Кеше облыс әкімі Гүлшара Әбдіқалықованың төрағалығымен
7 мамыр – Отан қорғаушы күніне орай салтанатты жиын өтті. Аймақ басшысы өңірдегі Қарулы Күштер, қорғаныс істері саласының әскери азаматтарына «Алғыс хат» табыстады.
– Сіздерді Қазақстан Қарулы Күштерінің құрылғанына 29 жыл толу мерекесімен құттықтаймын. Отан қорғау – күн сайынғы ерлік екенін ескеретін болсақ, қорғаушыларымыздың арқасында биыл Тәуелсіздігіміздің 30 жылдығын атап өтеміз. Осыған орай, егеменді еліміздің отын сөндірмей, қорғаныс жүйесін бекем ұстауда жылдар бойы өз үлесін қосып келген азаматтарымызды марапаттайтын боламыз, – деді облыс әкімі.
Марапатталушылардың қатарында облыстық жұмылдыру дайындығы басқармасының «Жұмылдыру және шұғыл жұмыстар орталығы» коммуналдық мемлекеттік мекеме басшысының орынбасары Бауыржан Садықов, Қызылорда облысының аумақтық қорғаныс бригадасының 99215 әскери бөлімінің командирі, полковник Керімбай Ойықбаев, Қызылорда облысының қорғаныс істері жөніндегі департаментінің Жаңақорған аудандық бөлімінің жасақтау бөлімшесінің бастығы Жасұлан Шанкулов, ҚР Ұлттық қауіпсіздік комитеті Шекара қызметінің Қызылорда облысы бойынша департаментінің, идеологиялық және кадрлық жұмыстар бөлімінің бастығы, майор Нұрбек Абдиракинов, ҚР Қорғаныс министрлігінің 66597 әскери бөлімінің ефрейторы Шапағат Болатов, ҚР Ұлттық ұланының 5547 әскери бөлімінің батальон командирі, майор Жасұлан Беркенов бар.
Жиын соңында Қызылорда облысының Қорғаныс істері жөніндегі департаментінің бастығы, полковник Айдын Сағындықов көрсетілген құрметке алғыс айтып, мерекемен құттықтады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
