Кеше жергілікті өнер мен мәдениет саласының өкілдері өңірлік коммуникациялар қызметінде өткен брифингте Еуропаға жасаған өнер сапары туралы әсерін бөлісті.
Айтыскер ақын, үш дүркін «Алтын домбыра» иегері, «Ерен еңбегі үшін» медалінің иегері Мұхтар Ниязов алдымен ауқымды іс-шараның өтуіне мұрындық болған аймақ басшысы мен елшіліктерге алғысын жеткізді.
– Финляндиядан басталған концертіміздің еуропалықтарға, әсіресе, ондағы қазақ бауырларымызға ерекше әсер еткені сондай, бізді көпке дейін жібергісі келмеді. Бізге де бұл сапар шабыт сыйлап, көне шаһарлардың архитектурасымен, халқының таным-түсінігімен, тұрмыс-тіршілігімен танысуға мүмкіндік берді, – деді ол.
Бұл қазақтың салт-дәстүрі мен өнерін ұштастырған сапар болды десек, артық айтпаймыз. Ұлыстың ұлы күні осылайша үш күн қатарынан Еуропа төрінде тойланды. Мерекелік шаралардың шымылдығы «Жарапазан» жырымен ашылып, шашу шашылып, «Тойбастарға» ұласты. Жергілікті тұрғындар мен қонақтар, диаспора мүшелері, қазақстандық және шетелдік студенттер ұлттық музыкамен, салт-дәстүрлермен тереңірек танысуға мүмкіндік алды. Сырбойылық талант иелерінің өнерін тамашалады.
– Біз бұған дейін біршама мемлекетте болғанбыз. Бірақ қатарынан үш мемлекетке баруымыз бірінші рет. Бұл жолы Наурыздың құрметіне жарапазан да айтылды, ән, би мен күй, айтыс та ұсындық, – деді әнші, «Құрмет» орденінің иегері Самал Байсейітова
Жыршы, «Ерен еңбегі үшін» медалінің иегері Руслан Ахметов Қызылордадан аспаздар да ере барғанын, олардың шетелдіктер назарына ұлттық тағамдар ұсынғанын атап өтті.
– Біздің шашуымыз тек Сыр елінің емес, бүкіл қазақ халқының атынан деп есептеймін. Қандастарымыз сағынышпен қарсы алып, қимастықпен шығарып салды, – деді ол.
Еске салсақ, 24-27 наурыз аралығында Еуропаның Финляндия, Эстония және Испания мемлекеттерінде Қызылорда облысының өнер күндері өтті. Оны облыс әкімі Нұрлыбек Нәлібаевтың қолдауымен Қазақстанның сондағы елшіліктері ұйымдастырды.
Назерке САНИЯЗОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
