Биыл «Жұмысшы мамандықтар жылы» аясында еңбегімен елге сыйлы болған азаматтар жайлы материалдар жариялап, олардың өнегелі ісін көпке үлгі еттік. Солардың қатарында нәзік жанды болса да теміржол саласында 15 жылдан астам уақыт еңбек етіп келе жатқан Айгерім Қалменова бар.
Ол Қармақшы ауданының тумасы. Мектепті ойдағыдай бітірген соң, колледжге түсті. Теміржолшы мамандығын таңдады. Білімін жетілдіру үшін жоғары оқу орнында оқыды. Алғашқы еңбек жолын «Қамқор» локомотив депосынан бастады. Жұмысқа орналасқан кезде кішкентай қыздың талабына күмәнмен қарағандар болды. Бірақ бұл мамандық оның жан қалауы еді.
– Маған мамандық таңдаудан тағы бір мүмкіндік берілсе, бұл салаға қайта келер едім. Өйткені бала күнгі арманым. Осы кезге дейін вагон жөндеу депосында, «Марал-Нұр» мекемесінде және өзге де жұмыс орындарында істедім. Біраз тәжірибе жинап, білікті маман атандым. Қазір «QZ-VRD» теміржол мекемесінде дефектоскопист қызметін атқарамын. Ол – вагон дөңгелектерінің сапасына жауап беретін маман, – дейді ол.
Айгерім өте еңбекқор, ісіне тиянақты. Өзіне артылған жауапкершілікті тыңғылықты орындайды. Жұмыс кезінде үнемі ізденіп жүреді. Білім алу әркез артық етпейді деген ұстанымы да бар. Қызметте жүріп, Қарағанды қаласында дефектоскопист мамандығы бойынша оқыды. Ол жолаушылар вагонының дөңгелек жарықшаларын тексереді. Арнайы Уд4-76, 211,5, МД 12-ПШ, МД12-ПС дефектоскоп құрылғыларымен жұмыс істейді.
– Жұмыстың жеңілі жоқ. Бірақ өзіме ұнаған іс болғаннан кейін қиын емес. Жарықшаларды тексеру кезінде барлық ақпарат алынып, оны компьютерге енгізіп, нәтижесін шығарамын. Сол бойынша тиісті мамандар жөндеу жұмыстарын жүргізеді. Жұмысым өте жауапты. Себебі жолаушылар вагоны болғандықтан оған қаншама халық мінеді. Сол үшін қауіпсіздікті алдыңғы орынға қоямыз. Дөңгелек жұптарын жөндеу цехында күнделікті қызу жұмыс жүреді. Әр адам өз ісінің білгірі. Теміржолдағы әр вагон өздігінен жүре бермейді. Оның артында қаншама еңбек жатыр. Пойыздар белгілі бір уақытта жөндеуден өтіп тұру керек. Уақыты келгендері осында жеткізіліп, толық тексеруден, жөндеуден өтеді. Міне, осы жұмыстарды біз секілді қарапайым адамдар атқарады. Сондықтан теміржол бізді темірдей тәртіпке үйретті, – дейді ол.
Жалпы, бұл саланы таңдайтын қыз-келіншектер аз. Қыз баланың табиғатына келе бермейтін мамандық екені де белгілі. Бірақ бойында қайсар мінезі мен жігері басымдар қадам басып жатады. Айгерім де солардың бірі. Ол кейінгі кезде өзінің білген-түйгенін жас мамандарға үйретіп, баулып жүр. Жолдасы да теміржолда еңбек етеді. Үнемі қолдау білдіріп отырады. Қазір отбасында төрт баланы тәрбиелеп отырған аяулы ана келекшекте бейнеттің зейнетін көрсем деген тілегі бар. Сондай-ақ ол теміржол саласында еңбек еткенін мақтан тұтады.
Иә, теміржол тіршіліктің күретамыры іспетті. Ал оның жұмысын жетілдіру, жандандыруда шойын жолда шыңдалған Айгерім сынды білікті мамандардың еңбегі жатыр.
Сара АДАЙБАЕВА,
«Сыр бойы»
