Бүгінде Қызылорда медициналық жоғары колледжінде «Пациенттер мен олардың туыстарына күтім жасау тәсілдерін оқыту» арнайы мектебі ашылып, жұмыс істеуде. Мұндағы мақсат – емделушілер мен олардың жақын туыстарына ауру кезінде немесе одан кейінгі күтімді тиімді әрі дұрыс ұйымдастыру жолдарын үйрету. Бұл бастама халықтың медициналық сауаттылығын арттырып ғана қоймай, науқастардың өмір сапасын жақсартуға бағытталған.
Мұндай мүмкіндік колледж басшылығы мен Латвияның Рига медициналық колледжі арасындағы Еуроодақ деңгейіндегі меморандум аясында осы оқу орнының озық тәжірибесі негізінде пайда болды. Екіжақты келісімге сәйкес былтыр жыл соңында облыстық денсаулық сақтау басқармасының басшысы Олжас Ысқақов бастаған делегация Латвияда өткен халықаралық конференцияға қатысты. Іссапар барысында қызылордалық делегация білім алу, тәжірибе алмасу мақсатында сол елдің емдеу мекемелеріне барып, пациенттер мен олардың туыстарына күтім жасау әдістерін оқыту жүйесімен танысты.
– Бұл мектеп – халықаралық тәжірибе мен отандық медициналық білім беру жүйесінің ұтымды үйлесімі. Латвиялық әріптестеріміздің қатысуымен жүзеге асқан жоба кәсіби күтім мәдениетін дамытып, қоғамдағы медициналық жауапкершілікті арттырады. Биыл сәуір айында Рига-1 медициналық колледжінің лекторлары, Ригадағы №2 аурухананың мейіргерлік күтім бөлімшесінің аға мейіргерлері Инга Приеде, Сэндия Шпацс-Дагэмен, көпбейінді даму жөніндегі маман Илзе Вациете бізге келіп, мейіргер ісі пәнінің оқытушыларына, емхана мейіргерлеріне дәріс өтіп, сертификат табыстады. Тренерлер аймақтағы барлық емхананың мейіргерлерін, науқастар мен оларға күтім жасайтын жақындарын оқытуды бастады. Әзірге 15 пациент пен туысы білімін толықтырды, – дейді Қызылорда медициналық жоғары колледжінің практика жөніндегі орынбасары Айгүл Сеитова.
Қала тұрғыны Гүлнар Серікбекқызы жолдасы 8 ай бұрын инсульт алып, төсекке таңылғалы оның күтімімен өзі айналысып жүр. Сондықтан бұл курстың маңызы зор деп есептейді.
– Бірінші рет басымызға осындай жағдай түсті. Мұндайда науқастың өзіне де, күтушісіне салмақ артылады. Көп нәрсені білмегендіктен қатты қиналдым. Өзіміз тіркелген емхана мамандары осындай мектептің барын айтып, жіберді. Мектепте оқу барысында біраз пайдалы мәлімет алып, тәжірибеге қанықтым, – дейді ол.
Тәжірибелі тренерлер пациенттер мен олардың туысқандарына төсектегі науқасқа қалай күтім жасау, жамбасы ойылып қалмас үшін не істеу керегін, эргономика, инсульт, деменция, тағы басқа диагнозы бар науқастарды оңалту тәсілдерін үйретіп жүр. Сабақ барысында жасанды интеллект әзірлеген платформалар да пайдаланылады.
Айнұр БАТТАЛОВА,
«Сыр бойы»
