Өңірлік коммуникациялар қызметінің баспасөз орталығында облыстық білім басқармасының басшысы Ақзира Қасымова “Жаңа оқу жылына дайындық жұмыстары туралы” баяндады. Айталық, 2020-2021 оқу жылында облыстағы 293 орта мектепте 169 143 оқушы білім алатын болады. Оның ішінде 1 сыныпқа 18 423 бала қабылданады.
Биылғы жаңа оқу жылының ерекшелігі, 1 қыркүйектен бастап қала мектептері жан басына шаққандағы қаржыландыруға көшіріледі. Яғни, Арал ауданынан – 9, Қазалы ауданынан – 3, Байқоңыр қаласынан – 5, Қызылорда қаласынан – 41 мектеп, барлығы 58 мектепті аталған механизмге көшіру бағытында тиісті жұмыстар жүргізілді.
Жаңа оқу жылы еліміздегі эпидемологиялық жағдайға байланысты Білім және ғылым министрлігі ұсынып отырған бағыттар бойынша басталады. Нақтырақ айтсақ, бірінші, облыстағы 222 мектептегі 116 888 оқушы қашықтан оқытылады. Қашықтан оқыту BilimLand, Дарын-онлайн интернет платформалары арқылы жүргізіледі.
Екіншіден, 1-4 сыныптағы 41 547 оқушы (3141 топта) дәстүрлі оқиды. Үшіншіден, шалғай орналасқан елді мекендегі 71 мектепте 10712 оқушы дәстүрлі оқытылады. Айта кетейік, дәстүрлі түрде білім алатын оқушылар күнделікті сабақ барысында 5 сатыдан тұратын дезинфекциядан өтетін болады. Осы мақсатта дезинфекциялық тунель, санитайзерлер, байланыссыз термометр, дезинфекциялық ылғалды жуып тазалау құралдарын алуға 182 млн теңге қаржы бағытталды.
Қашықтан оқыту бойынша оқушылар мен мұғалімдердің арнайы құрылғылармен (компьютер, ноутбук, планшеттер, смартфон) қамтамасыз етілуіне, интернет және ұялы байланыстың қолжетімділігіне мониторинг жасалды. Алдын ала айқындалғандай, 158 790 оқушының (88 028 отбасы) электронды құрылғылары бар. Ал электронды құрылғысы жоқ 9 687 оқушыны компьютерлік техникамен қамтуға тиісті жұмыстар ұйымдастырылуда. Бүгінгі күнге мектеп балансындағы 2800 компьютер мұқтаж отбасыларына уақытша пайдалануға берілсе, демеушілер есебінен 239 планшет, 15 ноутбук берілді. Сонымен қатар, саладағы үнемделген бюджет есебінен 176,7 млн теңге 2 635 планшет алуға бағытталды. Бұдан бөлек, әлжуаз топтағы отбасы балаларына 2020 жылы республикалық бюджетттен 3,4 млрд теңгеге 22870 компьютерлік техникалар алу жоспарлануда. Айта кетейік, компьютерлердің сатып алу жұмыстары ашық әрі жариялы түрде өтеді.
Интернет байланысы жоқ 25 елді мекендегі 2 187 оқушы санитарлық талаптарды қатаң сақтай отырып, дәстүрлі түрде оқиды. Арал ауданы Қаратерең ауылындағы 393 оқушының 157-сі кезекші топтарда дәстүрлі оқытылса, қалған оқушыларға телесабақтар арқылы білім беріледі. Сонымен қатар, қала, аудан әкімдіктері дәстүрлі түрде өткізілетін «Мектепке жол» акциясы басталды. Биылғы акцияның мақсаты – әлжуаз отбасынан шыққан балаларды электронды құрылғылармен және интернетпен қамтамасыз ету. Сондай-ақ, қашықтан оқытуға байланысты 18 мың мұғалім 17 тамыздан бастап арнайы онлайн курстан өтуде.
2020 жылы оқулықтар сатып алуға барлығы жергілікті бюджеттен 1,2 млрд теңге қаралды. Қаржының 33%-і жаңартылған білім беру мазмұнына көшетін 11 сынып оқушыларын оқулықтармен қамтуға бағытталса, қалғаны оқулық қорларын толықтыру үшін жұмсалды. Бүгінгі күнге 15 баспамен 115 келісім шарт жасалып, алдын ала 30% төлемақысы аударылды.
Облыс бойынша 2020 жылы 7 млрд теңге қаржы бөлініп, 55 білім беру нысанына жөндеу жұмыстары жүргізілуде. Оның 12-сі балабақша, 33-і мектеп, 4-і мектептен тыс мекеме, 5-і колледж ғимараттары. Оның ішінде 20 мектеп күрделі жөндеуден өтуде. Бұл мақсатта 14 мектепке «Жұмыспен қамтудың Жол картасы», 4 мектепке «Ауыл – ел бесігі» жобасы бойынша және 1 мектепке облыстық бюджет есебінен, барлығы 3 млрд теңгеден астам қаржы бөлінген. Жөндеу жұмыстары жаңа оқу жылына дейін толық аяқталады деп жоспарланып отыр. Сонымен бірге, биылғы оқу жылында облыста 740 орындық 2 мектеп құрылысы пайдалануға беріледі. Олар Жалағаш ауданы Шәменов ауылындағы №34 апатты мектептің 140 орындық жаңа ғимараты және Қызылорда қаласы Жаппасбай батыр көшесі бойындағы 600 орындық жаңа мектеп.
2020-2021 оқу жылында облыстағы 30 колледжде қашықтан оқыту жүйесінде білім беру жүзеге асырылады. Жаңа оқу жылыда жергілікті бюджеттен 3108 орын, «Еңбек» бағдарламасы бойынша 1515 орын мемлекеттік тапсырыс негізінде жалпы 4623 студент, ақылы негізде 1500 студент, барлығы 6123 студентті қабылдау жоспарланып отыр.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
