Қызылорда қаласындағы көрікті ғимараттардың бірі – кіреберісінде жүрекке белгі орнатылған облыстық көпбейінді аурухана. Осында жүрек-қантамыр жүйесін емдейтін, науқас жандарға өмір сыйлайтын облыстық кардиохирургиялық орталықты медицина саласының жүрегі деуге болады.
Адам Құдайға сыйынады, ал ауырғанда дәрігерге жүгінеді. Жүгінетін дәрігеріміз білікті, тәжірибесі мол, қолы шипалы, қабылдауына бару мен ем алу қолжетімді болса, денсаулығы нашарлап тәуелді болып барған жандар ауруынан айығуды Құдайдан да, дәрігерлерден де сұрайды. Науқасымнан айығамын деген үміт пен сенім болады. Халықтың осы үміті мен сенімін орталық дәрігерлері ақтап жүр.
Бұл саланы білікті маман Берік Русланұлы Дәуітбаев 2016 жылдан бері басқарып келеді.
Дәрігер науқасты сөзімен де, диагнозын дөп басып дәрінің күшімен де, ота жасау арқылы да емдейді. 2000 жылға дейін кардиохирургиялық ота Қазақстан бойынша тек қана Алматы қаласындағы А.Н.Сызғанов атындағы ғылыми орталықта жасалатын. Жүрек-қантамырлары кеселімен ауыратын науқастар өте көп болуына байланысты, онда барып көріну, ем алу, ота жасату үшін кезегін жылдап күтетін еді. Науқастар кезегі келем дегенше бақилық болатын.
Облыстық көпбейінді аурухана жанынан кардиохирургия орталығы ашылды. Науқастар жылдап күтетін кезектен құтылды, ел асып бармай-ақ осында емделіп, сауыға алатынына сенім артты.
Кардиохирургия орталығы 2011 жылдан бастап жүрекке ашық ота жасайтын дәрежеге қол жеткізді. Бүкіл әлемге белгілі литвалық кардиохирург, профессор Римантас Бенитаспен бірге жергілікті дәрігер-хирургтар 20 отаға қатысып, 200-ден астам науқасқа берген кеңесін тыңдады. Вьетнамдық кардиолог, профессор Хью және Сызғанов атындағы аритмологиялық бөлім меңгерушісі А.Баймбетовтің септальді ақауға эндоваскулярлы жабық ота жасауға біздің дәрігерлер де қатысты. Ю.Пяның бастауымен кардиохирург, перфузиологтардан құралған орталық дәрігерлері жасаған 5 ашық ота сәтті шықты.
Кардиохирургия орталығы ашылғаннан бері 35 мыңнан астам науқасқа ем жасап, 12500-ден аса коронография жасап, оның 4 мыңнан астамына стенд қойылды. 1400 науқасқа кардиохирургиялық, 362 кісіге аритмологиялық оталар жасалды. Осы шаралар нәтижесінде қаншама адамның өмірі ұзарып қатарға қосылды.
Коронавирус індеті кезінде де бұл орталық жүздеген адамды науқасынан сауықтырды. Жүрек-қантамырына сырттың көмегінсіз өз мамандары ота жасайды.
Осыдан 12 жыл бұрын жүрек ауруына шалдыққанымды облыстық кеңес беру орталығының кардиолог дәрігері анықтады. Жолдамамен Нұр-Сұлтан, Алматы қаласындағы ғылыми орталықтарға барып емделіп, бір қан тамырға тент қойдырып тұрғылықты жердегі кардиологтардың бақылауында боласың деген қорытындымен елге оралдым. Бас қала дәрігерлерінің ем-шарасын берген кеңестерін зерделеп, сараптап науқастан айығу шарасын өзіміздегі жұмысы оң бағыт алған кардиохирургия орталығында жалғастыруды жөн көрдім. 2013 жылы тағы бір қан тамырына тент, 2015 жылы жүрекке стенд қойылды. Әлі де осы орталық дәрігерлерінің бақылауындамын. Биыл 80 жасты толтырдым.
Жүрек сақшыларының әр адамның өмірін құтқарудағы еңбегі ерлікке пара-пар.
Қапан Нағашыбаев,
еңбек ардагері
>>> Біздің Facebook, Instagram парақшаларымыз бен Telegram каналымызға жазылыңыз! <<<
