Экономиканы әртараптандыруды және оның шикізат экспортына тәуелділігін азайтуды негізгі мақсат еткелі аймақта индустрияландыру бағдарламасына барынша басымдық берілді. Нәтижесінде нақты стратегиялық жоспарлар бекітіліп, межелі міндеттер белгіленді. Бастысы, бағдарлама өңдеу секторының дамуына оң әсерін тигізді.
Бұлай деуімізге нақты дәлел де бар. Мәселен, өткен алты айда барлық макрокөрсеткіштер бойынша оң динамика байқалып, өңдеу өнеркәсібі 14,6%-ке өсті. Өңдеу өнеркәсібінің оң динамикасы әсер етіп, мұнай өндіру көлемі 4,6%-ке төмендеуіне қарамастан, өндіріс 344 млрд теңгені құрап, 0,5%-ке өскен.
Облыста индустрияландыру бағдарламасының бірінші және екінші бесжылдығы аясында құны 150 млрд теңгені құрайтын 26 жоба іске асырылды. Соның нәтижесінде қызылордалықтар үшін 1,7 мың жұмыс орны ашылды. Қазіргі таңда үшінші бесжылдық аясында ауқымды істер атқарылуда. Айталық, 7 мыңнан аса жұмыс орнын құруды көздейтін, жалпы құны 543 млрд теңгеге 41 жоба бойынша жұмыс жасалуда. Өңірлік коммуникациялар қызметінде өткен брифингте облыстық индустриялық-инновациялық даму басқармасының басшысы Ринат Сұлтангереев аталған жобалар ішінде 1,9 млрд теңгенің 5 жобасы іске қосылғанын айтты.
– Олардың қатарында Арал ауданында экспортқа бағытталған балықты тереңінен өңдейтін екі цех және облыста алғашқы кварц құмын байыту комбинатының бірінші желісі бар. Сонымен қатар, Жаңақорған ауданында тротуарлық плитка, бордюр, лего кірпіш өндірісі, Жалағаш ауданында түйіршіктелген аммоний-сульфаты өндірісі пайдалануға берілді. Бүгінде бұл кәсіпорындар тұрақты жұмыс жасап, өнім шығаруда. Іске қосылған жобалар өткен алты айда 22,5 млрд теңгенің өнімін өндіріп, былтырғымен салыстырғанда 1,7 есе өсім көрсетті. Оның ішінде, өнімнің 41%-ін құрайтын 5 түрлі өнім 12 елге экспортталды, – деді ол.
Үлес салмағы басым кәсіпорындардың бірі – «Гежуба Шиелі цемент компаниясының» тампонажды цемент зауыты. Биыл өндіріс қарқынын бес есеге ұлғайтқан зауыт жарты жылда 531 мың тонна өнім өндірген.
Сондай-ақ, басқарма басшысы биыл 48,5 млрд теңгеге төрт жоба іске қосылатынын жеткізді. Жалпы саны 500-ден астам жұмыс орнын құруға мүмкіндік беретін бұл жобалардың үшеуі азық-түлік өнімдерін өндіруге бағытталған. Олар – Қармақшы ауданындағы құс фабрикасы, Арал ауданындағы ас тұзының жаңа цехы мен түйе сүтінен құрғақ сүт дайындау өндірісі. Төртінші жоба, стратегиялық маңызға ие аймақтың құрылыс индустриясындағы ірі нысанның бірі – шыны зауыты.
– Зауыт құрылысы 85%-ке, монтаждау жұмыстары 37%-ке орындалды. Жыл соңына дейін іске қосып, кем дегенде 8 ілеспе өндіріс құруды көздеп отырмыз. Инвесторлармен бірлесіп зауыт айналасында екі жобаны – шыны талшық, айна өндірісін іске асыру жұмыстары басталып та кетті. Барлық ілеспе өндірістер айналасында жаңа кәсіптерді игере отырып, шамамен 400 жұмыс орны құрылады, – деді Р.Сұлтангереев.
Бүгінгі таңда аталған төрт жобаның барлығы құрылыс жұмыстарының аяқталу сатысында. Айталық, «Аралтұз» акционерлік қоғамының жаңа испан цехы қыркүйекте, Арал ауданының индустриялық аймағында «Казақ Кэмел» серіктестігінің түйе сүтінен құрғақ ұнтақ шығару цехы желтоқсанда іске қосылады.
Тау-кен өнеркәсібін дамыту мақсатында «Шалқия» кен орын игеру жобасы жүзеге асырылуда. Қазіргі таңда шахта құрылысын жүргізетін мердігер анықталған, қыркүйек айында құрылыс басталады. «Бизнестің жол картасы – 2025» бағдарламасы аясында Кальциленген сода зауытына инженерлік инфрақұрылым тартылуда. Оның ішінде сумен жабдықтау толық аяқталған, газ, электрэнергия, байланыс желісі, темір жол тұйығын жеткізу жұмыстары басталды.
Сонымен қатар, өңірлік кәсіпкерлікті қолдау картасындағы қуаттылығы жылына 5 мың тонна ет комбинаты және сүт өңдеу кешеніне инженерлік инфрақұрылымдар жеткізіліп, құрылыс жалғасуда. Мұнан бөлек, Жаңақорған ауданындағы «Қызылорда агроплюс» серіктестігінің томат пастасын шығару жобасының құрылтайшысы «Orbis-Agro» компаниясы болып ауысты. Тәжірибелік қызанақ тұқымдары 2 гектар жерге егілді. Сумен жабдықтау жүйесінің жобалау-сметалық құжаттары әзірленіп, мемлекеттік сараптаманың қорытындысын алуға дайын.
Межелі міндеттердің орындалу көрсеткіштеріне тоқталған басқарма басшысы жұмыс істеп тұрған кәсіпорындарды кеңейту және жаңа өндірістер құру есебінен жыл соңына дейін өнеркәсіп өндірісі көлемін 0,7%-ке, оның ішінде өңдеу өнеркәсібін 12%-ке ұлғайту жоспарланғанын атап өтті. Бұл өз кезегінде жоғары еңбек өнімділігі, тиімділіктің жоғары дәрежесіне қол жеткізіп, шикізатты барынша тереңдете өңдеу, экономиканың барлық салаларында жаңа жұмыс орындарын ашуға сеп болып, өңірдегі кәсіпкерлікке серпін жасауы қажет. Мұншама ауқымды міндеттердің жүзеге асуы, сөзсіз, халықтың әл-ауқатын, әлеуетін көтермек.
Биболат Сәтжан,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
