Биыл Қазақстан Республикасы мәслихаттарының құрылғанына 25 жыл толуда. Билік пен халық арасында дәнекер болып, ел мүддесі жолында жұмыс жасап келетін органның мерейтойы аясында “Жергілікті өкілді орган – мәслихаттардың өңір дамуындағы орны мен рөлі” тақырыбында ғылыми-практикалық конференция өтті.
Оған облыс әкімі Қуанышбек Ысқақов, облыстық мәслихаттың бұрынғы хатшылары, ардагерлер, облыстық мәслихаттың І-VI шақырылым депутаттары, аудандық мәслихаттардың І-VI шақырылым хатшылары, ғалым-ұстаздар қатысты. Шара облыстық мәслихаттың қоғамдағы рөлі турасындағы бейнероликтен бастау алды.
Мұнан соң облыс әкімі Қуанышбек Ысқақов сөз алып, тәуелсіздік мерекесімен тұспа-тұс келген мәслихат мерейтойымен құттықтады.
– Мәслихаттар институтының негізі 1993 жылы желтоқсанда «Қазақстан Республикасының жергілікті өкілді және атқарушы органдары туралы» Қазақстан Республикасы Заңының негізінде қаланды. Осыған орай, 1994 жылдың наурыз айынан бастап оған дейін өкілді орган қызметін атқарып келген облыстық, қалалық, аудандық кеңестер – жергілікті мәслихаттарға орын берді. Бұл енді ғана дербестік алған елімізге үлкен жауапкершілік болатын. Осы уақыт аралығында мәслихат үдеден шыға білді. Өйткені, өздеріне берілген өкілеттілік пен біліктіліктері арқасында жергілікті мәслихаттардағы депутаттар корпусы қоғамды одан әрі демократияландыруға, халықтың әл-ауқатын, тұрмыс жағдайын жақсартуға бағытталған экономикалық және саяси реформалардың жүзеге асуына өз үлестерін қосты. Сондай-ақ, мәслихат халық пен билік арасындағы алтын көпір бола отырып, өздерінің өкілеттік шеңберінде көптеген өзекті мәселелерді, қиын түйткілдерді, қордаланып қалған проблемаларды шешуге ықпал етті, – деді облыс әкімі.
25 жыл тарих үшін қас қағым сәт болуы мүмкін. Алайда, өткен күндердің өлшемімен қарағанда осы уақыт аралығында халық игілігі үшін қаншама қыруар тірлік атқарылғанын аңғару қиын емес. Аймақ басшысы бұл белеске облыстық мәслихат та үлкен жетістіктермен жетіп, елдің даму жолында беделді күшке ие болған халық қалаулылары алдағы уақытта да Сыр өңірінің дамуына аянбай еңбек ететініне сенім білдірді.
Конференция барысында облыстық мәслихат хатшысы Қылышбай Бисенов жергілікті өкілді орган – мәслихаттардың өңір дамуындағы орны мен рөлін сөз етті.
– 25 жылдық тарихында барлық деңгейдегі мәслихаттар – заң шеңберінде халықтың еркіндігі мен аманатын жүзеге асыратын мемлекеттік органға айнала білді. Алғашқы жылдардан бастап облыстық мәслихат жергілікті атқарушы органмен бірлесіп, ел Конститутциясы нормаларын, Президент Жарлықтарын, облыстың экономикалық даму бағдарламаларын іске асыруға белсене атсалысып келеді. Депутаттардың халықпен байланысы, еліміздің өркендеу жолындағы жұмысы мұнымен толастамайды, әрі қарай да жалғасын табатын болады, – деді Қылышбай Алдабергенұлы.
Мұнан әрі облыстық мәслихаттың ардагері Алмагүл Божанова жергілікті мәслихаттың қоғамдағы маңызын арттыру турасында баяндады. Сонымен қатар, жиында «Халықтың өмір сүруін қамтамасыз етудегі жергілікті өкілді басқарудың рөлі мен маңызы», «Мәслихаттар мен қоғамдық кеңестер – өзін-өзі басқару жүйесінің негізі» тақырыптарында да баяндамалар тыңдалды.
Жиын соңында аймақ басшысы бірқатар халық қалаулыларын “Nur Otan” партиясының “Белсенді қызметі үшін” төсбелгісімен, облыстың Құрмет грамотасымен және Алғыс хатпен марапаттады. Оның барысында “ҚР Құрметті инженері” атағын облыстық мәслихат депуттары Имамадин Оңғарбаев, Тілеуберген Шаутай, Имамзада Шағыртаев иеленіп, марапат төрінен көрінді.
Мейрамгүл ДАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
