Үстіміздегі жылдың 15 наурызы күні ҚР Оқу-ағарту бірінші вице-министрі, жерлесіміз Наталья Жұмаділдаева дүниеден өтті.
Наталья Васильевна 1965 жылы 29 наурызда Қарағанды облысы Теміртау қаласында дүниеге келген. Оның педагогикалық жолы 1987 жылы Қызылорда және Алматы қалаларының мектептерінде бастауыш сынып мұғалімі қызметінен басталды. Өзінің таланты мен кәсібіне адалдығының арқасында директордың орынбасары және директор лауазымдарында қызмет атқарды. 2013-2016 жылдары әдіскер, қалалық білім бөлімі басшысының орынбасары және Жасөспірімдер мен оқушылар үйінің директоры болып жұмыс жасады.
2016 жылы Наталья Васильевна Қазақстан халқы Ассамблеясының атынан Қазақстан Республикасы Парламенті Мәжілісінің VI шақырылымының депутаты болып сайланып, Халықаралық істер, қорғаныс және қауіпсіздік комитетінің жұмысына белсенді қатысты. Депутаттық өкілеттігі аяқталғаннан кейін 2021 жылы білім беру саласындағы қызметін жалғастырып, «Назарбаев Зияткерлік мектептері» ДББҰ Басқарма төрағасының кеңесшісі, Педагогикалық шеберлік орталығының білім беру бағдарламалары және халықаралық ынтымақтастық жөніндегі директордың орынбасары, кейін Оқу-ағарту министрлігінің Мектепке дейінгі білім департаментінің директоры қызметтерін атқарды.
2023 жылдың қыркүйегінде Наталья Жұмаділдаева Қазақстан Республикасы Оқу-ағарту бірінші вице-министрі болып тағайындалды. Елдің білім беру жүйесін дамытуға елеулі үлес қосты. Көп жылғы жемісті еңбегі үшін «Құрмет» орденімен, «Ы.Алтынсарин» төсбелгісімен марапатталған.
Ол кәсіби маман, өскелең ұрпаққа қамқоршы ұстаз еді. Ізіне өшпес өнеге, терең тағылым қалдырған Наталья Васильевнаның есімін ұмытпаймыз.
Бақұл болыңыз, ұлағатты ұстаз.
Қызылорда облысының әкімдігі,
облыстық мәслихат,
облыстық қоғамдық кеңес
және ардагерлер кеңесі
>>> Біздің Facebook, Instagram парақшаларымыз бен Telegram каналымызға жазылыңыз! <<<
