Кеше облыс әкімінің орынбасары, «Байқоңыр» ӘКК» АҚ директорлар кеңесінің төрағасы Нұрлан Тілешев өңірдегі бизнес қауымдастық өкілдерімен кездесті. Жиында кәсіпкерлердің жаңа жобалары талқыланып, бизнес бастау барысында туындаған мәселелердің шешу жолдары қарастырылды.
Шараны «Байқоңыр» ӘКК» АҚ Басқарма төрағасы Ерлан Нұрланбаев жүргізді. Кәсіпкерлерді қолдау мақсатында, мемлекеттік орган, қаржы институттары өкілдерінің қатысуымен мұндай форматтағы жиын алғаш рет өткізілді. Кеңес төрағасының айтуынша, кәсіпкерлердің қаржы мәселелерін шешу, көмек көрсету мақсатында «Байқоңыр» ӘКК» АҚ жанынан құрылған арнайы алаңда тұрақты түрде кездесулер ұйымдастырылмақ.
Жиында 10-нан астам кәсіпкер бизнес жобасының презентациясымен таныстырып, туындаған мәселелерді жеткізді. Айталық, алдағы уақытта Арал ауданында түйе сүтінен құрғақ ұнтақ өндірісі құрылады. Жобаның бастамашысы «Qazaq Camel» серіктестігі дайын өнімді экспортқа шығармақ. Серіктестік директоры Нугурбек Абулгазинов бұл бастама түйе сүті өндірісін дамытуға әсер етіп, халықты жұмыспен қамтуға үлес қосатынын атап айтты. Сондай-ақ, жобаның қаржыландыру барысы туралы сөз қозғап, өндіріс орны Аралдағы индустриалды аймақта орналасатынын, негізгі нысан салынып біткенін жеткізді.
Кездесуде жылыжай өндірісін құруды жоспарлаған Ғани Алматов, гендік-инженерлік ақуызды өндіру бойынша «Bildix» ЖШС директоры Ерден Эрик, жұмыртқа бағытындағы тауық өсіру бойынша «Мөлдір и К» ЖШС директоры Насыр Мырзабеков жобаларын таныстырды.
«Мөлдір и К» серіктестігі бүгінде Шиелі нарығына жұмыртқа шығаруда.
– 2016 жылдан бастап өндіріске қажетті екі цех салдық. Бүгінде цехтар жұмыс істеп тұр, онда 20 мың бас тауық және балапан бар. Ал, бір күндік балапанды Талдықорғаннан жеткізудеміз, – деген Насыр Мырзабеков жұмыртқа қолдан жиналатынын, сұрыптайтын арнайы құрылғылар жоқ екенін атап айтты. Кәсіпті әрі қарай жүргізу үшін 10 мың бас тауыққа тағы да цех соғу керек. Сондықтан қаржылай қолдау қажет екендігін, тауыққа берілетін құрама жемді де сырттан әкелетінін жеткізді.
Жаңақорған ауданында ірі қара өсірумен және бордақылаумен айналысатын «Бекарыс Агрофуд» ЖШС енді қой өсірумен де айналыспақ. Директоры Серік Мырзабаев кәсібін жаңа бағытта дамытқысы келетінін, оған қажетті қаржы көлемін айтты. Облыс әкімінің орынбасары жобаға қолдау танытып, «Байқоңыр» ӘКК» АҚ арқылы қажетті қаржы берілетінін жеткізді.
Жиында сусын, шырын және минералды су өндірісін құру, кондитерлік цех ашу, сауда-логистикалық орталық және автобус бекетін салу бойынша сондай-ақ, тігін цехы, жылыжай ашу, балық шаруашылығы бойынша кәсіп бастағысы келетін кәсіпкерлер де жобаларын таныстырды. Бірқатар мәселелер бірден шешімін тапты. Ең бастысы, жобалардың көпшілігі іске асса, өңір үшін аса қажетті өндіріс орындары құрылмақ.
Облыс әкімінің орынбасары кәсіпкерлерге кәсіп бастарда барлық шығындар нақты есептеліп, бизнес жоспар тиянақты жасалу керегін баса айтты. Сондай-ақ, мемлекеттік органдарға тапсырмалар беріп, қаржы институттарына жан-жақты қолдау көрсету қажеттігін атап өтті.
Айдана ЖҰМАДИНОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
