Онлайнның оңтайлы тұсы кеше індет өршіген тұста байқалды. Сандық технологияға көшу бағытындағы бастамаларда кей кемшілік орын алғанымен, ол көп көмегін тигізді. Осылайша, біз ғаламторды күнделікті өмірге ақырын енгізгенімізді аңғарттық. «Назарбаев моделі – Қазақстанның ХХІ ғасыр сын-қатерлеріне стратегиялық жауабы» атты жас ғалымдардың халықаралық форумы аясында өңірде «Пандемия уақытындағы цифрландыру: жаңа талаптар мен үрдістер» тақырыбында интернет форум өтіп, мұнда осы мәселелер қамтылды.
Форумға PhD докторы, ақпараттық технологиялар орталығының директоры Сәбит Ибадулла, Нұрсұлтан Назарбаев қоры жанындағы ғылым жөніндегі кеңес төрағасының орынбасары Сухраб Жапаров, облыстық цифрлық технологиялар басқармасының басшысы Юлия Тремасова, Сингапур ұлттық университеті халықаралық бағдарламалық жүйелік ғылымдар институтының басшысы Ашок Кумар, «Азаматтарға арналған үкімет» мемлекеттік корпорациясы» КЕ АҚ облыс бойынша филиалының директоры Айдын Қайруллаев, облыстық білім басқармасы басшысының орынбасары Бағдат Бердәулетов және Қорқыт ата атындағы Қызылорда университетінің ректоры, филология ғылымдарының кандидаты Бейбіткүл Кәрімова қатысты. Жиында облыстық цифрлық технологиялар басқармасының басшысы Юлия Тремасова облыстағы мемлекеттік қызмет көрсетудің онлайн форматы, қашықтан оқуды ұйымдастыру және интернет сапасы, індеттің таралуын тежеу бойынша қабылданған цифрлық шешімдерді ортаға салды.
– Облыс әкімдігі коронавируске қатысты жедел әрі нақты ақпарат тарату мақсатында 400-100.kz ресми сайтын іске қосты. Онда облыс аумағындағы күнделікті статистика, аудандар бөлінісіндегі деректер, брифингтер, нормативтік-құқықтық актілер, жедел желі телефондары мен жаңалықтар қамтылған.
Сонымен қатар дерттің алдын алу, белгілері туралы мәлімет, инфографика жарияланады. Блок-посттардан өтуге арналған өтінім үлгілерін де осы жерден алуға мүмкіндік болды. Азық-түлікке онлайн тапсырыс беру және тікелей жеткізу қызметін жетілдіруде ІТ парктің үлесі зор. Мемлекеттік қызметтерді автоматтандыруда да алға жылжу бар деп айта аламыз, – деді басқарма басшысы.
Шарада Сингапур ұлттық университеті халықаралық бағдарламалық жүйелік ғылымдар институтының басшысы Ашок Кумар бейнебайланыс арқылы қосылды. Ол бүгінде ІТ-маман, мерчендайзер, бета-тестер мамандары жоғары жалақыға ие екенін, мобильді қосымшалардың арнайы бағдарламасын жазатын маманды, әлеуметтік желі менеджерін іздеушілер де көп екенін алға тартты.
Форумда білім саласындағы қарқын да шет қалмады. Бүгінде «Электронды балабақша» жүйесі толықтай автоматтандырылған. Қазіргі ол жаппай қолданыста. «Күнделік» электронды журналы жүйесін облыстың 293 жалпы білім беретін ұйымы пайдаланады. Мемлекеттік қызметті автоматтандыру ісі де бар. Бұрын жұмысқа тиісті құжаттарды арқалап, әуре-сарсаңмен тұратын болсаңыз, қазір оның барлығы электронды түрде іске асырылады. Облыстың барлық білім беру мекемелеріне қызметкерлерді жұмысқа қабылдау jumys.sitcen.kz ақпараттық жүйесімен жүргізілуде.
Шарада өзге де қатысушылар тың тақырыптағы баяндамаларымен бөлісті. Жаңа жағдайдағы жаңа сын-тегеуріндерді талқыға сала отырып, өз ұсынымдарын жеткізді.
Мөлдір Қалымбет,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
