Қант диабеті – ең көп таралған аурулардың бірі. Бұл дерттің асқынуын Сырдария аудандық ауруханасының дәрігерлері тоқтатуда. Хирургтар көптеген науқастарды мүгедектіктен аман алып қалды.
Қант диабетпен күресу 48 жастағы Іңкәдария ауылы тұрғынының өмір салтына айналып қалған. Науқаста диабеттік ангиопатия, перефериялық артериаллардың зақымдануы, атеросклероз салдарынан аяғында гангрена пайда болды. Бірақ дәрігерлердің кәсіби шеберлігінің арқасында ауыл тұрғының аяғы аман қалды.
– Көп жағдайда науқастың зақымдалған аяғында некроз болса, тізеден жоғары кесіп тастар едік. Енді емдеудің жаңа әдістерінің, медициналық құрал-жабдықтардың арқасында науқасты мүгедектіктен сақтай аламыз. Тек зардап шеккен мүшелерді, мысалы, саусақтарды, табанын алып тастаймыз», – дейді хирургия бөлімнің меңгерушісі Дәуірхан Тағыбергенов.
Аудандық аурухананың дәрігерлеріне аймақтың басқа елді мекеннен қант диабетімен ауыратын науқастар жүгінеді. Мәселен, 41 жастағы вахталық жұмысшы да осындай жағдайға тап болған. Ол қант диабетімен ауыратынын білмеген. Аяғы ісінген соң өзін-өзі емдеген. Гангрена пайда болған кезде науқас дабыл қаққан. Дәрігерлер зардап шеккен саусақтарын кесіп, ер адамды мүгедектіктен аман алып қалды.
– Қант диабетімен ауыратын науқастарға қатаң диетаны ұстану, күнделік қандағы қант деңгейін бақылау ұсынылады. Барлық көрсеткіштерді күнделікке енгізу керек. Науқастың қалауы бойынша Сырдария аудандық ауруханасында Диабет мектебінен өтіп, дәрігердің бақылауымен диетаға үйренуі мүмкін. Қант деңгейі 15-20 ммоль/л болған емделушілерде 7 ммоль/л – ге дейін төмендеген мысалдар аз емес, – дейді Дәуірхан Тағыбергенов.
Әлеуметтік медициналық сақтандыру қорының облыс бойынша филиалының директоры Бақыт Исмаханбетов түсіндіріп өткендей, егер учаскелік дәрігер динамикалық бақылауға жататын осы әлеуметтік маңызды анықтаса, тегін медициналық көмектің кепілдік берілген көлемі шеңберінде (ТМККК) бірқатар медициналық қызметтер қолжетімді. Бұл дәрі-дәрмекпен қамтамасыз ету, бейінді дәрігерлердің кеңесі, диагностикалық тексерулер, күндізгі және тәулік бойы стационарларда емдеу, паллиативтік көмек (ауыр сырқаттармен ауыратын науқастарға демеуші терапия) және басқа да медициналық қызметтер. ТМККК-нен тыс медициналық қызметтерді алу үшін пациент МӘМС жүйесінде сақтандырылуы тиіс.
Өңірде қант диабетімен ауыратын 14,5 мыңнан астам адам бар. Көбінесе облыс орталығы мен Шиелі ауданының тұрғындары.
>>> Біздің Facebook, Instagram парақшаларымыз бен Telegram каналымызға жазылыңыз! <<<
