Мемлекет басшысы мен Үкіметтің қолдауы Сыр еліндегі жарқын бастамаларға үлкен дәнекер болып отыр. Облыс жоспарланған барлық негізгі макроэкономикалық көрсеткіштердің өсімі қамтамасыз етілді.
Аймағымыздың әлеуметтік-экономикалық даму барысы туралы сөз болғанда жалпы өңірлік өнім көлемі көрсеткіштерінің өзі де көп нәрсеге көз жеткізеді.
2025 жылдың қорытындысымен жалпы өңірлік өнім көлемі 3 трлн 700 млрд теңгеге жетіп, 2021 жылмен салыстырғанда 2 есеге артты. Ал облыс бюджеті 2021 жылмен салыстырғанда, өсім 234 пайызды құрады.
Даму бюджетінің көлемі 2021 жылы 47 млрд теңге болса, 2025 жылы 4,3 есе артқан.
Мұны жылдам қарқынды үдеріс деп атаса да болады. Әрине, оның астарында тынымсыз еңбек ырғағы мен халықтың ынтымақ-бірлігі жатыр.
Аймақ басшысының облыс тізгінін ұстаған алғашқы күннен қолға алып, қатаң бақылау жасаған жұмысының бірі – облыс бюджетінің орынсыз жұмсалмауы, әр тиынның үлкен ғимараттың бір кірпіші сияқты өз орнына қалануы болды. «Қара қазан қайнаса, баршамызға ортақ» деп аталарымыз айтқандай, бұл істің берекесі бесенеден белгілі.
Бюджет қаражатын оңтайландыру мақсатында 2022 жылдан бастап әлеуметтік салаға терең талдау жүргізілді. Нәтижесінде 108 млрд теңге қаржы үнемделді. Оның ішінде, білім саласынан 68 млрд 300 млн теңге, мәдениет және спорт саласынан («Арт-спорт» бағдарламасынан) 15 млрд 400 млн теңге, әлеуметтік қорғау саласынан 8 млрд 200 млн теңгенің мақсатсыз жұмсалуына жол берілмеді (87,9 млрд теңге).
Сонымен бірге, әлеуметтік нысандардың құрылысын жүргізу барысында 20 млрд 100 млн теңге қаржыны үнемдеу шаралары қабылданған. Атап айтсақ, мектептер жанынан қосымша ғимараттар салу, әлеуметтік мекемелерді «Руханият» орталықтарына шоғырландыру жұмыстары жүргізілсе, ал демеушілер есебінен жобалардың жоба-сметалық құжаттары әзірленді.
Үнемделген қаражат аймақтың ең өзекті деген мәселелерін шешуге, жаңа инфрақұрылымдық жобаларды іске асыруға бағытталуда.
«Мемлекет басшысының «Туған жерді бірге түлетейік!» бастамасын кәсіпкер-меценаттар, қоғамдық қорлар белсенді қолдап, Сыр өңірін көркейтуге өз үлестерін қосып келеді. 2022 жылдан бері кәсіпкер азаматтар аймақтағы жаңа жобаларға 55 млрд теңгеден астам қаржысын салды», – деді облыс әкімі Астанада өткен брифингте.
Біз мұны Сыр азаматтарының ауызбірлікті, елге деген ерекше сүйіспеншілікті жоғары ұстай білген жомарттықтары деп бағалаймыз.
Инвестиция – игілік көзі
2022-2025 жылдары облыс экономикасына 2 трлн 341 млрд теңге инвестиция тартылған. Ал өткен жылы бұл бағыттағы көрсеткіш 774 млрд теңгеден асты. Тағы да салыстырмалы 2021 жылмен шендестірсек, өсім – 250 пайыз.
Жеке инвестицияның үлесі 72 пайыз, шетелден 280 млн АҚШ долларын құрайтын инвестиция құйылған.
Экономиканы әртараптандыру мақсатында алдағы үш жылда 2 трлн 800 млрд теңгеге 98 инвестициялық жоба жүзеге асырылып, 12 мыңнан аса жаңа жұмыс орны ашылады деген жоспар бар. Ал 2025 жылы 300 млрд теңгеден астам қаржыға 27 инвестициялық жоба іске қосылды.
Мұның мысалдарын келтіре кетейік. Жаз айында 5 млрд теңгеге толық автоматтандырылған «Қызылорда Саз-М» серіктестігінің кірпіш зауыты ашылды. Зауыт жылына 90 млн кірпіш шығарып, жергілікті құрылысқа қажетті сұраныстың 90 пайызын қамтамасыз етуде.
Жалпы құны 5 млрд 600 млн теңгені құрайтын «Қызылорда Нан» серіктестігінің нан, кондитерлік-макарон өнімдерін өндіретін кешені іске қосылды. Бұған қоса, 753 млрд 300 млн теңгені құрайтын 14 ірі жобаның құрылысы басталуда. Оның да мысалдарын келтіреміз: 414 млрд 700 млн теңгеге «Шалқия» кен-байыту фабрикасы; 161 млрд 400 млн теңге болатын «Кальцийленген сода» зауыты; 60 млрд теңгеге «Seven Rivers Technologies» компаниясының бөтелке шығаратын зауыты; 37 млрд 800 млн теңгені құрайтын оңтүстік кореялық «With you E&C» компаниясының тұрмыстық қатты қалдықтар өңдеу зауыты.
«Табиғи тас Қызылорда» серіктестігі қуаттылығы жылына 1 млн 100 мың тонна әк шығаратын зауытты іске қосу жұмыстарын жүргізуде. Оның құны 17 млрд 300 млн теңге.
Испандық «Roka Group» компаниясымен жылына 500 мың бұйымға дейін санитарлық-техникалық өнімдер шығаратын жоғары технологиялық зауыт салу жөнінде инвестициялық келісім бар. Құны 44 млрд теңгелік, 300-ге жуық жұмысшы мен маманды жұмысқа тартатын мұндай зауыт елімізде алғашқы болып Қызылордадан бой көтермек. Жерлестеріміз бұл игілікке алдағы жылы қол жеткізеді. Сонымен бірге «Fabe Agro» компаниясы құны 134 млрд 500 млн теңге болатын жылыжай салу жобасын жүзеге асырмақ.
Ал аграрлық-индустриялық кластер құру мақсатында 51 млрд теңгеге швейцариялық «Harvest Agro» компаниясы техникалық қара сора, жүгері мен сояны өсіру, қайта өңдеу және 40 млрд теңге болатын жүгері дақылын терең өңдейтін крахмал-сірне зауытының құрылысын бастап кетті.
Үкімет қаулысымен 2025 жылдың мамыр айында Қызылорда қаласында аумағы 550 гектарды құрайтын «Қорқыт Ата» арнайы экономикалық аймағы құрылды. Аймаққа өндірістік нысандарды орналастыру мақсатында отандық, шетелдік инвесторлармен келіссөздер жүргізілуде. Бұл жерде өңіріміздің өнеркәсіптік логистикалық әлеуетіне сәйкес келетін экономикалық қызметтің 18 түрі іске асырылады. Қазіргі таңда инженерлік инфрақұрылыммен қамтамасыз ету жұмыстары басталды.
Міне, жарқын өмірдің жаңа бейнесін көз алдыңызға алып келетін қаншама қарбалас жұмыстың бүгінгі барысы осындай.
Барлық істің басында жақсылық тұр
(кәсіпкерлік, агроөнеркәсіп, инфрақұрылым)
Кәсіпкерлікті қолдауға 2022-2024 жылдары әртүрлі көздерден 203 млрд 81 млн теңгенің 16 мың 634 жобасы қаржыландырылды. Оның 37 млрд 962 млн теңгесі мемлекеттік бағдарлама аясында қолдау тапты.
2025 жылы барлық қаржы көздерінен 40 млрд теңгеге жеке кәсіпкерліктің 2 мың 464 жобасы қаржыландырылды. Нәтижесінде кәсіпкерліктің экономикадағы үлесі 21 пайыздан асты (2022 ж. – 19,1%, 2023 ж. – 19,9%, 2024 ж. – 22,7%).
2023-2025 жылдары «Ауыл аманаты» жобасы аясында 100-ден аса елді мекендерде 6 млрд 828 млн теңгеге 943 жоба жүзеге асырылып, жаңадан 1303 жұмыс орны ашылды.
Облысымыздың негізгі саласы агроөнеркәсіп кешенін дамытуға соңғы 3 жылда 43 млрд теңге қаржы бөлінді. Шаруашылықтар есебінен 58,2 млрд теңгеден астам инвестиция тартылды. Сала бойынша 11 млрд 600 млн теңгені құрайтын 16 инвестициялық жоба жүзеге асырылды.
Ауыл шаруашылығындағы жалпы өнім көлемі 233 млрд 442 млн теңгеге жетті.
Аймақтың дамуына «Абзал және К» ТС сынды ірі құрылымдардың қосып отырған үлесі де қомақты. Н.Ілиясов ауылында күріш егіп, алынған өнімді компания зауытында өңдейтін еңбек ұжымы өнімдері қазақстандық нарықпен қатар Ресей, Украина, Тәжікстан, Өзбекстан, Моңғолия, тағы басқа елдерге сатылады.
Сонымен бірге «Абзал и К» ТС бизнестің әлеуметтік жауапкершілігі аясында ұзақ жылдан бері елді мекеннің әлеуметтік-экономикалық дамуына инвестиция салып келеді.
«Ауылда жастардың жұмыс істеуіне, өмір сүруіне қолайлы жағдай жасалған. Осындай ауылдарды көбейтуіміз керек. Оған шамамыз да, қаражатымыз да жетеді. Кәсіпкерлермен кездескенімде елді мекендерге қаржы салып, көмектесу керек деп үнемі айтып келемін. Нағи Ілиясов басқа ауылдарға да үлгі болуы қажет», – деген еді Президент Қасым-Жомарт Тоқаев Сыр еліне келген сапарында.
Облысымыздағы бір ауылдың тұтас елге үлгі болуының өзі Сыр халқының ынтымағының, ежелден келе жатқан еңбек дәстүрінің беріктігі болса керек. Бұған қоса мемлекеттен лайықты қолдау көрсетілудің де нәтижесі екені анық.
Мемлекеттік қолдаудың аясында облысымызда 2022-2024 жылдары 21 млрд 800 млн теңгеге 647 дана техника алынды. 2025 жылы 4 млрд 700 млн теңгеге машина-трактор паркі 139 ауыл шаруашылығы техникаларымен толықтырылды.
Президенттің тапсырмасына сәйкес, облысқа Премьер-министр бастаған Үкімет делегациясы арнайы келіп, шаруалардың жағдайымен, егістің жай-күйімен танысты. Нәтижесінде Төтенше жағдайлар министрлігі тарапынан еліміздің барлық өңірлерінен 139 қызметкерден құралған жеке құрам көмекке жеткізіліп, 2 ай бойы егінді сақтап қалуға жұмыс жасады.
Мемлекет басшысының тапсырмасымен Үкімет резервінен 53 насос қондырғысы алынды. Дер кезінде қабылданған шешімдердің негізінде егін алқаптары толығымен сумен қамтамасыз етілді. Өткен жылы диқандар күріш егістіктерінің 60 мың гектарын лазерлік тегістеуден өткізді. Өнімділік 30 пайызға артты.
Өңірдің өсімдік шаруашылығын әртараптандырып, су үнемдеу технологиясын кеңінен енгізуге бағытталған мемлекеттік қолдау шараларына алдағы 3 жылға 34 млрд теңгеден астам қаржы бөлінді. Биыл 10 млрд теңгеге жуық қаржы қарастырылды.
Өткен жылы су үнемдеу технологияларын пайдалану көлемі 8 мың 100 гектарға жеткізіліп, 2024 жылмен салыстырғанда 2 есеге артты (2024 жылы – 4,4 мың гектар).
Облыстың 3 ауданында (Шиелі, Қазалы, Арал) шетелдік компаниялардың қатысуымен су үнемдеу технологияларын қолдану арқылы жүгері, жоңышқа дақылдарын егу бойынша 3 ірі жоба жүзеге асуда.
2025 жылы 189 мың 600 гектарға егін егілді. Негізгі дақыл – күріштің әр гектарынан 58,1 центнерден өнім алынып, 470 мың тоннаға жуық астық жиналды.
Ел Президентінің қолдауымен Қызылорда қаласында 215 млрд теңгеге қуаттылығы 240 мегаватты құрайтын жаңа жылу-электр орталығы салынды. Оны «Акса Энерджи» түрік инвесторы іске асырды.
Бұл – тәуелсіздік жылдарындағы инвестор қаржысына салынған маңызды ірі жобалардың бірі. Жаңа орталық 240 мегаватт электр қуатын, 277 гигакалория жылу энергиясын өндіреді. Орталық өңірімізді қажетті электр энергиясымен толық қамтамасыз етіп қана қоймай, бір бөлігін аймақтан тыс жерлерге сатуға мүмкіндік береді.
Қандай істің қабатында да халықтың жайлы өмірі, әлеуметтік әлеуеті басты орында тұрады.
Қызылордалықтар арманына айналған көпқабатты тұрғын үйлерді ыстық сумен қамтамасыз ету ісінің игілігін көре бастады. Бұған 26 млрд 200 млн теңге қарастырылған.
Әркімнің үйінде төбеме құлап кете ме екен деген кемі 50 литрлік су жылытқыш құрылғылар тұратын. Енді қалалықтар бұл қауіптен құтылады және электр қуаты үнемделеді.
2022-2024 жылдары өңірде «Ауыл – ел бесігі» жобасы аясында 78 ауылда әлеуметтік, инженерлік инфрақұрылымдарды дамытуға бағытталған 31 млрд 600 млн теңгеге 343 жоба жүзеге асырылды.
2025 жылы 15 млрд 155 млн теңгеге 41 елді мекенде 66 жоба іске асырылды (республикалық бюджеттен 9,6 млрд теңге, облыстық бюджеттен 5,5 млрд теңге).
Мемлекет басшысының тапсырмасына сәйкес барлық елді мекендер 100 пайыз орталықтандырылған сапалы ауызсумен қамтамасыз етілді.
Аймағымызда 2022-2025 жылдар аралығында 65 млрд 100 млн теңгеге 77 жоба жүзеге асырылып, газдандыру көрсеткіші 83 пайызға жетті.
Тұрғындарды электр энергиясымен қамту бағытында 2022-2025 жылдары 24 млрд 200 млн теңгеге 71 жоба жүзеге асырылды (нәтижесінде өңіріміздегі электр желілерінің тозу деңгейі 60,8 пайызға төмендеді).
Өңіріміздегі ең қарқынды жұмыстың бірі – көшелер мен жолдардың жаңғыртылуы.
2022-2025 жылдары 1600 шақырым автомобиль жолдары мен 30 көпір өткелін салуға, күрделі жөндеуден өткізуге 150 млрд теңгеден астам қаржы бөлінді. Қызылорда қаласындағы 270 көше жөндеуден өтіп, жақсы жағдайдағы жолдардың үлесі 95 пайызға жетті.
Жақында ғана «Қызылорда-Жезқазған» автомобиль жолының облыс аумағындағы 192 шақырымы қайта жаңғыртудан өтіп, ел игілігіне берілді.
«Атты жол сынайды, адамды жолдастық сынайды» демекші, бүгінде Қызылордаға сырттан келгендер жол жайлылығын айтып, тамсанып жүр.
4 млрд 588 млн теңгеге Арал, Жаңақорған аудандарында теміржол үстінен өтетін көпірлер пайдалануға берілді.
Қызылорда қаласындағы теміржоласты автожол құрылысы қарқынды жүргізілуде, жақын арада ел игілігіне табысталмақ.
Биыл 5 млрд 515 млн теңгеге Қармақшы ауданында теміржол арқылы өтетін көпірдің құрылысы басталмақ.
Мемлекет басшысының тапсырмасына сәйкес, Қызылорда қаласынан Ақтөбе облысы бағытындағы автомобиль жолын 4 жолақтыға ауыстыру бойынша демеушілер есебінен 350 млн теңгеге жоба әзірленіп, бұл күрделі жұмыс та қолға алынды.
Екінші бөлігі – Ақтөбе шекарасына дейінгі 462 шақырымның техникалық- экономикалық негіздемесі әзірленді. Жоба құны 832 млрд 812 млн теңгені құрайды.
Президентіміз Жолдауында «Сексеуіл-Бейнеу» автомобиль жолының құрылысын жеделдетуді тапсырған болатын. Автожолдың жалпы ұзындығы 559 шақырымды құрайды. Оның 189 шақырымы Арал ауданының бірқатар ауылдары арқылы өтетіндіктен (Сексеуіл, Құланды, Ақбасты, Ақеспе, Қосаман) өңірдің ең шеткі елді мекендерінің жол қатынасы жақсаратын болады.
Соқ, еңбек балғасы
(көлік-логистика мен құрылыс)
Қызылорда қаласында «Қорқыт Ата» әуежайының жаңа терминалы ел игілігіне пайдалануға берілді. Жобаны іске асыруға 16 млрд 700 млн теңге жеке инвестиция тартылды. Жергілікті бюджеттен инженерлік-коммуникациялық инфрақұрылым тартуға 4 млрд 300 млн теңгеден астам қаражат бөлінді. Жаңа терминалда халықаралық стандартқа сәйкес жолаушыларға барлық қызметтер сапалы түрде көрсетілуде.
Әрине, мұның бәрі біріншіден, Мемлекет басшысының қолдауы нәтижесінде іске асырылды.
Сырдарияның сол жағалауында жаңа ғимараттардың бой көтеріп, көз тартуы қаланы ерекше кейіпке айналдырды. Осы сол жағалаудан 975 млн теңгеге заманауи үлгідегі автовокзал ғимараты салынды. Қазір бұл жерден өзге өңірге қалааралық автобустар қатынайды.
«Қазақстан темір жолы» компаниясы мен жергілікті кәсіпкерлердің демеушілігімен 600 млн теңгеден астам қаржыға облыс орталығындағы теміржол вокзалы күрделі жөндеуден өтті. Бұдан бөлек, Қазалы, Төретам, Шиелі, Жаңақорған аудандарында вокзалдар күрделі жөндеуден өткізіліп, Арал, Сексеуіл, Жалағаш, Тереңөзек вокзалдары қайта салынуда.
Облыс орталығына 300 жаңа автобус алынып, қоғамдық көлік мәселесі толығымен шешімін тапты. Облыстық бюджеттен бөлінген 1 млрд теңгеге 100 экотакси сатып алынып, қалалықтарға сапалы қызмет көрсетіп келеді.
Сыр еліндегі ең қарқынды, тоқтаусыз жүргізіліп отырған жұмыстың бірі – құрылыс. 2022 жылдан бері өңірімізде 200-ге жуық әлеуметтік нысан салынып, ел игілігіне берілді.
2022-2024 жылдары тұрғын үй кезегінде тұрған 5 мыңнан аса тұрғын қоныс тойын тойлады. Соңғы 3 жылда алғаш рет барлық аудандарда тұрғындарға жаңадан 1800-ге жуық пәтер кілті табыс етілді. Ал өткен жылы 3600 пәтерлі тұрғын үй салуға бюджеттен 58 млрд 785 млн теңге бөлінді.
Білім беру саласында бірегей жобалар іске қосылды
Облыста білім беру саласына 2022-2024 жылдары 812 млрд 245 млн теңге бөлінсе, өткен жылы 346 млрд 800 млн теңге қаралған. Айта кетейік, 2024 жылы аймақта қарқынды құрылыс болып, 31 млрд 800 млн теңгеге жаңадан 13 білім беру ұйымы ашылды.
«Келешек мектептері» ұлттық жобасы аясында 54 млрд 391 млн теңгеге бүгінгі заман талабына сай 10 жаңа мектеп салынып, пайдалануға берілді. Бұдан бөлек, 2023 жылдан бері 5 млрд 700 млн теңгеге 9 мектеп жанынан қосымша ғимарат бой көтеріп, үш ауысымдық мектептер мәселесі түбегейлі шешімін тапты.
Тағы бір игілікті іс, кәсіпкерлердің демеушілігімен Арал ауданы Тоқабай ауылындағы апаттық мектептің орнына 500 млн теңгеге жаңадан білім ошағы, «Білімді қолдау қоры» арқылы 2 млрд 333 млн теңгеге Мергенсай ауылында салынған 150 орындық мектеп, 8 млрд 400 млн теңгеге физика-математика бағытындағы мектеп-интернаты салынды.
Облыс орталығынан 11 млрд теңгеге бой көтерген балалар мен жасөспірімдерге арналған «Сыр жұлдыздары» академиясының ашылуы білім алушыларға арналған бірегей жоба десек қателеспейміз. Айта кетейік, аймаққа келген сапарында Мемлекет басшысы академияның жұмысын көріп, жоғары баға берді.
Саладағы серпінді бастамалар қатарында 3 млрд теңгеден астам қаржыға 3 ауданда «Оқушылар үйі» мен «Өнер» мектептері пайдалануға берілгенін атап өткеніміз жөн.
«ҚазМұнайГаз» Ұлттық компаниясының демеушілігімен Қызылорда қаласында салынған 2 млрд 500 млн теңгеге заманауи үлгідегі 350 орындық «Оқушылар сарайы» бүгінде балалардың игілігіне қызмет етуде.
Шаһардың сол жағалауынан 4 млрд 800 млн теңгеге сәулеті келіскен музыкалық колледждің жаңа оқу ғимараты мен жатақханасы ел игілігіне табысталды. Бұл өнер жолын таңдаған түлектерге ерекше қолдау болды.
Бұдан бөлек, Президент саябағында 10 млрд теңгеге 300 орындық жыл бойы жұмыс жасайтын заманауи балалар тынығу лагері бой көтеруде. Саябақта 5 млрд теңгеге Ботаникалық білім беру орталығының ғимараты салынуда. Сонымен қатар, Қызылорда қаласында 5 млрд 200 млн теңгеге жұмысшы мамандарды даярлауға арналған «Құзыреттілік орталығы» ғимаратының құрылысы басталды.
Мемлекет басшысының тапсырмасын орындау мақсатында Корея Республикасының жетекші жоғары оқу орындарының бірі – Сеул ұлттық ғылым және технологиялар университетімен жүргізілген келіссөздер аясында 2023 жылдан бастап Қорқыт ата атындағы Қызылорда университетінің базасында Жасанды интеллект институты ашылып, қызмет көрсетуде.
Денсаулық сақтау саласын дамытуда серпін бар
«Ауылда денсаулық сақтауды жаңғырту» ұлттық жобасы аясында өңіріміздің барлық ауданында 10 млрд 763 млн теңгеге 28 медициналық нысан пайдалануға берілді. Ал Қызылорда қаласында 54 млрд 321 млн теңгеге 300 орындық көпбейінді аурухана салынуда. Сонымен қатар, 5 млрд 400 млн теңгеге 4 аудандағы орталық ауруханалар жанынан жаңа қосымша ғимараттар, екі ауданда 4 млрд 500 млн теңгеге жұқпалы аурулар бөлімшесінің жаңа ғимараттары бой көтерді.
Облыс орталығында 48 млрд 500 млн теңгеге 200 орындық перинаталдық орталық ғимараты мен 14 млрд 780 млн теңгеге 500 орындық емхана салуға Үкіметпен келісім жасалып, тиісті қаулы қабылданды. Жақын күндері аталған нысанның, 10 млрд теңгеге 400 орындық емхананың құрылысы басталады. Сондай-ақ тұрғындар сұранысына сәйкес кейінгі 2 жылда жергілікті бюджеттен 5 млрд 400 млн теңгеге 225 жаңа санитарлық автокөлік, 45 жедел жәрдем көлігі алынып, пайдалануға берілді. Аймақтағы денсаулық сақтау ұйымдарының жабдықталу деңгейі 90,2 пайызға жетті. (Республикалық деңгей 85,6%).
Медицина саласы мамандарының білімін жетілдіріп, тәжірибесін толықтыруына да лайықты қолдау бар. Атап айтсақ, 2024 жылы 15 дәрігер маман Түркияның жетекші медициналық клиникасында тәжірибе алмасса, 2025 жылы 41 медицина қызметкері Германия, Ресей, Литва, Беларусь елдеріндегі үздік дәрігерлік клиникаларында біліктілік арттырды.
Мәдениет пен руханияттың маңызы ерекше
2022 жылдан бері өңірімізде 22 мәдениет нысаны жаңадан бой көтерді. Атап айтқанда, барлық 7 ауданда 11 млрд 500 млн теңгеге «Руханият» орталықтары, Қызылорда қаласында «Отбасы орталығы», «Анаға тағзым» орталығы, көпфункционалды мың орындық «Өнер орталығы» салынып, ел игілігіне табысталды.
Өткен жылы Қызылорда қаласының астана болғанына 100 жыл толуына орай 2 млрд 300 млн теңгеге облыстық тарихи-өлкетану музейінің заманауи жаңа ғимараты пайдалануға берілді.
Биыл Ассамблеяның 30 жылдығы аясында Қызылорда қаласында «Қазатомөнеркәсіп» ұлттық компаниясының» қолдауымен 3 млрд 800 млн теңгеге жаңа «Достық үйі» салынды.
Мәдениет саласының өкілдеріне көпқабатты тұрғын үй салынып, 40 қызметтік пәтер табысталғаны сала мамандарына деген ерекше қолдаудың үлгісі болды.
Саладағы серпінді жұмыстардың көрінісі, жаңадан симфониялық оркестр, инклюзивті театр, жастар театры, заманауи би, хор ұжымдары құрылды. Сыр мәдениетінің негізгі бренді, жыраулық дәстүр өкілдерінің отауы – «Жыраулар үйі» ашылды. Тағы бір тың бастама, жыл сайын мәдениет, өнер, әдебиет өкілдерін қолдау мақсатында «Тұран» сыйлығын табыстау дәстүрге айналды.
Бұған дейін Астана, Алматы қалаларында Қызылорда облысының мәдениет және өнер күндері өткізілген болатын. Ал өткен жылы ағартушы, ұлы ақын Абай Құнанбайұлының 180 жылдық мерейтойына орай Абай, Шығыс Қазақстан облыстарында облыстың өнер күндері ұйымдастырылды.
Өнер майталмандары Наурыз мерекесін, еліміздің салт-дәстүрлерін халықаралық деңгейде насихаттап, Испания, Финляндия, Эстония елдерінде маңызды шаралар өткізді.
Ұлттық мереке – Республика күніне орай Швейцарияның бірқатар қаласында Қызылорданың мәдениет және өнер күндері өтті.
Спорт: 11 мың орындық стадион
Ел Президенті Қасым-Жомарт Кемелұлының аймақтарда спорт инфрақұрылымын, оның ішінде стадиондар мен спорт кешендерін салу туралы тапсырмасына сәйкес өткен жылы Қызылорда қаласында 11 мың орындық жаңа стадион салынды. Жалпы 2022 жылдан бері аймақта 23 спорт кешені бой көтеріп, ел игілігіне табысталды.
Облыс орталығындағы ірі жобалардың бірі – аумағы 25 мың шаршы метр, құрылысына 20 млрд 500 млн теңге бөлінген көпбейінді «Қызылорда Арена» спорт кешені. Сондай-ақ «СамұрықҚазынаТраст» қорымен бірлесіп, 3 млрд 400 млн теңгеге «Теннис орталығы» ашылды.
Президенттің бастамасымен құрылған «Қазақстан халқына» қорының қолдауымен 2 ауданда жаңа спорт кешендері салынды. Бұдан бөлек, 2 млрд 900 млн теңгеге Қызылорда қаласында мүмкіндігі шектеулі жандарға арналған инклюзивті спорт орталығы пайдалануға берілді.
Жергілікті кәсіпкерлердің демеушілігімен 1 млрд 600 млн теңгеге 80 спорт-ойын алаңы салынды.
«Таза қазақстан»: Қызылорда – ең таза қала!
«Таза Қазақстан» республикалық экологиялық бағдарламасы аясында аймағымызда көркейту-көгалдандыру, елді мекендерде абаттандыру жұмыстары қарқынды жүруде.
Нақтырақ айтсақ, өткен жылы 6 млрд 300 млн теңгеге Қызылорда қаласындағы мәдени-демалыс паркі, 1 млрд 64 млн теңгеге Қорқыт ата мемориалды аллеясы, 15 млрд теңгеге Президент саябағы қайта жаңғыртудан өтті. Аталған демалыс орындары тұрғындардың серуендеп, тынығуына тұрақты түрде қызмет ететін қаладағы жайлы, көрікті орындардың біріне айналды.
Бүгінде Президент саябағы қасынан 20 млрд теңгеге бес жұлдызды қонақүйдің құрылысы жүруде. Сондай-ақ 9 млрд теңгеге саябақтан Сырдария өзені үстінен өтетін жаяу жүргіншілер көпірі салынады.
Жалпы «Туған жерді бірге түлетейік!» бастамасы аясында кәсіпкер-меценаттар, қоғамдық қорлар Сыр өңірін көркейтуге өз үлестерін қосуда. Соның көрінісі, 2022 жылдан бері аймағымызда кәсіпкерлер демеушілігімен 55 млрд теңгеден астам қаржыға жаңа жобалар жүзеге асуда.Бұл бағыттағы маңызды бастаманың бірі – облыстық «Үлгілі елді мекен» конкурсы 2023 жылдан бері тұрақты өткізілуде. 2023-2025 жылдар аралығында облыстық бюджеттен 2 млрд теңге қаржы бөлініп, үлгілі ауылдарға 67 арнайы техника табысталды.
Айта кетейік, «Үздік туристік ауыл – 2025» ұлттық байқауының қорытындысы бойынша Нағи Ілиясов ауылы еліміздегі үздік 5 туристік ауылдың қатарына енді.
Осындай табанды жұмыстардың нәтижесінде Қызылорда облысының тазалығы еліміздің барлық өңіріне үлгі болып тұр десек, артық айтқандық емес. Бұл – қаламызға сырттан келген меймандардың бағасы.
«Сыр бойының» тілшілер тобы
