Былтыр білім беру жүйесі бұрынғыдан әлдеқайда өзгеше қалыпқа түсті. Тосын шешімдер қабылданған, тәуекелге толы кезең болса да, бастысы ата-ана, мұғалім, бала атты «үштік одақ» үшін тиімді шешімдер қабылданды. Дәстүрлі жүйеден бөлек денсаулыққа қауіпсіз онлайн оқыту форматы таңдалды. Қашықтан оқытуды ұйымдастырудың арнайы алгоритмі әзірленді.
Бүгінде экономикалық жүйені жақсартуды көздеген әлемнің қай елінде де адами капитал алғашқы орында. Себебі экономикаға күш салған мемлекет алдымен ғылым, білім сынды адами капитал компоненттеріне баса мән беруі керек. Елімізде де былтыр білім саласында қиындықтар туындағанына қарамастан, оңтайлы шешімдер қарастырылды.
Қашықтан оқыту жүйесінде балаларға керек басты дүниенің бірі – компьютерлік техника. Сол себепті құрылғысы мүлде жоқ оқушыларға мектеп балансындағы 14 мың компьютер берілді. Мұнан бөлек, республикалық қаржы есебінен 22870 электронды құрылғы алынып, көпбалалы және арнайы санаттағы отбасылардың балаларына табысталды. Айта кету керек, пандемия аяқталып, қалыпты тіршілікке оралғанда электронды техникалар мектептің балансына өтеді. Мұнан бөлек, жергілікті бюджет есебінен 2492 планшет, демеушілер есебінен 1518 оқушыға ноутбук пен планшет таратылды. Бұл орайда ұстаздарға да қолдау көрсетіліп, электрондық техникасы жоқ педагогтарға қайтарымсыз негізде 306 ноутбук сыйланған.
Өткен жылы педагогтарға арналған жаңа заңның қабылдануы мәртебесі төмен, құқығы шектеулі саналып келген мамандық иелерінің бірқатар басымдыққа ие болуына жол ашты. Мұғалімдердің кәсіби құқығының қорғалуы заң аясында бекітіліп, айлық жалақысы артуда. Сондай-ақ, былтыр педагог мамандығын таңдаған жастардың қатары бұрынғыдан әлдеқайда жоғары болды. Өткен жылы 6060 мектеп түлегінің 83,5 проценті ұлттық бірыңғай тестілеуге қатысып, нәтижесінде 3948 талапкердің 77 проценті жоғары оқу орнының грантына қол жеткізді. Мектеп бітірушілердің 98 проценті университет пен колледжде оқуларын жалғастыруда.
Сапалы білім, креативті идея, биік мақсатты біріктірген мұғалімдерге деген қолдау да бөлек болды бұл жылы. Үздік ұстаздарға «Білім беру саласын дамытудағы еңбегі үшін» деген арнайы төсбелгі тағайындалды. Сондай-ақ, педагогикадағы ерекше еңбегі мен жоғары дәрежедегі жетістіктері үшін 10 ұстаз 300 айлық есептік көрсеткіштегі, яғни 833 мың теңге көлеміндегі қаржылай сыйақыға ие болды. Ал, республикалық «Үздік ұстаз» байқауында Сыр елінің педагогы, балабақша тәрбиешісі Зина Бердібекова 2 миллион 778 мың теңге қаржылай сыйақының иегері атанды. Мұғалімдер мерекесі қарсаңында сала мамандарына ноутбук, жолдамалар табысталып, республикаға танымал, білікті, абыройлы 10 ұстаздың бейнесі қала, аудан орталықтарының басты көшелеріне билбордқа ілінді.
Кейінгі кезде ауылдарда да еңселі білім ордаларының көбейгені қуантатын. Бүгінде ауыл мектептерінің де осал еместігі, қаламен деңгейлес екені байқалды. Өткен жылы үздік білім беру ұйымы конкурсын ауыл мектебі жеңіп, 17 миллион теңгенің сертификатын иеленді. Келесі жыл бұл қаржы екі есеге өсіп, яғни 34 миллион теңге табысталмақ.
Оқу орындарының жаңа кейіпке еніп, көркі кіріп қалғанын да аңғару қиын емес. Бірнеше жылдан бері жөндеуді қажет еткен 55 білім беру нысаны қайта жаңғыртылды. Қызылорда қаласынан және Жалағаш ауданынан 3 мектеп ел игілігіне берілсе, бүгінде тағы 3 мектептің құрылысы жүргізілуде. Жеке мектептер білім саласындағы бәсекелестікті күшейтіп, орын тапшылықты төмендетуге жол ашатыны белгілі. Жақында ғана облыстағы сегізінші жеке «Зерде» мектебі ашылды. Аймақта үш мектеп апатты жағдайда деп танылған болатын. Өткен жаңа оқу жылында Жалағаш ауданындағы 140 орындық мектеп пайдаланылуға берілсе, Жаңақорған ауданында мектеп құрылысы жүргізілуде. Сондай-ақ, Арал қаласындағы №71 мектептің құрылысы биыл басталмақ.
Мектепке дейінгі тәрбие бағыты бойынша да нәтиже жоғары деңгейде. Өңірде 3 пен 6 жастағы балалар балабақшамен 100 процент қамтылған. Сондай-ақ, жекеменшік балабақшалардың үлесі артып, бұл көрсеткіш 72,1 процентті құрап отыр.
Сала бойынша сандарды сөйлетсек, пандемияға қарамастан оқу жүйесінің баршаға қолайлы болуы барынша қарастырылғаны байқалады. Сондай-ақ, кәсібіне адал, жұмысқа зор жауапкершілікпен қарайтын педагогтарға айрықша көңіл бөлінгені қуантады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
