Облыс әкімі Гүлшара Әбдіқалықова белгілі әнші-композитор, Қазақстанның еңбек сіңірген қайраткері Батырхан Шөкеновтің анасы Диляра Ибрагимқызы Шөкенованы қабылдады. Көзі тірі болғанда халықтың сүйікті әншісі күні кеше 58 жасқа толар еді. Кездесуде әншінің анасы облыс әкіміне Батырхан туралы жарық көрген кітапты және әндер жинағын тарту етті.
Батырхан Шөкеновтің туған күніне орай облыстық мәдениет, архивтер және құжаттама басқармасының бастамасымен және үйлестіруімен бірқатар мәдени шаралар ұйымдастырылуда. Сондай-ақ, жергілікті «Qyzylorda» телеарнасында тікелей эфир арқылы «Жаңа күн» бағдарламасынан арнайы сюжет көрсетілді, кешкі эфир мезгілінде көрермендер «Сағым дүние» концерті мен ұйымдастырылған флешмобты тамашалай алды.
Сонымен бірге, «СЫР ШАҢЫРАҒЫ» Youtube каналы мен әлеуметтік желілерде «Әуен-саздың шебері» тақырыбында бейнетаныстырылым көрсетіліп, «Сыр самалы» вокалды-аспапты ансамблі мен эстрада әншілерінің «Мәңгі іздеймін» атты онлайн концерті өтуде.
Мұнан бөлек, әрбір ниет білдіруші белгілі әншінің құрметіне ұйымдастырылған «Батырдың әндерін бірге шырқайық» атты флешмобқа қатысуға мүмкіндік алды. «Хабар» телеарнасының эфирінде Батырдың репертуарынан «Отан ана», «Джулия» және «Қайран көңіл-ай» атты үш әні шырқалды. Бұл әндерді жанкүйелер де бірге теледидар алдында орындап, оны бейнеге жазып, телеарнаның электронды поштасына жолдау арқылы шараға атсалысты.
«Хабар» телеарнасының тікелей эфиріне Нұр-Сұлтан, Алматы және Қызылорда қалаларының әншілері қосылды. Жергілікті өнерпаздар Б.Шөкенов атындағы саябақтан қосылып, әншінің танымал әндерін орындады.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
