Жаңа оқу жылы басталды. Мектептегі оқу процесін ұйымдастыру ҚР Білім және ғылым министрлігі ұсынған бағыттар бойынша жүргізілуде. Атап айтсақ, өткен жылдан бері қалыптасып отырған эпидахуалға байланысты облыстағы 228 мектептің 133 463 оқушысы “BilimLand”, “Дарын-онлайн” интернет платформалары арқылы қашықтан оқытылып отыр. Сонымен қатар, 1-4 сыныптағы 28 694 оқушы 2 104 топта, шалғай орналасқан елді мекендегі 65 мектепте 6 575 оқушы дәстүрлі оқытылуда.
Тақырыбымызды тарқата түссек, расында қашықтан оқу оңай ма? Әрине, оңай емес. Бұл ретте жауырды жаба тоқудың қажеті бола қоймас. Себебі, елімізде қашықтан оқыту бастамасының қолға алынғанына көп уақыт бола қойған жоқ. Сондықтан оқыту процесін ойдағыдай жүріп жатыр деп сеніммен айта алмаймыз. Әсіресе, бірінші сынып оқушылары үшін ұстаздың жүзін көрмей, қашықтан оқып, қаріп тану қиынның-қиыны.
Әлемді жайлаған пандемияға байланысты өткен оқу жылының соңына таяу қашықтан оқыту тәжірибесі енгізілген болатын. Оқу жылының соңы болғандықтан ол кездегі олқылықтар онша біліне қоймаған еді. Алайда биылғы жаңа оқу жылының да қашықтан оқыту әдісімен басталуы мұғалімдер қауымына да, ата-аналарға да үлкен сын болып отыр. Оның басты себебі, биыл ғана ашылған «BilimLand», «Дарын-онлайн» интернет платформалары мектеп оқушыларының пайдалануына әлі де қолжетімсіз. Байланыс орнату өте қиын. Сондықтан оқушылар «WatsApp» желісі арқылы байланысуды қолайлы көреді. Дегенмен, мұғалімдер жаңаша оқыту платформаларын меңгеруге барынша жұмыс жасап жатыр.
Мұғалім де, ата-ана да
«дәстүрлі оқытудың
орны бөлек» дейді
Осы орайда білім беру саласында көп жыл тәжірибесі бар, Жалағаш ауданындағы А.Бисенов атындағы №38 орта мектептің қазақ тілі мен әдебиеті пәнінің оқытушысы, жоғары санатты мұғалім, педагог-зерттеуші, Ы.Алтынсарин белгісінің иегері Жанар Шілдебаеваның пікірін сұраған едік.
– Қазіргі қалыптасып отырған жағдайға байланысты қашықтан оқытуға көштік. Ол үшін жаңаша ізденіп, арнайы оқу курстарынан өттік. Бүгінгі таңда қашықтан білім берудің «BilimLand», «Дарын-онлайн» секілді интернет платформаларын игеруге жұмыс жасап жатырмыз. Алайда өзімнің көпжылдық ұстаздық тәжірибем бойынша айтарым, бала мектепке келмей, мұғаліммен бетпе-бет кездеспей, бір-біріне деген жылы қарым-қатынасты сезініп, ортамен араласып, өзара сыйластық пен құрмет қалыптаспай, толыққанды білім алуы мүмкін емес. Өйткені әрбір мұғалім – психолог, яғни, әр оқушының сабақты қабылдау мүмкіндігіне қарай жұмыс жасайды. Мәселен, кейбір оқушыларға айрықша көңіл бөліп, қайталап түсіндіруге тура келеді. Ал қашықтан оқыту барысында бұл мүмкін емес.
Мемлекет басшысының кешегі Жолдауында санитарлық талаптарды сақтай отырып, білім алудың қалыптасқан дәстүрлі тәсіліне қайта көшу тәртібін әзірлеу мәселесі айтылды. Бұл – өте орынды тапсырма. Мүмкіндігінше, жеделдетіп жүзеге асырылса, жақсы болар еді, – дейді ұстаз.
Сара Адайбаева, қала тұрғыны:
– Балам биыл 1-ші сыныпқа барды. Оқуға деген ынтасы ерекше. Әйтсе де қолына сөмкесін алып, мектеп табалдырығын аттаған жоқ. Алғашқы ұстазын кітап алар кезінде бір-ақ рет көрді. Ал сыныптастарын мүлде танымайды. Өзіміздің оқыған уақытымызбен салыстырып қарасақ, әрине, көңіл құлазиды. Мектепке алғаш барған әр балаға мұғалімнің көмегі өте қажет. Ал қашықтан оқыту барысында бұл жауапкершілік ата-ананың мойнында. Айта кетейік, ата-ананың барлығы мұғалім емес, сондықтан балаға қалам ұстаудан бастап, жазып-сызуға, кітапты жүргізіп оқуға дейін үйрету оңай болмайды. Сол сияқты, балаға біліммен бірге тәрбие де керек. Көпшілік ортамен араласуды үйренуі маңызды.
Әйтсе де бүгінгі қалыптасып отырған жағдайға байланысты баламызды қашықтан оқытудамыз. Интернет байланысы әлсіз, баланың көп уақыты ұялы телефон алдында өтеді. Бұл денсаулығына да зиян, – дейді.
Салада моральдық,
материалдық қолдау
шаралары артып келеді
Білім мен ғылымды дамытудың 2020-2025 жылдарға арналған бағдарламасы бекітіліп, биылдан бастап педагогтар мен оларға теңестірілген қызметкерлердің еңбекақысы жыл сайын 25 процентке көбейіп, төрт жылда екі есе артады деп жоспарланып отыр. Бұл мақсатқа биыл облыстық бюджеттен 27,4 млрд-ға жуық қаржы бөлінді.
Қашықтан оқыту бойынша оқушылар мен мұғалімдердің және оқушылардың арнайы құрылғылармен (компьютер, ноутбук, планшет, смартфон) қамтамасыз етілуіне, интернет және ұялы байланыстың қолжетімділігіне мониторинг жасалды. Электронды құрылғысы жоқ 9687 оқушыны компьютерлік техникамен қамтуға тиісті жұмыстар ұйымдастырылды. Бүгінгі күнге мектеп балансындағы 2800 компьютер мұқтаж отбасыларына уақытша пайдалануға берілсе, демеушілер есебінен 239 планшет, 15 ноутбук тапсырылды. Сонымен қатар, саладағы үнемделген бюджет есебінен 176,7 млн теңге 2635 планшет алуға бағытталды. Бұдан бөлек, республикалық бюджетттен 3,4 млрд теңгеге 22 мыңнан астам компьютерлік техника алынуда.
Дәстүрлі оқыту қалай
жүргізілуде?
Облыстық білім басқармасының мәліметі бойынша оқу орындарында инфекцияның таралу қаупін азайту бағытында дәстүрлі түрде білім алатын оқушылар 5 сатыдан тұратын дезинфекциядан өтетін болады:
Бірінші, сыртқы киімді дезинфекциялық ерітінділермен залалсыздандыратын арнайы туннель арқылы өткізу;
Екінші, аяқ киімдерді арнайы залалсыздандыру кілемшелерімен тазарту;
Үшінші, қолды санитайзерлер арқылы антисептиктермен өңдеу;
Төртінші, байланыссыз термометр арқылы дене қызуын өлшеу;
Бесінші, медициналық бетперделер кию. Сонымен қатар, мектептерге кіргізу, сыныптарға орналастыру барысында әлеуметтік қашықтық сақталады. Сыныптарды желдету арқылы ауасын тазарту, кварцтау, ауысым арқылы дезинфекциялық ылғалды жуып тазалау жұмыстары жүргізіледі.
Айта кетейік, дәстүрлі оқыту топтары 1-4 сыныптардың ата-аналарының дербес өтініштері негізінде ашылған. Бұл топтарда 15 баладан артық бала оқытылмайды. Ең бастысы – бала қауіпсіздігін қамтамасыз ету. Санитарлық талаптар қатаң сақталады. Әрбір кезекші топтардың жұмысы белгілі алгоритмге сәйкес жүргізіледі.
Оқушылардың
білімін бағалау
жүйесі өзгерді
Қашықтан оқыту кезінде қалыптастырушы бағалау күнделікті жүргізілетін болады. Максималды бағалау 10 балдық жүйені құрайды. Бұрын 5-тік балл қойылатын. Оның ішінде 1-ші сыныптар бағаланбайды. 2-11 сыныптар бағаланады. Бағалау көрсеткішіне келсек, 1-3 балл – төмен деңгей, 4-7 балл – орта деңгей, ал 8-10 балл жоғары деңгей. Мұғалім журналға балл көрсеткішімен белгілейтін болады.
Қалыптастырушы бағалау 1 тоқсанда 25 процент БЖБ (бөлімдік жиынтық бағалау) және ТЖБ (тоқсандық жиынтық бағалау) 50 пайыз қосындысы бойынша қорытындыланады.
Қорыта айтқанда, онлайн оқытуды тиімді ұйымдастыруға барынша көңіл бөлініп, қажетті шаралар атқарылды. Дегенмен, күнделікті оқыту барысында интернет байланысының төмендігі байқалып отыр. Бұл кемшіліктің бар екенін Мемлекет басшысы да өз Жолдауында айтып өтті. Сол себепті санитарлық талаптарды қатаң сақтай отырып, білім берудің қалыптасқан дәстүрлі тәсіліне қайта көшудің тәртібін әзілеуді тапсырды.
Расында, онлайн білім алу мен дәстүрлі білім алудың айырмашылығы жер мен көктей. Оны жасырудың қажеті жоқ. Есесіне, Президент тапсырмасына сай дәстүрлі оқытуға көшудің барлық мүмкіндігін қарастырғанымыз жөн секілді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
