Жақында ғана Жалағаш ауданының әкімі Ардақ Ибраимов пен аудан прокуроры Талғат Бектұрсынов Мырзабай ахун, Т.Жүргенов және Жаңаталап ауылдық округтерінде болып, тұрғындармен кездескен болатын. Кездесуде Мемлекет басшысы Қасым-Жомарт Тоқаевтың бастамасымен жүзеге асырылып жатқан «Заң мен тәртіп» қағидаты аясындағы «Алкогольсіз ауыл» жобасының маңызы туралы айтылды. Әрі жобаның құқықбұзушылықтың алдын алуға бағытталған тиімді әрі оң бастама екені кеңінен талқыланды.
Жалпы Жалағаш ауданында «Алкогольсіз ауыл» жобасы бұған дейін де кеңінен насихатталып келді. Жоба біршама елді мекендерде сәтті жүзеге асты. Мысалы, былтыр қыркүйек айында Жалағаш аудандық прокуратурасының бастамасымен және жергілікті қауымдастықтың белсенді қолдауымен Таң ауылы ресми түрде ішімдіксіз ауыл мәртебесіне ие болды. Бұл бастама аясында ауыл кәсіпкерлері өз еріктерімен алкоголь өнімдерін сату лицензияларынан бас тартып, салауатты өмір салтын қалыптастыруға үлес қосқан болатын. Сондай-ақ мұндай игі қадам бұған дейін ауыл ақсақалдары, ел ағалары және жастардың ықпалымен Еңбек және Аламесек ауылдарында жүзеге асты. Сауда дүкендерінде спирттік ішімдіктер сатылмайтын болды.
– Иә, өткен жылы елді мекендерді аралау барысында жергілікті ауылдың тұрғындарына «Алкогольсіз ауыл» жобасына үн қосуды ұсындық. Жергілікті әкімдік пен тұрғындар арасында сауалнама жұмыстарын жүргізіп, халық 99%-ы қолдап, нәтижесінде жергілікті кәсіпкерлер алкоголь өнімін сатуға арналған лицензияларын өз еріктерімен мемлекетке өткізді. Қазір Жалағаш ауданына қарасты Аққыр, Жаңаталап, Мақпалкөл, Мырзабай ахун, Еңбек және Таң ауылы алкогольден толықтай бас тартты. Бұл қалған 8 ауылға үлкен серпін бергендей. Ауыл тұрғындары мұндай игі бастамадан қалыс қалмайтындарын, елдік шараның қоғамдық қауіпсіздікті арттыруға, құқықбұзушылықтың алдын алуға және өскелең ұрпақ болашағының дұрыс болуына қолдау білдіріп отыр, – дейді Жалағаш ауданының прокуроры, аға әділет кеңесшісі Талғат Бектұрсынов.
Осындай профилактикалық жұмыстардың нәтижесінде Жалағашта қылмыс саны 11,4%-ға азайды. Ал биыл қаңтар айының 20-сы күні аудан прокуратурасының бастамасы арқылы аудан әкімдігімен бірлескен «Жалағаш заңға бағынған, тәртіпке негізделген аудан» жобасы бекітілді. Бұл жергілікті уәкілетті органдар ықпалымен орындалуда.
Мұндағы ұстаным – отбасылық береке мен тыныштықты нығайту. Қазір осы ауылдардағы мектеп, мешіт және мәдениет үйлерінде алкоголь зияны жайлы жиі айтылып, мазмұнды кездесулер ұйымдастырылады. Ел ішіндегі той-мерекелерді ішімдіксіз өткізу дәстүрге айналып келеді.
Айта кетейік, аталған жоба республика бойынша іске асып жатқаны белгілі. Көп қылмыстың бастауында тұрған зиянды ішімдіктен бас тартқан ауылдар әр өңірде де жетерлік. Ресми деректерде, Жамбыл, Түркістан, Солтүстік Қазақстан, Шығыс Қазақстан, Қарағанды облыстарындағы бірнеше елді мекен ішімдіктен бас тартқан.
Ал Қызылорда облысында 20-ға жуық ауыл салауатты өмір салтын ұстанатын елді мекендер қатарына енген. Олардың кейбіреуінде кейінгі үш жылда мүлде қылмыс тіркелмепті. Бұл – ауыл тұрғындарының қоғамдық қауіпсіздікті нығайтуға және салауатты өмір салтын қалыптастыруға деген ортақ мүддесі.
Ержан ҚОЖАС,
«Сыр бойы»
