сыйлықтың және Ғабит Мүсірепов атындағы сыйлықтың лауреаты, Жаңақорған ауданының құрметті азаматы Тынымбай Нұрмағамбетовтің 80 жасқа толуына орай «Таланты тұнық Тынымбай» атты ғылыми-танымдық конференция өтті. Аудан әкімі Мажит Самитов жұртшылықты Республика күнімен құттықтап, сөз өнеріндегі дара болмысымен танылған дарын иесінің ерекшелігін айғақтайтын еңбектеріне тоқталды. Қаламгерді 80 жасқа толған мерейтойымен құттықтап, иығына шапан жапты. Ауданның Құрмет грамотасын табыс етті.
Танымдық конференцияда әдебиет сыншысы, Халықаралық «Алаш» әдеби сыйлығының лауреаты Амангелді Кеңшілікұлы баяндама жасады. Тынымбай шығармаларын жете оқып-зерделеумен айналысып келе жатқан әдебиетшінің суреткер табиғатына терең үңілгеннен туған толғаныстары көптің көңіліне қонды. «Жыланның уы» романында адамгершілік, ізгілік, мейірім сияқты ізгі қасиеттердің аяқ астына тапталғаны, ар-ұяттың еңсесі төмендегені суреттелген.
– Әдебиет – адам тануды ғана емес, адам боп қалуды үйрететін өнер. Міне, сондықтан да шын талант жарық өмірді зұлымдықтан тазарту үшін, ар азабының ақиқатын айту үшін келеді. Жүрегін оттай жанып, өмірдегі әділетсіздікпен күресе алмаған жазушы ешуақытта адам жанының суреткері бола алмайды. Сөз өнерінің дертіне шалдыққан Тынымбай әдебиетке берген сертіне адал болып қалғанының арқасында суреткер бола білді. Оның туындылары арқылы ұлттық әдебиетімізге ойы анық, сезімі тұнық, тылсымы терең жаңа әлем келді. Ол әлемнің аты – Тынымбай, – деді ол.
Жазушы тек прозада ғана емес, драматургия мен кинода да өзіндік қолтаңбасын қалдырған. Оны «Жоғалған көл», «Кемпірлер» атты пьесалары сахналарда табысты қойылып, көрермен ықыласына бөленді. Бұл шығармаларында жазушы адам жанына терең үңіле отырып, қоғамның ащы шындығын суреттейді. Сонымен қатар ол «Тырналар ұшып барады» телефильмінің сценарийін жазған. Оның шығармалары орыс, неміс тілдеріне аударылып қазақ әдебиетінің әлемдік деңгейде танылуына жол ашты.
Бұл жөнінде Жазушылар одағы облыстық филиалының төрағасы Қаршыға Есімсейітова терең талдау жасады. «Тынымбай шығармаларының дені ауыл өміріне арналған. «Түкпірдегі ауыл», «Дарияның арғы беті», «Көгілдір аспан», «Қарлығаштың ұясы» атты повесть-әңгімелерінде аңқау да ақжүрек ауыл адамдарының бейнесі шынайы суреттеледі» деді ол.
Сонымен қатар конференцияда «Жаңақорған тынысы» газетінің бас редакторы Баян Үсейінова, қоғам қайраткері Нәжмадин Мұсабаев, Жаңақорған ауданының құрметті азаматы Керімхан Егізбаев сөз сөйледі.
Кеш қорытындысында мерейтой иесі өзіне құрмет көрсеткен жерлестеріне жүрекжарды алғысын жеткізді.
– Менің жазушы болып қалыптасуыма негіз қалаған – ең бірінші туған жердің адамдары. Сол туған жердің табиғаты бізді тәрбиеледі. Адамға өскен ортаның әсері үлкен. Адамдардың мінезін, ықыласын, табиғатын шығармаларымызға арқау еттік. Қауықта өткен бала күндерімді еске ала отырып «Шал, мая және жел» деген туындымды жаздым. Бәрі де болған оқиға, Құрышжан деген атамыздың басынан өткен жағдай баяндалады. Сосын «Бойтұмар» деген повесімде де осылай, бір отбасындағы төрт ағайындының түрліше болмысы, түрліше тағдыры. Бірге тумақ бар болса да, бірге жүрмек жоқ ағайын ахуалы өзек болады.
Шығармаларымның туған жеріммен, тіпті қоғаммен байланысты болуы – ол заңды құбылыс. Жазушы үшін туған жердің орны бөлек. Өйткені оны жазушы еткен осы ортасы, – деді ол.
Сол күні түс ауа «Руханият орталығында» А.Сопыбеков атындағы аудандық кітапхананың ұйымдастыруымен «Тынымбай тұңғиығынан сыр шертейік» атты жүздесу кеші өтті. Кешке зиялы қауым өкілдері, ардагерлер, қаламгерлер, оқырмандар қатысты.
Оқырмандар жазушының шығармалары туралы сұрақтарын қойып, тұшымды жауап алды. Жазушы туған жеріне келіп, шешіліп әңгіме айтып, сыр шертті.
Кеш соңында жұртшылық қолтаңба алып, естелік суретке түсті.
«СБ» ақпарат
