Еліміздің жоғары оқу орындарында оқытудың онлайн түрі енгізіледі. Бұл туралы білім және ғылым министрі Асхат Аймағамбетов мәлімдеді.
Бүгін парламент мәжілісінің жалпы отырысында маңызды нормаларды көздейтін заң жобасы қабылданғанын хабарлаған министр жоғары білім беруде онлайн оқыту формасы енгізілетінін жеткізді.
«Енді ЖОО-лар оқытудың онлайн түрінде белгілі бір оқыту бағыты бойынша кадрлар дайындай алады. Бұл – заман талабы. Осыған байланысты біліктілік талаптарына сәйкес оқытудың белгілі бір бағыты бойынша (прокторинг, ақпараттық жүйе, цифрлық контент, кадрлар және т. б.) жеке лицензия алу міндетті болады», – деді Асхат Аймағамбетов.
Сондай-ақ Қазақстан тарихы мен Дүниежүзі тарихы оқулықтары енді еліміздің барлық мектебі үшін бірыңғай және базалық болады. Яғни, бір оқу бағдарламасы және бір негізгі оқулық бойынша білім беріледі. Басқа пәндер бойынша оқулықтардың балама нұсқалары қолданылады.
Халықаралық пәндік олимпиада, сондай-ақ халықаралық орындаушылар конкурсы мен спорт жарыстарының жеңімпаздары мен жүлдегерлеріне жоғары оқу орындарында тегін білім алуға гранттар беріледі. Сонымен қатар халықаралық олимпиада жеңімпаздары мен жүлдегерлері және олардың тәлімгерлеріне бір реттік ақшалай төлем жасалады
>>> Біздің Facebook, Instagram парақшаларымыз бен Telegram каналымызға жазылыңыз! <<<
