Бүгін аймақ басшысы Нұрлыбек Нәлібаев «Өнер орталығындағы» «Жарқыра, жайна Жаңа жыл» атты балалар ертеңгілігіне қатысушыларды құттықтады.
Мереке «Оқушылар сарайының» өнерпаздары дайындаған қойылымнан басталды. Балалар қызықты кештің басты қонақтары – Аяз ата мен Ақшақарға өз өнерлерін көрсетті.
Облыс әкімі барша бүлдіршіндерді құттықтап, ізгі тілегін айтты.
«Балалар, сіздердің білімді, тәрбиелі, зияткер болып өсулеріңіз үшін аймақта үлкен жобалар қолға алынды. Нақты ғылымға ден қойған дарынды балаларға арналып физика-математика
мектеп-интернаты, шығармашылыққа бейім жеткіншектерге арналып «Инновациялық- шығармашылық орталығы» салынуда. Бұл орталықта ұстаздар сіздерді шығармашылыққа баулып, креативті идеяларыңызды шыңдайды. Биыл Қызылорда қаласының сол жағалауынан сіздердің бос уақыттарыңызды тиімді ұйымдастыруға мүмкіндік беретін 350 орындық «Оқушылар сарайы» салтанатты түрде ашылды.
Жаңақорған ауданының орталығынан да 200 орындық «Оқушылар үйі» мен 50 орындық «Өнер мектебінің» жаңа ғимараты ел игілігіне берілді. Бұл білім мен тәрбие ордаларында сіздер пікірлес жаңа достар табасыздар, жаңашылдыққа ұмтылып, ой-өрістеріңізді кеңейтесіздер.
Әлем – баламен, яғни сіздермен, сіздердің шат күлкілеріңізбен әдемі! Біз үшін сіздердің балғын жүздеріңізден тараған қуанышты көруден асқан бақыт жоқ. Жаңа Қазақстанның болашағы, елімізді әлем халықтарымен терезесін тең ететін ұлттың үміті де – сіздерсіздер!
Егемен еліміздің гүлденуі өздеріңіздің қолдарыңызда деп нық сеніммен айта аламын. Қанаттарыңыз талмай, бейбіт еліміздің көгінде шарықтап, ата-аналарыңыздың үмітін ақтаңыздар. Аспанымыз ашық, болашағымыз жарқын болсын! Жаңа жылдарыңыз құтты болсын, балалар», – деді аймақ басшысы.
Шыршаға келген жеткіншектер ойын ойнап, ән шырқады, театрландырылған қойылым тамашалады және естелік сыйлық алды. Сондай-ақ, мейрам қонақтарына арнайы фотосессия ұйымдастырылды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
