Қазақстанда 10 наурыздан бастап “Наурыз” жеңілдетілген ипотекасы басталады. Өтініштер 31 наурызға дейін қабылданады. Бұл туралы Stan.kz ақпарат агенттігі хабарлайды.
“Наурыз” – жылдық мөлшерлемесі тұрақты 7–9% мемлекеттік ипотекалық бағдарлама. Бағдарламаның операторы – Отбасы банк.
Қатысушыларға қойылатын негізгі талаптар:
- Соңғы 5 жылда қарыз алушының және оның отбасы мүшелерінің (жұбайы, 18 жасқа дейінгі балалар) өз жеке баспанасы болмау керек;
- Отбасы банкінде кемінде 2 миллион теңге депозит болу керек. Депозит мерзімі маңызды емес.
“Наурыз” ипотекасының шарттары
Пайыздық мөлшерлеме:
- 7% – әлеуметтік осал топтарға;
- 9% – қалған азаматтарға.
Бастапқы жарна:
- 10% – таза әрленген пәтерлер үшін;
- 20% – әрленбеген немесе екінші нарықтағы пәтерлер үшін.
Қарыз лимиті:
- Алматы мен Астана – 36 миллион теңгеге дейін;
- Аймақтар – 30 миллион теңгеге дейін.
Қарыз мерзімі: 19 жылға дейін.
“Наурыз” бойынша не сатып алуға болады
- Астана, Алматы, Шымкент және облыс орталықтарында – тек жаңа құрылыстағы тұрғын үйлер, оның ішінде Құрылыс жинақтағы кооператив кепілдігімен салынған кешендер.
- Аймақтар мен моноқалаларда – жаңа және екінші нарықтағы тұрғын үйлер, оның ішінде жеке үйлер.
Облыс орталықтары: Ақтау, Ақтөбе, Атырау, Қарағанды, Көкшетау, Қостанай, Қызылорда, Қонаев, Павлодар, Петропавл, Семей, Жезқазған, Талдықорған, Тараз, Түркістан, Орал, Өскемен.
“Наурыз” ипотекасына қалай өтініш беруге болады
- Ноутбук немесе компьютермен Отбасы банкінің сайтына кіріп, Baspana Market бөліміне өтіп, тіркелу қажет.
- “Менің өтініштерім” мәзірінде “Наурыз” бағдарламасын таңдап, “Өтініш беру” батырмасын басыңыз.
- Сатып алу және тұру аймағын көрсетіп, шарттарға келісіп, жалғастырыңыз.
- Депозит таңдаңыз, келісімді растап, SMS-кодты енгізіңіз.
- Деректерді тексеріп, растап шығыңыз.
- Банк тұрғын үй бар-жоғын және мүлік мәртебесін тексереді. Бұл 3 жұмыс күніне дейін уақыт алуы мүмкін.
- Тексеруден кейін өтінішке ЭЦҚ арқылы қол қойыңыз.
Өтініштер тек жұмыс күндері, 9:00-21:00 аралығында қабылданады.
“Наурыз” ипотекасында депозиттегі жинақ маңзды рөл ойнайды. Отбасы банк осы жинаққа сыйақы (вознаграждение) қосады. Сыйақы мөлшері кнесиеге өтініш беруге қажетті баллдарды жинауға көмектеседі.
“Наурыз” ипотекасы екі кезеңнен тұрады:
Алдын ала қарыз – 8 жыл. Төлем жоғары болады: бір бөлігі пайызға, бір бөлігі депозиттегі жинаққа кетеді.
Тұрғын үй қарызы – 11 жыл. Депозитте тұрғын үй құнының 50%-ы жинақталғаннан кейін пайыздық мөлшерлеме төмендейді, ай сайынғы төлем азаяды.
