Өңірде эпидемиологиялық ахуал тұрақтала бастады. Жедел жәрдем қызметі күрделі кезеңде тәулігіне 2 жарым мың шақырту қабылдап, жүктемелері екі есеге дейін артқан еді. Облыстық денсаулық сақтау басқармасы басшысы Сәбит Пазыловтың айтуынша, маусым айындағы шақыртудың шарықтау шегімен салыстырғанда 52,7 процентке төмендеген. Соңғы екі аптадағы көрсеткіш 39 процентке азайған.
– Жедел жәрдем үшін ең күрделі кезең 20 маусымнан кейін келді. Бұған дейін әр топқа 35-38 шақыртудан келсе, қазір бұл көрсеткіш 16-18-ге түскен. Бір айта кетерлігі, шақыртудың басым көпшілігі тұмау, өкпе аурулары, пневмония ауруларының белгілеріне байланысты. Статистикалық мәліметтерді сараласақ, ауруханаға тасымалданған науқастардың 85 проценті жатқызылатын. Қазір 45 проценті ғана жатқызылуда. Демек, ауыр науқастар саны азайды, – дейді облыстық денсаулық сақтау басқармасының басшысы.
Осыған дейін жедел жәрдем көліктері шақыртуларға уақытылы барып та үлгермейтін. Бұл мәселені шешу мақсатында 30 топ көмекке жұмылдырылды. Бұдан бөлек, республикада алғашқы болып өңірде 161 мобильді топ құрылған. Мұның барлығы қауіпті індетпен күресте қабылданған негізгі шаралардың бір бөлігі ғана. Сәбит Бексейітұлы жедел жәрдем шақыртушылар кезек күтпейтінін айтты.
Мамандардың мәліметінше, тыныс алу жолдары аурулары 74 процентке, жедел-респираторлық вирусты инфекция 82,5 процентке, пневмония 60 процентке азайған. Басқарма басшысы жағдай тұрақталғанмен, тоқмейілсуге болмайтынын айтып, халықтан жиын-тойды тоқтатуын сұрады.
Дәулет Қырдан,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
