Облыстық психикалық денсаулық орталығында «SENIM» Денсаулық сақтау жүйесі жұмыскерлерінің салалық кәсіптік одағы» республикалық қоғамдық бірлестігінің облыстық филиалы коронавирус індетімен күрес барысында ауру жұқтырып, айығып шыққан 100 медицина қызметкеріне Ақмола облысы «Бурабай» ауданында орналасқан «Шучинск» демалыс орнына тегін жолдама табыстады. Жолдаманың құны 7 500 000 теңгені құрайды.
Халық денсаулығының жақсаруы жолында аянбай еңбек етіп жүрген сала қызметкерлері тамыз-қыркүйек айлары аралығында 10 күн бойы шипажайда демалады.
Жалпы «SENIM» кәсіподағы облыс көлемінде індетке қарсы күресте медициналық ұйымдармен бірлесе жұмыс атқаруда. Қызметкерлерге көмек көрсетіп, тұрмыстық жағдайын көтеру үшін 250 отбасына азық-түлік өнімдерін таратты. Облыстық жұқпалы аурулар ауруханасына 185 дана төсек жиынтығын сатып алып табыстаса, облыстық жедел жәрдем станциясына 2000 дана бетперде тігуге жабдықтар сатып алып берді.
Оған қоса, емдеу мекемелерінің қажеттілігіне орай температура өлшейтін құрал (бесконтактный термометр) сатып алынды. Індет түбегейлі жойылмағандықтан, өңірдегі барлық оқушылардың 83 процентін қашықтан оқыту жоспарлануда. Осы ретте, сала қызметкерлерінің оқушы балаларына 44 планшет сатып алынып, табысталуда. Бұдан бөлек, облыстық филиал мен Сырдария аудандық ауруханасының бастауыш кәсіподақ ұйымы атынан аудандық аурухананың кеселмен күресуге атсалысқан 9 медицина қызметкеріне демалыс орнында тынығуға тегін жолдама берілді.
Облыстық филиал 10 384 мың теңгеге облыс көлеміндегі медицина саласының қызметкерлеріне көмек көрсеткен. Филиал төрағасы Асылхан Абылайханұлының айтуынша, бұл бағыттағы жұмыстар алдағы уақытта да өз жалғасын таба бермек.
Айнұр СӘРСЕНБАЙҚЫЗЫ
>>> Біздің Facebook, Instagram парақшаларымыз бен Telegram каналымызға жазылыңыз! <<<
