Кеше облыс әкімі Гүлшара Әбдіқалықованың солтүстік аудандарға жұмыс сапары басталды. Алдымен Арал ауданында облыс басшысымен бірге Қазақстан Республикасының Экология, геология және табиғи ресурстар министрі Мағзұм Мырзағалиев «Көкарал» бөгетінің жұмысымен танысып, «Сырдария өзенінің арнасын реттеу және Арал теңізінің солтүстік бөлігін сақтау» жобасының ІІ фазасын іске асыру мәселесін талқылады.
– Өздеріңіз білесіздер 2005 жылы «Көкарал» бөгеті салынды. Дегенмен, оның қазір біраз мәселелері бар. Бір жағын су шайып жатыр. Сондықтан бөгеттің жұмысын қалыпқа келтіріп, қуаттылығын арттыруымыз қажет. Биыл министрлік тарапынан жобалық-сметалық құжаттарын әзірлеуге қажетті қаражат бөлінді, жоба дайын болғаннан кейін құрылыс жұмыстарын бастаймыз, – деді министр.
Сондай-ақ, Экология, геология және табиғи ресурстар министрі САРАТС-2 жобасына да тоқталды.
– Нақты қабылданатын шараларды анықтадық. Енді тиісті жұмыстарды атқаратын боламыз. Бұл жобаның маңыздылығы – Көкарал бөгетіне келетін суды жинақтау. Сондай-ақ, екінші фазада су көлемі көбейіп, сәйкесінше балық шаруашылығы да дамиды. Бүгінгі күні республика көлемінде су қоймаларының жағдайына зерттеу жұмыстары жүргізілуде. Соған сәйкес, әр аймақтан нақты ұсыныстар берілу керек, – деді Мағзұм Мырзағалиев.
«Көкарал» бөгетінің арқасында бүгінде балық аулау көлемі 0,4 мың тоннадан 6 мың тоннаға дейін артқан және су маржанының жергілікті түрлері оның ішінде бекіре тұқымдас балықтарды өсіруге қолайлы жағдай жасалған. Сондай-ақ, теңіздегі судың көлемі 15,6 млн текше метрден 27,1 млн текше метрге дейін ұлғайған.
Арал ауданындағы негізгі кәсіптің бірі балық шаруашылығы. Министр мен облыс әкімі «Арал сервистік дайындау орталығы» ЖШС және «Арал» балық өңдеу зауытында болып, жұмысымен танысты. Қазір теңіздің белгіленген бір аумағына шығуға әрқайсысында екі балықшысы бар 20 қайыққа ғана рұқсат етілген. Балықшылар министрге жергілікті тұрғындарды жұмыспен қамтамасыз ету үшін қойылған лимитті ұлғайту туралы өтініш білдірді. Мағзұм Мырзағалиев балықшыларға бұл мәселені қарастыруға уәде берді.
– Біздің зауыт бұрынғы «Аралрыбпромның» ізімен 2009 жылы құрылған. 2010 жылы алғашқы өнімі шығып, соңғы он жыл ішінде өнім көлемі 17 есеге артты. Теңіздегі 5 участок, қосымша көлдеріміз арқылы балық ауланып, дайындалған өнімді шет елдерге шығарып отырмыз. 2012 жылдан бері «еврокод» белгісін алып, көрші мемлекеттерге жіберудеміз. Алда жоспарымыз көп. Балық түрлерін көбейту мақсатында тоғандар салып, қосымша цех пен жұмысшыларға жатақхана тұрғызамыз. Бастысы – балық түрлерін көбейтіп, зауыт жұмысын жандандыра беру, – дейді зауыт басшысы Әділбек Әйімбетов.
Ауданға сапар барысында облыс әкімі 2018 жылы пайдалануға берілген жаңа ауруханада болып, медицина қызметкерлерімен кездесті.
Қосымша айта кетсек, қазіргі ахуалға байланысты ауданда коронавирус індетін жұқтырған 6 адам анықталып, оның 4-і үй карантиніне шығарылған. Қазір ауруханада 2 адам жатыр. 36 адам карантиндік стационарға орналастырылыпты. Ал 140 адам үйде оқшауланған. Індетке шалдыққан науқастардың еміне және оның күтіміне барлығы 61 медициналық қызметкер тартылған. Облыс басшысы әлемдік пандемиямен күресіп жүрген ақ халаттыларға алғысын жеткізді.
Облыс әкімі апаттық жағдайдағы «Толқын» балабақшасына да барды. 45 жылға жуықтаған бөбекжайға жаңа ғимаратын салу үшін жоба-сметалық құжаттарына қаржы бөлу қажет көрінеді. Айтпақшы, бұдан бөлек, Арал қаласындағы «Балдырған», «Жазира» балабақшаларының құрылысын салу да – көпшілік күткен мәселелердің бірі.
Арал қаласында 1940 жылы салынған ескі ғимарат 1996 жылы аудандық оқушылар үйіне берілген болатын. Апатты деп танылып, былтырдан бері құрылысы басталған нысанның бүгінде іргетасы құйылып, алғашқы қабатының темір бетонды жабындысы жабылған. Кәріз су жүйелері толықтай жеткізілген. Құрылыс жұмыстарын аяқтауға қосымша 101 млн теңге қаржы керек. Аталған сома бөлінген жағдайда алдағы қыркүйек айында нысан пайдалануға беріледі.
Облыс басшысы 13 мыңнан аса тұрғыны бар Сексеуіл кентінде де болды. «Қамқор» локомотив жөндеу депосына барып, сала мамандарымен кездесті. Депода 250-ге жуық жұмысшы бар. Тепловоздарға техникалық қызмет көрсететін мекеме Сексеуіл тұрғындары үшін аса маңызды. Мекеме басшысы Мұхтар Кеулімжаев мұндағы қызметкерлердің тұрмыс сапасы жақсы екенін, жалақы көлемі артып, қызметкерлерге жыл сайын курорттық демалыс пен балалар жаздық лагерьмен қосымша қамтылатынын айтып берді. Бұдан бөлек, зауыттағы техникалық жабдықтар да жаңаланған.
Сондай-ақ кенттегі екі жыл бұрын ашылған спорт кешенінің жұмысы мен 40 төсектік аурухана құрылысы назарға ұсынылды. Бас мердігер «Атамекен» ЖШС жүргізіп жатқан аурухана екіқабатты, бірнеше блоктардан тұрады. Құрылыс былтыр мамыр айында басталған. Бұл жөнінде облыстық құрылыс, сәулет және қала құрылысы басқармасы басшысының міндетін атқарушы Арнұр Нұрмағамбетов айтып берді.
– Былтыр құрылысты бастауға облыстық бюджеттен 50 млн теңге бөлінсе, биыл оны жалғастыруға 200 млн теңге қаржы қаралған. Ғимаратқа үш жарым гектар жер берілген. Қаржысы толық шешілсе, жыл соңына дейін пайдалануға беруге мүмкіндік бар, – дейді А.Нұрмағанбетов.
Сексеуілдегі тағы бір маңызды құрылыстың бірі – 300 орындық мектеп. Облыс әкімі жаңа мектеп салынатын аумаққа барып, жұмыстарымен танысты. Кентте қазіргі таңда 15 мыңға жуық халық тұрады. Кенттің орталығынан үлкен темір жол торабы өтеді. Сексеуілдегі 3 мектеп темір жолдың бір бетінде орналасқандықтан екінші бетінде тұратын 360 оқушы шойын жолдан өтуге мәжбүр. Бұл мәселені шешу үшін жаңа білім ұясын салуға тиісті құжаттар әзірленіп, ҚР Білім және ғылым министрлігінен қолдау тапты. Енді мамыр айында білім ошағының құрылыс жұмыстары басталады деп күтілуде.
Бұл ретте облыс басшысы құрылыс жұмыстарын сапалы жүргізіп, нысанды межеленген уақытында пайдалануға беруді тапсырды.
– Президент Қасым-Жомарт Кемелұлы Тоқаев Сексеуіл стансасындағы мектепке жету үшін темір жолдардан өтуге мәжбүр балалардың мәселесін шешуді тапсырды. Бұл – өзекті мәселе. Сол себепті Үкімет нақты шаралар қабылдады. Жаңа оқу жылында, оқушылар заманауи мектепте білім алады деп сенеміз. Қаржысы бөлінді. Енді тек жұмыс жасау қажет, – деді облыс әкімі.
Сексеуілде сонымен қатар тұрмыстық қатты қалдықтарға арналған полигон, газ тарту, ішкі жолдарды жөндеу сияқты жұмыстар да өз кезегімен атқарылуы тиіс.
Мұнан кейін облыс әкімінің сапары Жақсықылыш кентінде жалғасты. Ас және техникалық тұз өндіретін, 1200 адам еңбек ететін, Қазақстаннан бөлек, сырт елдерге тұз өнімін экспорттайтын кәсіпорын орналасқан шағын қалашыққа биыл газ құбыры тартылады деген қуанышты хабар бар.
– Жарық бар, су бар. Газ мәселесі шешіледі. Жақсы заманның куәсі болғаныма қуанамын. Бұл атқарылып жатқан игілікті істің бәрі – ел Тәуелсіздігінің жемісі. Сондай-ақ, тұз өндіруде оның сапасы жағынан біздің Аралдың өнімі дүниежүзі бойынша алдыңғы қатарда тұр. Бұл да – біз үшін, біздің балалар үшін үлкен мақтаныш. Жақсықылышта халық саны жылдан-жылға өсіп келеді. Қосымша балабақша, мектеп салу қажеттілігі байқалады. Бұл мәселе де аяқсыз қалмайтынына сенім білдіремін, – дейді ардагер Баймырза Жұбаниязов.
Айта кетейік, бүгін облыс әкімінің сапары Арал және Қазалы аудандарында жалғасады.
Ержан Қожасов,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
