Облыста маусым айынан бастап карантиндік шараларды жеңілдетудің алтыншы кезеңі іске қосылды. Осыған сәйкес бірқатар салалар мен ұйымдар өз қызметін қайта жандандырды. Ал бұрын іске қосылған ұйымдардың жұмыс уақыты ұзартылды.
Дегенмен, карантиндік шектеулер әлі де жалғасады. Сондықтан тұрғындар сақтық шараларын қатаң ұстанғаны абзал. Бірақ, қанша айтылып жатса да, көпшілік індет қауіптілігіне көңіл бөлмей, көшеде бетпердемен жүру қажеттілігін естен шығара бастады. Аймақта вирусқа қарсы шаралар жүргізілгенімен, қоғамдық орындарда, көліктерде, адам көп жиналатын жерлерде санитарлық талаптар сақталмауда. Тұрғындар бетперде тағу режимін бұзып, әлеуметтік қашықтықтықты ұстанбай, дезинфекциялық талаптарды да орындамай отыр. Бұған жүргізілген рейдтер дәлел.
Республика көлемінде 16 наурызда енгізілген төтенше жағдай ағымдағы жылдың 11 мамырынан бастап алынды. Алайда коронавирус инфекциясының тіркелуі әлі де орын алып келеді. Байқағанымыздай, аурудың екінші көтерілу кезеңі осы төтенше жағдай алынып тасталғаннан кейін орын алды. Нақты айтқанда, облыста коронавирус инфекциясының ең алғашқы оқиғасы тіркелген 28 наурыздан бастап 2 маусым аралығында барлығы 448 дерек анықталды (100 мың халыққа шаққандағы аурушаңдық көрсеткіш – 55,7). Ауруға шалдыққандардың басым көпшілігі 20-29 (жалпы тіркелген науқастардың 24 процентін құрады) және 50-59 жас аралығындағы (25 процент) ересектер. Ал ауруға шалдыққан науқастың ең кішкентайы 1 жасқа дейінгі сәби болса (Шиелі ауданы), ең үлкені 81 жаста (Қызылорда қаласы).
Аурудың максималды тіркелуі 8 сәуірге сәйкес келіп, 26 дерек есепке алынса, төтенше жағдай алынып тасталғаннан кейін ең көп (40 жағдай) тіркелген күн 31 мамырда орын алып отыр. Облыс бойынша тіркелген 448 жағдайдың (кешеге дейін) 49%-і немесе 218 дерек соңғы 23 күннің ішінде, яғни төтенше жағдай алынып тасталғаннан кейін тіркелді. Бұл – облыс тұрғындарының сақтық шараларына салғырттықпен қарағанының тікелей көрсеткіші.
Сондықтан сақтық шараларын әлі де естен шығармай, жеке бас гигиенасына баса назар аударуымыз керек. Сонымен қатар, жұмыс берушілер өз қызметкерлерін кәсіпорынның немесе нысанның меншік нысанына қарамастан, жеке қорғау құралдарымен қамтамасыз етуі қажет. Барлық персонал бетперде, қолғап және өзінің технологиялық киімінде болуы тиіс. Дүкендер мен шаштараз қызметкерлері міндетті түрде бетперде, бас киім және фирмалық киімнің үстіне қолғап киіп жүруге міндетті. Барлық үй-жайлар үнемі желдетіліп, ал жұмыс орындары дезинфекциялау құралдарымен өңделуі керек.
Карантин шараларын сақтау әлі де өзекті екенін естен шығармағанымыз жөн. Өйткені қауіпті індеттің беті әлі қайтқан жоқ. Егер талап бұзушылықтар сақталып, жағдай ушыға беретін болса, кейбір карантин шараларын қайта енгізуге мәжбүр боламыз.
Облыс тұрғындарына эпидемиологиялық ахуалды тұрақты ұстап тұру үшін халықтың санитариялық-эпидемиологиялық саламаттылығын қамтамасыз ету мақсатында заңнамамен белгіленген талаптарға құлақ асып, сақтық шараларын ең әуелі өзіміздің, жақындарымыздың қауіпсіздігі үшін сақтайық дегім келеді.
Әлия ЫДЫРЫСОВА,
облыстық тауарлар мен
көрсетілетін қызметтердің сапасы мен қауіпсіздігін бақылау департаментінің бөлім басшысы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
