Қызылорда құрылыс алаңына айналғалы қашан. Кейінгі үш-төрт жылдың өзінде қаншама әлеуметтік нысандар, көпқабатты тұрғын үйлер, спорт кешендері бой көтеріп, тұрғындар игілігіне берілді. Заманауи зәулім ғимараттар қала ажарын айшықтап ғана қоймай, аймақ абыройын асыруда. Басқасын айтпағанда, биылдың өзінде облыстық құрылыс, сәулет және қала құрылысы басқарманың тапсырысымен үш ірі нысанның құрылысын аяқтау жоспарланған. Соның бірі – Қызылорда қаласының сол жағалауынан орын тепкен, аусымына 100 келушіге арналған емханасы және онкологиялық бөлімшесі бар 300 орындық көпбейінді аурухана.
54,3 млрд теңгенің жобасын «Мелиоратор» серіктестігі жүзеге асыруда. Авторлық қадағалаушы «ALTYN cтрой-проект» серіктестігі болса, техникалық қадағалаушы «АДС Сапа» серіктестігі.
6,8 гектар аумақты алып жатқан ғимараттың жалпы ауданы 47995,28 шаршы метр. Үш, бес, жеті, тоғыз қабатты 10 блоктан тұрады. Нысанның құрылыс-монтаждау жұмыстарын жыл соңына дейін аяқтап, ел игілігіне табыстау жоспарланған. Біз барғанда құрылыс басындағы қызу жұмысты байқадық.
– Құрылыс қарқынды жүріп жатыр. Жыл соңына дейін аяқтау жоспарланған, бірақ тамыз айында бітіреміз бе деп отырмыз. Қазіргі уақытта 480 адам жұмыс істейді. Басым бөлігі жергілікті тұрғындар. Техника күші мен құрылыс материалдары жеткілікті. Бүгінде құрылыстың 65-70 пайызы орындалды. Монолитті бетон құю жұмыстары аяқталып, негізгі қаңқасы тұрғызылды. Қабырға кірпішін өру, терезе салу, ішкі әрлеу, сыртқы қасбетін қаптау, ішкі инженерлік жүйелерін жүргізу жұмыстары атқарылуда. Мерзімінен бұрын аяқтау үшін жұмысшылар санын мыңға дейін көбейтуді көздеп отырмыз, – дейді жоба жетекшісі, «Мелиоратор» серіктестігі басшысының орынбасары Азат Матуров.
Жоба жетекшісінің айтуынша, жұмсалып жатқан құрылыс материалдарының басым бөлігі отандық өнімдер. Алматыдан, Астанадан, Шымкенттен алынуда.
Айта кету керек, негізгі блоктардан бөлек мәйітхана, бу қазандығы, автогараж да қарастырылған. Қазіргі кезде олардың аздаған жұмыстары қалған. Ал ғимараттың негізгі блоктарында емхана, қабылдау, операциялық, реанимация, химиотерапия, радиология бөлімдері, әкімшілік, тамақтандыру және конференц залдары орналасады.
Айнұр БАТТАЛОВА,
«Сыр бойы
