Облыс әкімі Гүлшара Әбдіқалықова Атом саласы қызметкерлерінің күні кәсіби мерекесіне байланысты аймақта қызмет атқарып жүрген сала мамандарымен кездесті. Оларға құттықтау лебізін білдіріп, үздіктерді марапаттады.
2008 жылы 28 қыркүйекте Тұңғыш Президент – Елбасы Нұрсұлтан Әбішұлы Назарбаевтың Жарлығымен «Атом өнеркәсібі қызметкерлерінің күні» кәсіби мерекесі болып бекітілді. Қазақстан уран өндіру көлемі бойынша әлемдік көшбасшы болса, өндірілген уранның барлық көлемінің 20 проценттен астамы біздің өңірдің үлесіне тиеді. Бұрын уран өндіруші компаниялар күкірт қышқылын шетелден сатып алды. Қазір «СКЗ-Ю» компаниясының зауыты жыл сайын 500 мың тонна күкірт қышқылын өндіруде.
– Елімізде атом саласы – экономиканың негізгі бағыттарының бірі. Ол стратегиялық маңызды және табысты сала ретінде бағаланады. Сыр өңірінде 4 уран өндіретін компания және 1 күкірт-қышқыл шығаратын зауыт жұмыс жасауда. Оларда 2 500-ден аса адам еңбек етеді. Аймақтың индустриясын дамытуда, уран өндіруде сіздердің үлестеріңіз зор. Кәсіби мерекелеріңізбен құттықтаймын, – деді облыс әкімі.
Бұдан кейін сала үздіктері марапатталды. Атап айтқанда, «Семізбай-U» ЖШС-ның инженер-механигі Әбдіманап Өтеев, «РУ-6» ЖШС-ның электромонтері Владимир Голощапов, «Байкен-U» ЖШС-ның слесарь-электригі Анарбай Мырзатай және «Хорасан-U» ЖШС-ның операторы Бақыт Арысбекке Құрмет грамотасы табысталды.
Кездесу соңында сала ардагері Қайратбек Жолдыбаев аймақ басшысына көрсетілген құрмет үшін алғысын жеткізіп, әріптестерін кәсіби мерекемен құттықтады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
