Жаңақорған ауданында орналасқан «СКЗ-U» ЖШС-ның қызметі «Қазатомөнеркәсіп ҰАК» АҚ-ға қарасты уран өндіруші кәсіпорындардың күкірт қышқылға деген қажеттілігін қанағаттандыруға бағытталған. Бұл кәсіпорын – 2010-2014 жылғы Үдемелі индустриялық-инновациялық даму бағдарламасы аясында салынған, озық үлгідегі өндіріс.
Оған балама болатын немесе ұқсас өндіріс елімізде жоқ. Зауыт аз қалдықты өндіру технологиясына негізделген. Шикізатты мақсатты өнімге ауыстыруды 99,9% деңгейде жүзеге асырады. Мұнда 200-ден астам адам жұмыспен қамтылған.
«СКЗ-U» ЖШС құрылымына күкірт қышқыл цехы, энергокешен, қосалқы бөлімшелер, коттедж қалашығы, күн электр станциясы кіреді. Ауқымды зауыт күкірт қышқылын өндіргенде шығатын будан электр қуатын өндіреді. Энергокешеннің қуаттылығы 12 МВт-ны құрайды. 2013 жылы зауытты іске қосқаннан кейін электр қуатына деген сұраныс артуына орай, кәсіпорын аумағында сағатына 420 кВт электр энергиясын өндіретін күн электр станциясы салынған. Күн сәулесінен алынған энергия вахталық қалашық пен кәсіпорынның әкімшілік-тұрмыстық кешенінің электр қуатына деген қажеттілігін толық өтеп отыр.
Энергетика министрлігі Атомдық және энергетикалық қадағалау мен бақылау комитетінің облыс бойынша аумақтық департаменті хабарлағанындай, «СКЗ-U» ЖШС күкірт қышқылы зауытының энергокешені 2019-2020 жылдың күзгі-қысқы кезеңін апатсыз режимде өткізуде. 7 маусымдағы ақпаратқа сәйкес, электр энергиясының орташа тәуліктік өндірісі 12,3 МВт-ны құрайды. Оның ішінде зауыттың жеке тұтынуы 4,5 МВт болса, желіге 4,8 МВт (ВЛ-35 кВ, Л-3–3,9МВт, Л-4 –3,9,Л-57–0) электр энергиясы беріледі.
Желіге жеткізілетін электр энергиясы, басқа энергия көздерінің электр энергиясымен салыстырғанда арзанырақ. Соған байланысты «Қызылорда электр тарату тораптары компаниясы» АҚ электр энергиясының технологиялық үдерістеріне жұмсалатын шығындарды жабу үшін сатып алады.
Бұл энергия көзі күкірт пайдалану қоры көлемінің нормативтік талаптарына сәйкес келеді. Сондай-ақ серіктестіктің бір ай бойы үздіксіз жұмыс істеуін қамтамасыз етеді.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
