Бүгінде кәсіп жасаймын деген жанға мүмкіндік көп. Мемлекет тарапынан көрсетіліп жатқан қолдау шаралары өз арманындағы істі бастаушыларға серпін беріп отыр. Осындай мүмкіндікті сәтті пайдаланып, кәсібін дөңгеленткен жандардың бірі – Жосалы кентінің тұрғыны Самал Биғалиқызы.
Кәсіпкер табанды еңбек пен дұрыс жоспарлаудың арқасында өз ісін табысты жолға қоя білді. Ол кәсібін «Жосалы тәттілері» деген атаумен тіркеп, қазіргі таңда кенттегі дүкендердің басым бөлігін үйден дайындалатын тәттілермен қамтамасыз етуде. Қолынан шыққан төрт түрлі пряник пен дәмі тіл үйірер коржиктері тұтынушылар арасында үлкен сұранысқа ие.
Бастапқыда үй жағдайында, шағын көлемде пісірілген өнімдер қазір үлкен көлемде өндіріліп, Жосалы тұрғындарының күнделікті сұранысын қамтып отыр. Тұтынушылардың сеніміне ие болған тәттілер тек дәмімен ғана емес, сапасымен де ерекшеленеді. Бұл – кәсіпкердің өз ісіне деген адалдығы мен жауапкершілігінің көрінісі.
Самал Биғалиқызы кәсібін бастау үшін мемлекет қолдауын тиімді пайдаланды. «Ауыл аманаты» жобасы аясында 3,5 млн теңге қаражат алып, қажетті құрал-жабдықтарға қол жеткізіп, өндірісін кеңейтті.
– Алғашында үйде балаларыма жасап жүрдім. Кейін көршілерім сатып ала бастады. Сол кезде ойландым, неге осылай істеп сатпасқа деп. Үйдің жанындағы дүкенмен келісіп, күніге бес пакеттен апарып өткізіп жүрдім. Апарғаным апарғандай өтіп кетеді. Шүкір, тәттілерім халыққа ұнады. Қазір тапсырыстар күн сайын артып, кенттің 20-дан аса дүкеніне таратып отырмын, – дейді Самал.
Жосалы тәттілерін бүгінде арнайы іздеп келіп, өзге қалаларға алып кететіндер де көбейген. «Басқа жақтан хабарласып, алғысын білдіргенде қуанып қаламын» дейді кәсіпкер.
Негізінен Самал Ақтөбе қаласының қызы, аспаздықтың қыр-сырын меңгерген маман. Жосалыға келін болып түскенде, мұнда кондитерлік өнімдердің мүлде өндірілмейтінін естіп таңғалады.
– Шыны керек, мен келгенде кентте тәтті өнімдерді шығаратын кондитерлік өндіріс жоқтың қасы еді. Тек наубайханға ғана сұраныс болды. Нан пісірумен айналыса жүріп, бос уақытымда түрлі тәттілер әзірлеуді тоқтатпадым. Дегенмен сұраныс қазіргідей жоғары емес еді, – дейді ол.
Тәжірибе жинақтай жүріп, әр салада еңбек еткен ол аспаздық өнерін шыңдай түседі. Тәттілерге деген сұраныстың артқанын сезген сәтте, бойындағы таланты мен табандылығын іске қосты. Түрлі ойлар, жаңа идеялар келіп тұрса да, оларды жүзеге асыруға мүмкіндік тек уақыт өте келе туған. Қазір тәтті өнімдерін жолдасы екеуі бірге дайындауда.
– Ең үлкен қиындық – маманның жоқтығы. Жоспар да, идея да көп. Мәселен, кекс, «Барни» секілді тәттілер, тіпті тәтті тоқаштардың өзі сырттан келеді. Мұндай өнімдерді өзіміз де жасап шығара аламыз. Бірақ жұмыс күші жетіспейді, – деген кәсіпкер тәттіге қолданатын қатықты да басқа ауданнан алып отырғанын жеткізді.
Жалпы Самал Биғалиқызының табыс жолы жас кәсіпкерлерге үлгі боларлықтай. Ол қолда бар мүмкіндікті ұтымды пайдаланып, Жосалыда кәсіпкерліктің дамуына үлес қосуда.
Ал «Жосалы тәттілері» бүгінде тек өнім бренді ғана емес, жергілікті сапалы кәсіптің үлгісіне айналған. Балғын дәм мен табиғи құрам тұтынушылардың сенімін арттырып, брендтің абыройын өсіруде.
Ең бастысы, өнімге деген сұраныс бар, демек «Жосалы тәттілерін» алдағы уақытта еліміздің түкпір-түкпірінен де көретін боламыз.
Мейрамгүл ДАУЫЛБАЙҚЫЗЫ,
«Сыр бойы»
